កាលពីថ្ងៃអាទិត្យ អង្គការណាសាបានបាញ់បង្ហោះយានអវកាសមួយ តម្លៃ ១,៥ពាន់លានដុល្លារ ទៅកាន់ព្រះអាទិត្យ នៅក្នុងបេសកកម្មជាប្រវត្តិសាស្ត្រមួយ ក្នុងការការពារភពផែនដីតាមរយៈការលាតត្រដាងនូវអាថ៌កំបាំងនៃព្យុះសូឡាដ៏គ្រោះថ្នាក់។
អ្នកអត្ថាធិប្បាយម្នាក់ប្រចាំនៅអង្គការណាសាបាននិយាយថា យានអវកាស Parker Solar Probe ត្រូវបានចាប់ផ្តើមហោះឡើងនៅវេលាម៉ោង ៣:៣១នាទីទាបភ្លឺថ្ងៃអាទិត្យ នៅក្នុងរដ្ឋហ្វ្លរីដា។ យានអវកាសគ្មានមនុស្សបើកនេះមានគោលបំណងដើម្បីខិតចូលកាន់តែកៀកទៅនឹងព្រះអាទិត្យជាប្រវត្តិសាស្ត្រ ដែលមិនទាន់មានយានអវកាសណាមួយអាចធ្វើបានដូច្នេះនោះទេ នៅក្នុងប្រព័ន្ធសូឡាយើងនេះ។
យានអវកាសនេះ ត្រូវបានរចនាឡើង ដើម្បីអាចចូលទៅដល់បរិយាកាសរបស់ព្រះអាទិត្យបាន ក្នុងកំឡុងពេលបេសកកម្មរយៈពេល ៧ឆ្នាំ ដែលបរិយាកាសនេះ ត្រូវបានគេស្គាលថាជាបណ្តុំពន្លឺ។ យាននេះត្រូវបានការពារដោយប្រព័ន្ធការពារពន្លឺ ដែលអាចអត់ធន់ទៅនឹងកំដៅកម្រិតខ្ពស់ និងកម្រិតវិទ្យុសកម្ម ៥០០ដងនៃកម្រិតនៅក្នុងភពផែនដី។
បេសកកម្មនេះត្រូវបានគេហៅថា ជាបេសកកម្មដែលធ្វើដំណើរទៅកាន់តែកៀកព្រះអាទិត្យ ដើម្បីធ្វើការសិក្សាអំពីវា។ តាមពិតទៅ វាគួរតែស្ថិតនៅក្នុងរយៈចម្ងាយ ៦,១៦លានគីឡូម៉ែត្រពីផ្ទៃព្រះអាទិត្យ ស្ថិតនៅកៀកគ្រប់គ្រាន់អាចធ្វើការសិក្សាពីបាតុភូតនៃខ្យល់សូឡា និងបរិយាកាសរបស់ព្រះអាទិត្យ ដែលហៅថា បណ្តុំពន្លឺជុំវិញព្រះអាទិត្យ ដែលបណ្តុំពន្លឺនេះក្តៅជាងផ្ទៃរបស់វាដល់ទៅ ៣០០ដងឯណោះ។
យានដែលមានទំហំប៉ុណរថយន្តនេះ ត្រូវបានរចនាឡើងដើម្បីធ្វើឲ្យអ្នកវិទ្យាសាស្ត្រអាចយល់បានកាន់តែប្រសើរអំពីខ្យល់សូឡា និងព្យុះសូឡា ដែលបង្កហានិភ័យភាពវឹកវរមកលើភពផែនដី តាមរយៈការផ្តល់ចរន្តភ្លើង។
បន្ទុះសូឡាទាំងនេះត្រូវបានគេយល់តិចតួច ប៉ុន្តែវាមានសក្តានុពលក្នុងការជម្រុញថាមពលដល់មនុស្សរាប់លាននាក់។ ក្រុមអ្នកជំនាញបានព្រមានថា សេណារីយ៉ូដ៏អាក្រក់បំផុតមួយអាចរហូតដល់ ២កោដលានដុល្លារ នៅក្នុងឆ្នាំដំបូង ដើម្បីរួចផុតពីព្យុះសូឡានេះ។
