សារព័ត៌មាន BBC បានចេញផ្សាយនៅថ្ងៃទី១៩ តុលា ២០១៨នេះថា លោកប្រធានាធិបតីសហរដ្ឋអាមេរិក ដូ ណលត្រាំបានគម្រាមប្រើប្រាស់កម្លាំងយោធា ដើម្បីបិទច្រកព្រំដែនអាមេរិក ម៉ិកស៊ីក។
ការព្រមានធ្ងន់របស់លោកត្រាំនៅលើបណ្តាញធ្វីតតឺកាលពីថ្ងៃព្រហស្បតិ៍ម្សិលមិញ បានធ្វើឡើងខណៈដែលមានក្រុមអន្តោប្រវេសន៍ជា ៣ពាន់នាក់មកពីប្រទេសអែលសាវ៉ាឌ័រ ហុងឌូរ៉ាស់ និងហ្កូតេម៉ាឡា បានបោះពួយសម្តៅទៅកាន់ភាគខាងជើងសហរដ្ឋអាមេរិក។
ទន្ទឹមនេះដែរ លោកត្រាំក៏បានគម្រាមកាត់ផ្តាច់ជំនួយទៅកាន់ប្រទេសទាំង ៣នេះផងដែរជុំវិញករណីអន្តោប្រវេសន៍នេះ។
កាលពីពេលកន្លងទៅនេះ លោកត្រាំបានគម្រាមកាត់ផ្តាច់ជំនួយទៅកាន់ប្រទេសហុងឌូរ៉ាស់រួចមកហើយ។ កាលឆ្នាំ ២០១៦ និង ២០១៧ អាមេរិកផ្តល់ជំនួយជាង ១៧៥លានដុល្លារទៅឲ្យប្រទេសនេះ។ នេះបើតាមទីភ្នាក់ងារអភិវឌ្ឍន៍ជាតិអាមេរិក។ ក្រុមជនអន្តោប្រវេសន៍អាមេរិកកណ្តាលមានភាពប្រាកដថា ពួកគេកំពុងធ្វើដំណើរទៅកាន់សហរដ្ឋអាមេរិក។
ចាប់តាំងពីលោកបានស្ថិតនៅក្នុងយុទ្ធនាការឃោសនារកសម្លេងឆ្នោតមក លោកត្រាំធ្វើការវាយប្រហារយ៉ាងខ្លាំងទៅនឹងក្រុមអន្តោប្រវេសន៍ខុសច្បាប់ ហើយក្រុមអន្តោប្រវេសន៍អាមេរិកចុងក្រោយនេះ បានធ្វើឡើងក្រោយការបង្ក្រាបទៅលើក្រុមអន្តរោប្រវេសន៍ នៅតាមខ្សែបន្ទាត់ព្រំដែនអាមេរិកម៉ិកស៊ីកូ។
ការគម្រាមកំហែងរបស់លោកត្រាំនេះ បានធ្វើឡើងត្រឹមតែប៉ុន្មានសប្តាហ៍តែប៉ុណ្ណោះ មុនកាបោះឆ្នោតពាក់កណ្តាលឆមាស នៅថ្ងៃទី៦ វិច្ឆិកាខាងមុខ។ មតិរបស់លោកត្រាំថ្មីៗនេះ ត្រូវបានគេមើលឃើញថា គឺជាកិច្ចខិតខំប្រឹងប្រែង ក្នុងការជម្រុញនូវការគាំទ្រតាមរយៈការបង្ក្រាបលើក្រុមអន្តោរប្រវេសន៍នេះ។
សារព័ត៌មាន Associated Press បានរាយការណ៍ថា ជនអន្តោប្រវេសន៍ជាច្រើនមិនមានលិខិតឆ្លងដែននោះទេ ហើយបានប្រើប្រាស់អត្តសញ្ញាណប័ណ្ណជាតិ ដែលអនុញ្ញាតឱ្យពួកគេធ្វើដំណើរបាននៅអាមេរិកកណ្តាល។ ជាយ៉ាងណាក៏ដោយ ម៉ិកស៊ិកតម្រូវឱ្យមានលិខិតឆ្លងដែននៅឯច្រកចេញចូល។
ក្រុមសិទ្ធិមនុស្សបានរិះគន់ចំពោះការឆ្លើយតបរបស់អាមេរិក និងម៉ិកស៊ិកទៅលើក្រុមមនុស្សទាំងនោះ។
លោកស្រី Erika Guevara-Rosas នៃអង្គការលើកលែងទោសអន្តរជាតិបាននិយាយនៅក្នុងសេចក្តីថ្លែងការណ៍មួយថា «អាជ្ញាធរម៉ិកស៊ិកមិនគួរប្រើវិធីសាស្ត្ររបស់លោកត្រាំ ធ្វើដាក់ក្រុមអន្តោរប្រវេសដូចជាការគម្រាមកំហែងផ្នែកសន្តិសុខនោះទេ»។
«ក្រុមគ្រួសារទាំងនេះសមនឹងទទួលសេចក្តីថ្លៃថ្នូរ និងការគោរព ដើម្បីធានាថា គ្មាននរណាម្នាក់នឹងវិលត្រឡប់ទៅរកស្ថានភាព ដែលពួកគេអាចប្រឈមនឹងគ្រោះថ្នាក់ធ្ងន់ធ្ងរ ដោយសារអំពើហិង្សានោះទេ៕
Home ព្រឹត្តិការណ៍ថ្មីៗ លោកត្រាំគម្រាមប្រើកម្លាំងយោធា ដើម្បីបិទច្រកព្រំដែនអាមេរិក-ម៉ិកស៊ីក