យោងតាមសេចក្តីថ្លែងការណ៍មួយដែលផ្សាយដោយក្រសួងការពារជាតិរុស្ស៊ី នៅថ្ងៃទី២៧ សីហា ២០១៨នេះ បានឱ្យដឹងថា កងទ័ពជើងទឹករុស្ស៊ីបានបញ្ជូននាវាពិឃាតរបស់ខ្លួនចំនួនពីរគ្រឿងមកពីក្រុមកងនាវាចម្បាំងសមុទ្រខ្មៅ ទៅកាន់សមុទ្រមេឌីទែរ៉ាណេរ ដើម្បីពង្រឹងវត្តមានយោធារុស្ស៊ី នៅក្នុងតំបន់។
ការបញ្ជូននាវាពិឃាតចំនួន ២គ្រឿងទៅកាន់ឆ្នេរស៊ីរីនេះ បានធ្វើឡើងភ្លាមៗបន្ទាប់ពីការព្រមានពីសំណាក់ទីប្រឹក្សាសន្តិសុខជាតិសហរដ្ឋអាមេរិក លោក John Bolton ថា សហរដ្ឋអាមេរិកកំពុងតែត្រៀមចាត់វិធានការណ៍ដោយប្រើកម្លាំងវាយប្រហារទៅលើរដ្ឋាភិបាលស៊ីរី ដើម្បីឆ្លើយតបទៅនឹងការប្រើអាវុធគីមីពីសំណាក់រដ្ឋាភិបាលអាសាដ។
សហរដ្ឋអាមេរិក និងរុស្ស៊ីបានផ្តោះប្តូរការព្រមានអំពីការវាយប្រហារគីមី នៅក្នុងប្រទេសស៊ីរី និងការអន្តរាគមន៍ផ្នែកយោធារបស់លោកខាងលិច ក្នុងការឆ្លើយតបមួយ ដែលជាព្រឹត្តិការណ៍មួយនៃយុទ្ធនាការសម្រេចចិត្តលើសង្គ្រាមមជ្ឈមបូព៌ា។
ភាពតានតឹងរវាងមហាអំណាចនុយក្លេអ៊ែរទាំងពីរ បានផ្ទុះឡើង បន្ទាប់ពីទីប្រឹក្សាសន្តិសុខជាតិសហរដ្ឋអាមេរិកលោក John Bolton បានប្រាប់សមភាគីរុស្ស៊ី លោក Nikolai Patrushev ថា សហរដ្ឋអាមេរិកមានព័ត៌មានថាប្រធានាធិបតីស៊ីរី លោក Bashar al-Assad ប្រហែលជាកំពុងប្រើប្រាស់អាវុធគីមី ដើម្បី ដណ្ដើមយកភាគពាយព្យនៃខេត្ត Idlib ពីពួកឧទ្ទាមមកវិញ។
ដោយឡែក ក្រសួងការពារជាតិរបស់រុស្ស៊ីបានធ្វើការវាយប្រហារទៅលើសហរដ្ឋអាមេរិកកាលពីថ្ងៃសៅរ៍ ដោយចោទប្រកាន់អាមេរិកថា បានសហការជាមួយក្រុមឧទ្ទាមដែលមានទំនាក់ទំនងជាមួយក្រុមអាល់កៃដា ក្នុងការរៀបចំឧបទ្ទវហេតុមួយ ដែលអាចជាហេតុផលសម្រាប់បើកការវាយប្រហារមួយផ្សេងទៀតទៅលើរដ្ឋាភិបាលអាសាដ។
សូមរំឭកថា កាលពីខែមេសាឆ្នាំ ២០១៧ និងមួយឆ្នាំក្រោយមកសហរដ្ឋអាមេរិកបានធ្វើការវាយប្រហារតាមផ្លូវអាកាស ដោយបាញ់គ្រាប់មីស៊ីលតូម៉ាហកចំនួនជាង ១០០គ្រាប់ ដើម្បីធ្វើការឆ្លើយតបទៅនឹងការវាយប្រហារដោយប្រើអាវុធគីមីពីសំណាក់រដ្ឋាភិបាលអាសាដ។ លោក Bolton បាននិយាយថា ជំហររបស់សហរដ្ឋអាមេរិកលើកនេះនឹងកាន់តែខ្លាំងជាងលើកមុនទៅទៀត។
ខណៈដែលសម្ព័ន្ធមិត្តអាសាដ - មានរុស្ស៊ី និងអ៊ីរ៉ង់បានទទួលបានអត្ថប្រយោជន៍ដ៏ច្បាស់លាស់ លើក្រុមឧទ្ទាមដែលគាំទ្រដោយលោកខាងលិច គោលដៅរបស់សហរដ្ឋអាមេរិកនៅក្នុងប្រទេសស៊ីរីត្រូវបានផ្លាស់ប្តូរ។ រដ្ឋបាលលោកប្រធានាធិបតី ដូណលត្រាំ ដូចទៅនឹងសម្ព័ន្ធមិត្តរបស់ខ្លួន នៅក្នុងទ្វីបអឺរ៉ុប និងឈូងសមុទ្របានបោះបង់ចោលនូវគោលដៅក្នុងការការផ្តួលរំលំមេដឹកនាំស៊ីរី។ ប៉ុន្តែឥឡូវនេះ អ្វីដែលអាមេរិកចង់បានគឺការដកចេញនូវកងទ័ពអ៊ីរ៉ង់ពីប្រទេសស៊ីរី។ បើតាមការចរចាទីក្រុងហ្សឺណែវ អាមេរិកនឹងមិនដកទ័ពចេញពីស៊ីរីនោះទេ លុះត្រាតែអ៊ីរ៉ង់លែងមានវត្តមានទ័ពនៅក្នុងប្រទេសនេះ៕DNT-NEWS
Home ព្រឹត្តិការណ៍ថ្មីៗ រុស្ស៊ី បញ្ជូននាវាពិឃាតរបស់ខ្លួនទៅកាន់ឆ្នេរស៊ីរី ខណៈដែលអាមេរិកត្រូវបានគេរាយការណ៍ថា កំពុងតែរៀបចំផែនការវាយប្រហារទៅលើរដ្ឋាភិបាលស៊ីរី