ប្រធានាធិបតីសហរដ្ឋអាមេរិក លោក ដូ ណលត្រាំ និងប្រធានាធិបតីកូរ៉េខាងត្បូង លោកមូន ជេអ៊ីនបានចុះកិច្ចព្រមព្រៀងដ៏ធំមួយនៃរបៀបវីរពាណិជ្ជកម្មរបស់លោកត្រាំ ក្នុងពេលដ៏មមាញឹកមួយនៅមហាសន្និបាតអង្គការសហប្រជាជាតិ។ ក្នុងពេលជាមួយគ្នានេះដែរ លោកត្រាំក៏បានលើកឡើងអំពីជំនួបកំពូល ដែលលោកនឹងជួបគ្នាជាមួយប្រមុខដឹកនាំកូរ៉េខាងជើង លោក គីម ចុងអ៊ុនក្នុងពេលឆាប់ៗនេះផងដែរ។
ប្រធានាធិបតីសហរដ្ឋអាមេរិក និងប្រធានាធិបតីកូរ៉េខាងត្បូងបានចុះកិច្ចព្រមព្រៀងទៅលើកិច្ចព្រមព្រៀងពាណិជ្ជកម្មសេរីអាមេរិកកូរ៉េខាងត្បូង ដែលមានស្រាប់ដោយបានធ្វើបច្ចុប្បន្នភាពទៅលើកិច្ចព្រមព្រៀងនោះបន្ថែម។ លោកត្រាំបានហៅទង្វើនោះថា គឺជាកិច្ចព្រមព្រៀងដ៏ធំមួយ ហើយលោកបន្តថា កិច្ចព្រមព្រៀងថ្មីនេះ នឹងធ្វើការអភិវឌ្ឍយ៉ាងខ្ឡាំងក្លា ដើម្បីកាត់បន្ថយឳនភាពពាណិជ្ជកម្មរវាងប្រទេសទាំងពីរ និងបង្កើតឱកាសថ្មី ដើម្បីនាំចេញនូវផលិតផលអាមេរិកាំងទៅកាន់កូរ៉េខាងត្បូង។
លោកត្រាំថា «កិច្ចព្រមព្រៀងនេះនឹងកាត់បន្ថយការិយាធិបតេយ្យ និងបង្កើនភាពវិបុលភាពនៅក្នុងប្រទេសទាំងពីររបស់យើង។ កម្មករនៅកូរ៉េខាងត្បូង និងអាមេរិកនឹងស្វែងរកអតិថិជនថ្មី និងឱកាសថ្មី ដើម្បីពង្រីកខ្លួន និងរីកចម្រើន។ លោកបន្តថា ក្រុមការងាររបស់យើងនឹងធ្វើការដើម្បីធានាថា កិច្ចព្រមព្រៀងដ៏ធំនេះ ត្រូវបានអនុវត្តន៍តាម»។
ក្នុងអំឡុងពេលបង្ហាញខ្លួនជាមួយ លោក មូន លោកត្រាំក៏បានលើកឡើងពីក្តីសង្ឃឹម នៅឯអង្គការសហប្រជាជាតិកាលពីថ្ងៃចន្ទផងដែរថា ជំនួបលើកទីពីរជាមួយលោកគីម ជុងអ៊ុន អាចកើតមានក្នុងពេលឆាប់ៗនេះ បន្ទាប់ពីកាលពីឆ្នាំមុន លោកធ្លាប់បានហៅលោកគីមថា បុរគ្រាប់រ៉ុក្កែតដ៏តូច និងធ្លាប់គម្រាមកម្ទេចប្រទេសកូរ៉េខាងជើងផងដែរ។ លោកត្រាំសរសើរលោកគីមថា បើកចិត្តទូលាយ និងអស្ចារ្យ ខណៈដែលភាពធូរស្រាលផ្នែកនយោបាយ បានរីកចម្រើនគួរឲ្យកត់សម្គាល់៕DNT-NEWS
Home ព្រឹត្តិការណ៍ថ្មីៗ លោកត្រាំ ចុះកិច្ចព្រមព្រៀងពាណិជ្ជកម្មដ៏ធំជាមួយកូរ៉េខាងត្បូង និងបង្ហាញអំពីជំនួបជាមួយប្រមុខដឹកនាំកូរ៉េខាងជើងក្នុងពេលឆាប់ៗខាងមុខនេះ