កាលពីពេលកន្លងទៅថ្មីៗនេះ លោក Keisuke HONDA ត្រូវបានតែងតាំងជាគ្រូបង្វឹកថ្មីរបស់ក្រុមជម្រើសជាតិកម្ពុជា ហើយមិនយកប្រាក់ខែ ។ នេះបើតាមការបង្ហាញ និងប្រកាសតែងតាំងផ្លូវការ ក្នុងសន្និសីទសារព័ត៌មាន ដែលធ្វើឡើងក្រោមវត្តមានលោក សៅ សុខា ប្រធានសហព័ន្ធកីឡាបាល់ទាត់កម្ពុជា នៅសណ្ឋាគារឡឺរ៉ូយ៉ាល់ នៅថ្ងៃទី១២ ខែសីហា ឆ្នាំ២០១៨ ។
លោកសៅ សុខា ប្រធានសហព័ន្ធកីឡាបាល់ទាត់កម្ពុជា បានបង្ហាញការរីករាយយ៉ាងខ្លាំងចំពោះវត្តមានកីឡាករKeisuke HONDA ដែលបានសុខចិត្តមកបង្ហាត់ដល់ក្រុមបាល់ទាត់ជម្រើសជាតិកម្ពុជាដោយមិនយកប្រាក់កម្រៃបែបនេះ។ តែទោះជាយ៉ាងនេះក្តី លោកសៅ សុខា ក៏អះអាងដែរថា សហព័ន្ធកីឡាបាល់ទាត់កម្ពុជានឹងធានារ៉ាប់រងរាល់ការចំណាយលើការធ្វើដំណើរ ស្នាក់នៅ និងការធ្វើកិច្ចការនានានៅក្នុងប្រទេសកម្ពុជារបស់គ្រូបង្វឹកថ្មីសញ្ជាតិជប៉ុនរូបនេះ។ សម្រាប់លោកសៅ សុខា វត្តមានរបស់ Keisuke HONDAនៅពេលនេះ វានឹងចូលរួមចំណែកគាំទ្រ និងជួយក្នុងការអភិវឌ្ឍវិស័យបាល់ទាត់នៅក្នុងប្រទេសកម្ពុជា។
សំរាប់ លោក Honda វិញតាមរយៈអ្នកបកប្រែបានលើកឡើងថា៖ អ្វីដែលជាគោលបំណងរបស់ខ្ញុំ គឺចង់បង្កើត Style លេងឲ្យបានច្បាស់លាស់ដល់កម្ពុជា។ ខ្ញុំទទួលស្គាល់ថា សូម្បីនៅជប៉ុនក៏មានលំបាកនៅឡើយដែរ តែយើងត្រូវធ្វើឲ្យមានគោលបំណងតែមួយ។ បេសកកម្មទី២ គឺ គោលដៅមិនមែនដើម្បីតែបាល់ទាត់ប៉ុណ្ណោះទេ ប៉ុន្តែគឺចង់ផ្សព្វផ្សាយអ្វីល្អៗរបស់កម្ពុជាដែរ។ ខ្ញុំចង់ផ្សព្វផ្សាយអ្វីដែលខ្ញុំចាប់អារម្មណ៍ អ្វីៗល្អច្រើន ដូចជាវប្បធម៌ បេតិកភណ្ឌពិភពលោក និងកសិកម្ម ទៅកាន់ពិភពលោក។
គួរបញ្ជាក់ដែរថា កីឡាករ ដែលមានវ័យ ៣២ឆ្នាំ Keisuke HONDA កំពុងតែលេងឲ្យក្លិប Melbourne Victory នៅក្នុងប្រទេសអូស្ត្រាលី។ តាំងពីឆ្នាំ២០០៤មកដល់ឆ្នាំ២០១៨នេះ HONDA ធ្លាប់លេងឲ្យក្លិបនៅក្នុងប្រទេសជប៉ុន ក្លិបនៅហូឡង់ រុស្ស៊ី អ៊ីតាលី និងចុងក្រោយនៅម៉ិកស៊ិក។ សម្រាប់ប្រទេសកម្ពុជាវិញ កីឡាករបាល់ទាត់រូបនេះ បានជួយជ្រោមជ្រែងបង្កើតក្លិបបាល់ទាត់ Soltilo Angkor FC ដែលមានមូលដ្ឋាននៅក្នុងខេត្តសៀមរាប និងកំពុងលេងនៅលីគកំពូលកម្ពុជា។ Keisuke HONDA ក៏ធ្លាប់ចូលរួមប្រយុទ្ធលើវាលស្មៅកីឡដ្ឋានជាតិអូឡាំពិកកម្ពុជាតទល់នឹងក្រុមជម្រើសជាតិកម្ពុជាម្តងដែរកាលពីឆ្នាំ២០១៥កន្លងទៅ៕
Home ព្រឹត្តិការណ៍ថ្មីៗ HONDA ដែលទើបនឹងត្រូវបានតែងតាំងជាគ្រូបង្វឹកថ្មីរបស់ក្រុមជម្រើសជាតិកម្ពុជា បានបញ្ជាក់ថាគោលដៅរបស់លោកមិនមែនដើម្បីតែបាល់ទាត់ប៉ុណ្ណោះទេ