លោក Justin Kasper អ្នកវិទ្យាសាស្ត្រ ប្រចាំនៅក្នុងគម្រោងនេះ និងជាសាស្ត្រាចារ្យនៅសាកលវិទ្យាល័យមីឈីហ្គេនបាននិយាយថា «យានអវកាស Parker Solar Probe នឹងជួយយើងឱ្យធ្វើការបានល្អប្រសើរជាងមុន ក្នុងការទស្សន៍ទាយនៅពេលការរំខាននៅក្នុងខ្យល់សូឡា ដែលអាចវាយប្រហារមកលើភពផែនដី»។ យាននេះ ត្រូវបានការពារដោយខែលការពារកម្តៅថាមពលអាល់ត្រាំ ដែលមានកម្រាស់ ១១,៤៣សង់ទីម៉ែត្រ ដែលអាចជួយដល់យានអវកាសអាចស្ថិតនៅបានកាន់តែកៀកទៅនឹងព្រះអាទិត្យ។
ទោះបីជានៅក្នុងតំបន់មួយ សីតណ្ហភាពអាចឡើងទៅដល់ជាងកន្លះលានអង្សាសេក៏ដោយ ក៏ពន្លឺព្រះអាទិត្យត្រូវបានគេរំពឹងថា អាចបញ្ចេញកម្តៅទៅលើខែលការពារយាននេះត្រឹមតែជាង ១ពាន់អង្សាសេតែប៉ុណ្ណោះ។
ប្រសិនបើអ្វីៗទាំងអស់ដំណើរការតាមការគ្រោងទុកមែន ផ្នែកខាងក្នុងយានអវកាសនេះមានសីតណ្ហភាពត្រឹមតែ ២៩អង្សាសេតែប៉ុណ្ណោះ។ គោលបំណងនៃការបង្ហោះយានអវកាស Parker Solar Probe នេះឡើង គឺដើម្បីធ្វើដំណើរឆ្លងកាត់តាមបណ្តុំពន្លឺជុំវិញព្រះអាទិត្យ ក្នុងកំឡុងពេល ៧ឆ្នាំ។ លោក Nicky Fox អ្នកវិទ្យាសាស្ត្រប្រចាំនៅក្នុងគម្រោងនេះ និងជាសាស្ត្រចារ្យប្រចាំនៅសកលវិទ្យាល័យ John Hopkins បាននិយាយថា ព្រះអាទិត្យគឺពោរពេញទៅដោយអាថឥកំបាំង។ យើងចង់បានចម្លើយអំពីវា»។
យានអវកាសនេះគឺជា យានតែមួយរបស់អង្គការណាសាក្នុងប្រវត្តិសាស្ត្រ ដែលត្រូវបានគេដាក់ឈ្មោះតាមមនុស្ស ជារូបវិទូព្រះអាទិត្យមានអាយុ ៩១ឆ្នាំ ឈ្មោះ Eugene Parker ដែលបានធ្វើការពិពណ៌នាអំពីខ្យល់សូឡា ឬខ្យល់ព្រះអាទិត្យមុនគេ នៅក្នុងឆ្នាំ ១៩៥៨។
លោក Parker បាននិយាយកាលពីសប្តាហ៍មុនថា «លោកមានចំណាប់អារម្មណ៍យ៉ាងខ្លាំងទៅនឹងយាន Parker Solar Probe ដែលលោកបានហៅវាថាគឺជាម៉ាស៊ីនដ៏មានលក្ខណៈស្មុគ្រស្មាញ»។ យាននេះអាចហោះពីទីក្រុងញូយកទៅកាន់ទីក្រុងតូក្យូត្រឹមតែ១នាទីតែប៉ុណ្ណោះ ត្បិតអីវាអាចហោះបានក្នុងល្បឿនជាង ៦៩ម៉ឺនគីឡូម៉ែត្រក្នុងមួយម៉ោង៕DNT-NEWS
Home បច្ចេកវិទ្យា យាន្តអវកាសអង្គការ NASA ល្បឿនជាង៦៩ម៉ឺនគីឡូម៉ែត្រក្នុងមួយម៉ោង បានបាញ់ទៅរកតំបន់ក្បែរព្រះអាទិត្យហើយ !