កាលពីពេលថ្មីៗនេះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី បានចេញព្រះរាជក្រឹត្យត្រាស់បង្គាប់ឲ្យលើកលែងទោសអតីតសមាជិកអតីតបក្សសង្គ្រោះជាតិ ១៤ នាក់រួមទាំងលោក មាជ សុវណ្ណារ៉ា ផងដែរ ក្រោយមានសំណើពីសម្តេចនាយករដ្ឋមន្ត្រី ហ៊ុន សែន។ សមាជិកបក្សប្រឆាំងទាំងនោះ ត្រូវបានដោះលែងកាលពីយប់ម្សិលមិញនេះ។
អតីតសមាជិកបក្សប្រឆាំងទាំង១៤រូប ដែលត្រូវបានលើកលែងទោសនេះរួមមាន៖
១៖ ឈ្មោះ មាជ សុវណ្ណារ៉ា ភេទប្រុស អាយុ៤៦ឆ្នាំ
២៖ ឈ្មោះ អឿ ណារិត ភេទប្រុស អាយុ៣៩ឆ្នាំ
៣៖ ឈ្មោះ ឃិន រឿន ហៅ ឃិន ជំរឿន ភេទប្រុស អាយុ៣២ឆ្នាំ
៤៖ ឈ្មោះ នាង សុឃុន ភេទប្រុស អាយុ ២៧ឆ្នាំ
៥៖ ឈ្មោះ សាន គឹមហេង ភេទប្រុស អាយុ ៣២ឆ្នាំ
៦៖ ឈ្មោះ ស៊ុំ ពុទ្ធី ភេទប្រុស អាយុ ៤៩ឆ្នាំ
៧៖ ឈ្មោះ កែ ឃីម ហៅ វិនឌី ភេទប្រុស អាយុ ៣៤ឆ្នាំ
៨៖ ឈ្មោះ ទេព ណារិន ភេទប្រុស អាយុ ២៩ឆ្នាំ
៩៖ ឈ្មោះ អាន បឋម ហៅ សុខុម ភេទប្រុស អាយុ ៣៥ឆ្នាំ
១០៖ ឈ្មោះ សាន សីហៈ ភេទប្រុស អាយុ ២៦ ឆ្នាំ
១១៖ ឈ្មោះ អ៊ុក ពេជ្រសំណាង ភេទប្រុស អាយុ ៥១ឆ្នាំ
១២៖ ឈ្មោះ រឿន ចិត្រា ភេទប្រុស អាយុ ៣៣ឆ្នាំ
១៣៖ ឈ្មោះ យន់ គឹមហួរ ភេទប្រុស អាយុ ២៨ឆ្នាំ
១៤៖ ឈ្មោះ យា ថុង ភេទប្រុស អាយុ ៤៣ឆ្នាំ
គួរបញ្ជាក់ដែរថាកាលពីពេលកន្លងមក លោក សុវណ្ណារ៉ា និងអតីតសកម្មជនគណបក្សសង្គ្រោះជាតិដែល ជាប់ក្នុងពន្ធនាគារធ្លាប់បានសរសេរលិខិតសុំទោសសម្តេច ហ៊ុន សែន ចុះថ្ងៃទី ២៤ ខែសីហាថា៖ «យើងខ្ញុំទាំងអស់គ្នាមានការសោកស្តាយចំពោះការចូលរួមបាតុកម្មនៅទីលានប្រជាធិបតេយ្យ (ក្បែរស្ពាននាគ) ដែលអាជ្ញាធរសម្រេចបិទបណ្តោះអាសន្នកាលពីថ្ងៃទី ១៥ ខែកក្កដា ឆ្នាំ ២០១៤ ដោយមិនបានពិចារណាឱ្យបានដិតដល់ដែលបានធ្វើឱ្យប៉ះពាល់យ៉ាងធ្ងន់ធ្ងរដល់សន្តិសុខ និងសណ្តាប់ធ្នាប់សង្គម»។
ក្នុងលិខិតនេះបន្តថាអ្នកទាំង ១១ មានការនឹករឭកដល់គ្រួសារ ឪពុកម្តាយចាស់ជរា ហើយកូនបោះបង់ចោលការសិក្សាដោយសារឪពុកជាប់ពន្ធនាគារ និងបាត់បង់ការងារបាត់បង់មុខរបររកស៊ី និងបាត់បង់ការរៀនសូត្របន្ត។ ជាមួយគ្នានេះលោក មាជ សុវណ្ណារ៉ា តាមរយៈលិខិតដដែលនេះបានសន្យាថា លោកនឹងដកបណ្តឹងគ្រប់ស្ថាប័ន ឬតុលាការគ្រប់ជាន់ថ្នាក់ទាំងអស់ទាំងជាតិ និងអន្តរជាតិដែលលោកបានដាក់កន្លងមក៕
