សារព័ត៌មាន ABC អូស្ត្រាលីបានចេញផ្សាយនៅថ្ងៃទី៣ តុលា ២០១៨នេះថា បេសកជនសហរដ្ឋអាមេរិកប្រចាំនៅអង្គការសហប្រជាជាតិ បានព្រមានធ្ងន់ៗទៅកាន់រុស្ស៊ីថា រុស្ស៊ីត្រូវតែបញ្ឈប់កាអភិវឌ្ឍន៍ប្រព័ន្ធមីស៊ីល ដែលត្រូវបានហាមឃាត់ បើមិនដូច្នោះទេសហរដ្ឋអាមេរិកនឹងវាយកម្ទេចចោល មុនពេលដែលពួកវាត្រូវបានដាក់ប្រតិបត្តិការ។
សហរដ្ឋអាមេរិកជឿថា រុស្ស៊ីបានរំលោភលើសន្ធិសញ្ញាសង្គ្រាមត្រជាក់ ដោយអភិវឌ្ឍន៍ប្រព័ន្ធបាញ់មីស៊ីលដែលបាញ់ពីដីទៅអាកាស ដែលប្រព័ន្ធព័ន្ធនេះអាចធ្វើឲ្យរុស្ស៊ីមានសមត្ថភាពអាចបើកការវាយប្រហារទៅលើបណ្តាប្រទេសអ៊ឺរ៉ុប និងសហរដ្ឋអាមេរិកបាន។ យ៉ាងណាក៏ដោយ ការចោទប្រកាន់នេះ ត្រូវបានទាត់ចោលដោយរុស្ស៊ី។
ឯកអគ្គរដ្ឋទូតសហរដ្ឋអាមេរិកប្រចាំអង្គណាតូ លោក ស្រី Kay Bailey Hutchison បាននិយាយថា ទីក្រុងវ៉ាស៊ីនតោននៅតែប្តេជ្ញាចិត្តក្នុងការរកដំណោះស្រាយតាមរយៈការទូត ប៉ុន្តែខ្លួនក៏បានត្រៀមខ្លួនរួចហើយដែរ ដើម្បីពិចារណាបើកការវាយប្រហារកម្ទេចគ្រាប់មីស៊ីល ដែលរុស្ស៊ីកំពុងបន្តអភិវឌ្ឍន៍ប្រព័ន្ធមីស៊ីលរយៈចម្ងាយមធ្យម។
លោកស្រីបានប្រាប់សន្និសីទ្នសារព័ត៌មានថា «នៅត្រង់ចំណុចនេះ យើងកំពុងស្វែងរកមើលនូវលទ្ធភាពក្នុងការវាយប្រហារប្រហារទៅលើគ្រាប់មីស៊ីលរុស្ស៊ី ដែលអាចវាយប្រហារដល់ប្រទេសរបស់យើង និងបណ្តាប្រទេសដទៃទៀត»។ ប៉ុន្តែក្រោយមក លោកស្រី Hutchinson បានបង្ហោះនៅលើបណ្តាញធ្វីតតឺម្តងទៀត ដើម្បីបញញជាក់អះអាងថា លោកស្រីមិនបានមានន័យថា សហរដ្ឋអាមេរិកនឹងវាយប្រហារទៅលើរុស្ស៊ីនោះទេ។
លោកស្រីបាននិយាយថា ប្រទេសរុស្ស៊ីត្រូវតែគោរពតាមសន្ធិសញ្ញានេះ បើមិនដូច្នោះទេ យើងនឹងត្រូវផ្គូរផ្គងសមត្ថភាព ដើម្បីការពារផលប្រយោជន៍សហរដ្ឋអាមេរិក និងផលប្រយោជន៍អង្គការណាតូ។ លោកស្រីបានបន្ថែមថា ស្ថានការណ៍បច្ចុប្បន្ននេះមិនអាចទទួលយកបាននោះទេ។
ឆ្លើយតបទៅនឹងការលើកឡើងរបស់លោកស្រី Hutchinson ក្រសួងការបរទេសរុស្ស៊ីបាននិយាយថាខ្លួនបានចាត់ទុកសេចក្តីថ្លែងរបស់លោកស្រី Hutchison ថា គឺជារឿងដ៏គ្រោះថ្នាក់។ ក្រសួងការបរទេសរុស្ស៊ីបន្តថា ការនិយាយស្តីបែបនេះ មិនស្គាល់ពីកម្រិតនៃទំនួលខុសត្រូវ និងជាវោហាសាស្ត្រកោងកាច។ នេះបើតាមលោកស្រី Maria Zakharova ដែលជាអ្នកនាំពាក្យក្រសួងការបរទេសរុស្ស៊ី។
