សារព័ត៌មាន CNN បានចេញផ្សាយនៅថ្ងៃទី៧ កញ្ញា ២០១៨នេះដោយបានប្រភពពីមន្ត្រីការពារសហរដ្ឋអាមេរិកថា រុស្ស៊ីបានព្រមានកងកម្លាំងយោធាសហរដ្ឋអាមេរិក២ ដងហើយកាលពីសប្តាហ៍មុនថា កងទ័ពរបស់ខ្លួនរួមជាមួយអង្គភាពនៃកងកម្លាំងអាសាដ កំពុងតែត្រៀមបើកការវាយប្រហារទៅលើតំបន់ ដែលកងទ័ពសហរដ្ឋអាមេរិក ១២ក្រុមកំពុងតែមានវត្តមាន។
រុស្ស៊ីបានអះអាងថា កងកម្លាំងក្រុមឧទ្ទាមត្រូវបានការពារដោយកងទ័ពសហរដ្ឋអាមេរិក។ ការប្រកាសបើកការវាយប្រហារទៅលើកងទ័ពសហរដ្ឋអាមេរិកពីសំណាក់ទីក្រុងមូស្គូនេះ បានធ្វើឲ្យមេបញ្ជាការសហរដ្ឋអាមេរិកបង្ហាញក្តីព្រួយបារម្ភរបស់ខ្លួនថា កងទ័ពសហរដ្ឋអាមេរិកនឹងស្ថិតក្នុងហានិភ័យមួយ ប្រសិនបើកងទ័ពរុស្ស៊ីធ្វើការរុលទៅមុខ។ ទន្ទឹមនឹងការលើកឡើងនូវក្តីព្រួយបារម្ភនេះដែរ សហរដ្ឋអាមេរិកបានចេញសេចក្តីព្រមានធ្ងន់ ៗ ទៅកាន់ទីក្រុងមូស្គូកុំឲ្យមកជែងជាមួយវត្តមានកងទ័ពសហរដ្ឋអាមេរិកឲ្យសោះ។
មន្ត្រីកងកម្លាំងសហរដ្ឋអាមេរិកជាច្រើនរូបបានប្រាប់សារព័ត៌មាន CNN ថា មជ្ឈមណ្ឌលដែលមានការជាប់ពាក់ព័ន្ធនានា ទៅនឹងក្រុមចម្រុះសហរដ្ឋអាមេរិកប្រឆាំងទៅនឹងក្រុម ISIS គឺមានមូលដ្ឋាននៅយោធភូមិ Tanf។ ជាប់ព្រំប្រទល់ជាមួយប្រទេសស៊ីរី ហ្ស័រដង់ និងប្រទេសអ៊ីរ៉ាក់ យោធភូមិ Tanf ត្រូវបានគេមើលឃើញថា គឺជាទីតាំងយុត្តិសាស្ត្រដ៏សំខាន់បំផុត ខណៈដែលសហរដ្ឋអាមេរិក និងរុស្ស៊ី រួមជាមួយអ៊ីរ៉ង់កំពុងតែប្រជែងឥទ្ធិពលនៅក្នុងប្រទេសនេះរៀងៗខ្លួន។
សិទ្ធការពារខ្លួន
សហរដ្ឋអាមេរិកមានការព្រួយបារម្ភថា រុស្ស៊ីអាចនឹងប្រើប្រាស់នូវយន្តហោះចម្បាំង ឬនាវាចម្បាំងនៅភាគខាងកើតនៃសមុទ្រមេឌីទែរ៉ាណេ ដើម្បីបើកការវាយប្រហារទៅលើអ្វីដែលគេហៅថា ជាក្រុមសកម្មប្រយុទ្ធ ដែលាអាចញ៉ាំងឲ្យមានការផ្ទុះអាវុធរវាងកងទ័ពសហរដ្ឋអាមេរិក វាយបកទៅលើកងកម្លាំងរុស្ស៊ីវិញ។ ប៉ុន្តែទោះបីជាយ៉ាងណាក៏ដោយ គិតមកទល់ពេលនេះ គេពុំទាន់ឃើញមានការបង្កើតនូវកងទ័ពរុស្ស៊ី នៅឡើយទេ។ ទីក្រុងវ៉ាស៊ីនតោននឹងមិនធ្វើការអត្ថាធិប្បាយយ៉ាងណានោះទេថា ទីក្រុងមូស្គូនឹងធ្វើការព្រមានបែបណាមកកាន់ទីក្រុងវ៉ាស៊ីនតោន។
