សារព័ត៌មាន News Week បានចេញផ្សាយនៅថ្ងៃទី២៨ សីហា ២០១៨នេះថា រុស្ស៊ី និងចិនបានចាប់ផ្តើមធ្វើសមយុទ្ធរួមគ្នា ដើម្បីពង្រឹងចំណងទំនាក់ទំនងផ្នែកយោធារួមគ្នា ស្របពេលដែលអាមេរិកកំពុងតែព្យាយាមប្រជែងទៅនឹងការងើបឡើងវិញនៃភាពជាមហាយក្សរបស់ពួកគេ។
កងទ័ពរំដោះប្រជាជនចិន និងកងទ័ពរុស្ស៊ីរួមទាំងកងទ័ពមកពីបណ្តាប្រទេសចំនួយ ៦ផ្សេងទៀត កំពុងតែធ្វើការហ្វឹកហាត់រួមគ្នាជាលើកដំបូងនៅក្នុងសមយុទ្ធប្រឆាំងទៅនឹងភេរវកម្ម ដែលហៅថា « Peace Mission 2018» ឬបេសកកម្មសន្តិភាព ២០១៨ ដែលធ្វើឡើងនៅក្នុងក្របខណ្ឌនៃអង្គការសហប្រតិបត្តិការសៀងហៃ។ ក្រុមប្រទេសចំនួន ៨នេះបានធ្វើសមយុទ្ធចំនួន ៦ដង មុនសមយុទ្ធលើកនេះ ប៉ុន្តែនេះគឺជាលើកទីមួយហើយ ដែលមានការចូលរួមពីប្រទេសគូសត្រូវឥណ្ឌា និងប៉ាគីស្ថានបែបនេះ។ សមយុទ្ធនេះបានចាប់ផ្តើមធ្វើឡើងកាលពីចុងសប្តាហ៍មុនមកម្ល៉េះ។
កាសែត Asia Times បានរាយការណ៍កាលពីថ្ងៃពុធថា ចាប់តាំងពីថ្ងៃចុងខែសីហានេះ រហូតដល់ពាក់កណ្តាលខែកញ្ញា ទាហានមកពីកងទ័ពរំដោះប្រជាជនចិនប្រមាណ ៣.២០០នាក់ នឹងត្រូវធ្វើការហ្វឹកហាត់រួមគ្នាជាមួយកងទ័ពរុស្ស៊ី និងកងទ័ពមុងហ្គោល។ យោងតាមរបាយការណ៍បានឲ្យដឹងថា ការដាក់ពង្រាយនៃទាហានចិនបញ្ហាញពីនិមិត្តសញ្ញាភ័ស្តុតាងសម្ងាត់នៃកិច្ចសហប្រតិបត្តិការការពារជាតិរវាងទីក្រុងមូស្គូ និងទីក្រុងប៉េកាំង។
សហរដ្ឋអាមេរិកបានធ្វើការវាយប្រហារទៅលើប្រទេសរុស្ស៊ី ដែលជាគូប្រជែងរបស់ខ្លួនតាមរយៈទណ្ឌកម្មទៅលើប្រទេសនេះ បន្ទាប់ពីបានចោទប្រកាន់ប្រទេសនេះអំពីការចូលជ្រៀតជ្រែតបោះឆ្នោតផ្ទៃក្នុងរបស់ប្រទេសនេះ ដោយបានកាត់យកតំបន់គ្រីមៀជាឧបសម្ព័ន្ធរបស់ខ្លួន និងការបំពុលសម្លាប់ទៅលើអតីតចារកម្មរបស់ខ្លួននៅក្នុងទីក្រុងសាលីសប៊ឺរី ប្រទេសអង់គ្លេស។ ថ្មីៗកន្លងទៅនេះ សហរដ្ឋអាមេរិកបានបន្តដាក់គំនាបតាមរយៈទណ្ឌកម្មរបស់ខ្លួនទៅលើប្រទេសរុស្ស៊ីបន្តទៀត។
ការរឹតត្បិតផ្នែកសេដ្ឋកិច្ចនេះ បានញ៉ាំងឲ្យស្ថានទូតរុស្ស៊ីប្រចាំនៅសហរដ្ឋអាមេរិកថ្លែងថា សេនារីយ៉ូសង្គ្រាមត្រជាក់ ដែលគួរត្រូវបានពិភពលោកបោះបង់ចោល ក្នុងរយៈពេល ៣០ឆ្នាំកន្លងទៅនេះ ឥឡូវនេះកំពុងតែវិវត្តន៍បន្តហើយ។
ស្រដៀងគ្នានេះ ក្រសួងការពារជាតិចិនបានអំពាវនាវឱ្យសហរដ្ឋអាមេរិកបោះបង់ចោលស្មារតីនៃសង្គ្រាមត្រជាក់បន្ទាប់ពីមន្ទីរបញ្ចកោណចេញផ្សាយរបាយការណ៍ដែលបង្ហាញពីការកើនឡើងផ្នែកយោធា និងសេដ្ឋកិច្ចរបស់ទីក្រុងប៉េកាំងនាពេលថ្មីៗនេះថា ជាការមិនល្អសម្រាប់តំបន់នេះ៕DNT-NEWS
