កាលពីពេលថ្មីៗនេះ ក្រុមហ៊ុន Facebook បានប្រកាសថា ខ្លួនបានសម្រេចចិត្តលុបចោលគណនី Facebook និង Instagram របស់ក្រុមមន្ត្រីយោធាមីយ៉ាន់ម៉ាជាន់ខ្ពស់មួយចំនួន ក្នុងគោលបំណងទប់ស្កាត់ការរីករាលដាលនៃព័ត៌មានមិនពិត បន្ទាប់ពី ការត្រួតពិនិត្យឡើងវិញនូវខ្លឹមសារ ដែលមន្ត្រីយោធាទាំងនោះបានបង្ហោះនាពេលកន្លងមក។
ក្នុងការបិទនេះ មានគណនីមួយជារបស់មេបញ្ជាការកំពូលកងទ័ពមីយ៉ាន់ម៉ាគឺលោក Min Aung Hlaing។ Facebook បានបញ្ជាក់ថា ចំនួនគណនីសរុបដែលត្រូវលុបចោល មាន ១៨គណនី ទំព័រ Facebook មាន ៥២ ព្រមទាំងគណនី Instagram ចំនួន ១គណនី។ គណនី និងទំព័រ Facebook សរុបទាំងនេះ មានចំនួនអ្នក Follower ជិត ១២លាននាក់។
គួរបញ្ជាក់ថា ក្រុមហ៊ុន Facebook បានលុបចោលគណនីសរុបចំនួន ១៨, Instagram មួយ និង Facebook Page ចំនួន ៥២ ដែលមានអ្នក Follow ជិត ១២លាននាក់។ មិនតែប៉ុណ្ណោះក្នុងចំណោមគណនីទាំងនេះ ក៏មានទាំងគណនី Facebook របស់ប្រមុខយោធាមីយ៉ាន់ម៉ា លោក មីនអ៊ុង ហ្លេង (Min Aung Hlaing) ផងដែរ។
កាលពីកន្លងមកក្រុមហ៊ុនហ្វេសប៊ុក ក៏ធ្លាប់បានប្រកាសបិទគណនីរាប់រយ ដែលមានជាប់ទាក់ទងជាមួយស្ថាប័នផ្សព្វផ្សាយរដ្ឋអ៊ីរ៉ង់ ហើយនិងទីភ្នាក់ងារស៊ើបការណ៍ សម្ងាត់រុស្ស៊ី។ តាមស្ថាបនិករបស់ហ្វេសប៊ុក លោកMark Zuckerberg ទំព័រហ្វេសប៊ុករបស់បុគ្គល ឬជាក្រុម នៅប្រទេសអ៊ីរ៉ង់ និងរុស្ស៊ី កំពុង ផ្សព្វផ្សាយព័ត៌មានមិនពិត ទាក់ទងនឹងសហរដ្ឋអាមេរិក អង់គ្លេស អាមេរិកឡាទីន ហើយនិងប្រទេសនៅតំបន់ដើមបូព៌ា៕