ជាមួយគ្នានេះដែរ រដ្ឋមន្ត្រីការពារជាតិសហរដ្ឋអាមេរិក លោក ជីម ម៉ាទីស និងឧត្តមសេនីយ៍ជាន់ខ្ពស់សហរដ្ឋអាមេរិក លោក ចូសេហ្វ ដុនហ្វត ដែលជាប្រធានអគ្គសេនាធិការរួមរបស់អាមេរិកបានដឹងអំពីកិច្ចការសម្ងាត់ចុងក្រោយ។ អ្នកទាំងពីរបាននិយាយថា កងទ័ពសហរដ្ឋអាមេរិកនៅជួរមុខតែងមានសិទ្ធបើកការវាយប្រហារតបទៅវិញ ដើម្បីការពារខ្លួន ដោយមិនចាំបាច់សុំការអនុញ្ញាតពីថ្នាក់លើនោះទេ។
មន្ត្រីការពារជាតិសហរដ្ឋអាមេរិកទាំងនោះបាននិយាយថា «សហរដ្ឋអាមេរិកមិនស្វែងរកនូវការប្រយុទ្ធជាមួយរដ្ឋាភិបាលស៊ីរី ឬក្រុមណាមួយនោះទេ។ ប៉ុន្តែបើមានការវាយប្រហារមកលើសហរដ្ឋអាមេរិក សហរដ្ឋអាមេរិកមិនរារែកក្នុងការប្រើកម្លាំងការពារខ្លួន ក្រុមចម្រុះ ឬកម្លាំងដៃគូរបស់ខ្លួននោះទេ»។
មន្ត្រីអាមេរិកបានចង្អុលបង្ហាញថា ការតវ៉ាមិសុខចិត្តទៅនឹងវត្តមានរបស់ក្រុមអាល់កៃដា ឬក្រុមអាយស៊ីសពីសំណាក់រុស្ស៊ី នៅក្នុងតំបន់ទ្រនាប់នេះ មិនមែនជារឿងថ្មីនោះទេ។ ប៉ុន្តែការវាយប្រហារថ្មីរបស់អាសាដដែលមានរុស្ស៊ីនៅពីក្រោយខ្នង ដែលគ្រោងនឹងបើកការវាយប្រហារទៅលើខេត្តអ៊ីដលីប ទើបជារឿងគួរឲ្យព្រួយបារម្ភ ដោយសារតែទីក្រុងមូស្គូមើលឃើញថា គឺជាឱកាសមាសឱកាសប្រាក់ ក្នុងការចាប់ផ្តើមប្រតិបត្តិការ។
សូមបញ្ជាក់ថា គិតត្រឹមថ្ងៃទី៧ កញ្ញានេះ កងទ័ពស៊ីរីបានដណ្តើមទីសំខាន់ពីក្រុមឧទ្ទាមអស់ហើយ។ ហើយកងទ័ពអាសាដកំពុងតែឡោមព័ទ្ធ និងគ្រោងបើកការវាយផ្តាច់ ដើម្បីដណ្តើមយកមូលដ្ឋានចុងក្រោយមកគ្រប់គ្រងវិញ។ នៅក្នុងប្រតិបត្តិការនេះ មានកងទ័ពរុស្ស៊ី និងអ៊ីរ៉ង់កំពុងនាំមុខ និងឡោមព័ទ្ធវាយប្រហារទៅក្រុមឧទ្ទាម៕
Home ព្រឹត្តិការណ៍ថ្មីៗ រុស្ស៊ីព្រមានបើកការវាយប្រហារទៅលើកងទ័ពសហរដ្ឋអាមេរិកនៅក្នុងប្រទេសស៊ីរី