ប្រធានាធិបតីរុស្ស៊ីលោកវ្លាឌីមៀរពូទីនកាលពីដើមឆ្នាំនេះបាននិយាយថា ប្រទេសរបស់លោកមានអាវុធនុយក្លេអ៊ែរស៊េរីថ្មីដ៏ទំនើប ដែលធ្វើឲ្យប្រព័ន្ធការពារមីស៊ីលរបស់អង្គការណាតូគ្មានប្រយោជន៍។ លោកបានបន្ថែមថា មីស៊ីលទាំងនោះរួមមាន គ្រាប់មីស៊ីលដើរដោយថាមពលនុយក្លេអ៊ែរ និងដ្រូនបើកក្រោមទឹកដើរដោយថាមពលនុយក្លេអ៊ែរ និងគ្រាប់មីស៊ីលល្បឿនលឿនផងដែរ។ ជាមួយគ្នានេះ រដ្ឋបាលលោកត្រាំបាននិយាយថា ខ្លួនបានត្រៀមខ្លួនរួចរាល់ទាំងស្រុងហើយសម្រាប់គ្រាប់មីស៊ីលទាំងនោះ និងបានចោទថា រុស្ស៊ីបានរំលោភលើសន្ធិសញ្ញានុយក្លេអ៊ែរ។
កាលពីប៉ុន្មានខែមុន ចំពេលដែលរុស្ស៊ីបង្កើនសមត្ថភាពនុយក្លេអ៊ែររបស់ខ្លួន លោកត្រាំបានប្រកាសអំពីការពង្រឹងម។នុយក្លេអ៊ែរទាំងបីរបស់ខ្លួនផងដែរ។ នៅឆ្នាំ ២០១៩ក្រោយ អាមេរិកនឹងមានក្រុមអ្នកប្រយុទ្ធនាវាផ្ទុកយន្តហោះទម្លាក់គ្រាប់បែក ២ក្រុមបន្ថែមទៀត ដើម្នបីជែងជាមួយរុស្ស៊ី ដែលមានតែមួយក្រុម ខណៈដែលអាមេរិកមាន ១២ក្រុម។ អ្នកវិភាគមានមន្ទិលអំពីសមត្ថភាពរុស្ស៊ី ក្នុងការវាយប្រហារទៅលើអាមេរិក ខណៈដែលកម្លាំងទ័ពទឹកប្រទេសនេះ ខ្សោយជាងអាមេរិក។ រុស្ស៊ីខ្លាំងខាងមីស៊ីល ប៉ុន្តែរុស្ស៊ីអាចវាយអាមេរិកតាមណា បើសហរដ្ឋអាមេរិកមានខែលការពារ THAAD ជាច្រើនគ្រប់ជ្រុង។ អ្នកជំនាញយោធាបាននិយាយថា ប្រទេសដែលអាចធ្វើជាមហាអំណាចយោធា និងសមទទួលបានជាប្រទេសខ្លាំងខាងយោធា លុះត្រាតែប្រទេសនោះខ្លាំងខាងកងទ័ពជើងទឹក និងទ័ពអាកាស។ សូមបញ្ជាក់ថា បច្ចុប្បន្នេះ អាមេរិកមាននាវាផ្ទុកយន្តហោះ ១២ក្រុម រីឯរុស្ស៊ីមាន ១ក្រុម ហើយយន្តហោះចម្បាំងអាមេរិកមានច្រើនជាងរុស្ស៊ី រាប់ពាន់គ្រឿងឯណោះ៕ DNT-NEWS
Home ព្រឹត្តិការណ៍ថ្មីៗ សហរដ្ឋអាមេរិកត្រៀមបើកការវាយកម្ទេចគ្រាប់គ្រាប់មីស៊ីលរុស្ស៊ី ប្រសិនបើរុស្ស៊ីនៅតែបន្តផលិតដោយរំលោភលើសន្ធិសញ្ញានុយក្លេអ៊ែរ