សមាជិកព្រឹទ្ធសភាសហរដ្ឋអាមេរិក លោក Ted Cruzបាននិយាយការពារទុកមុនថា កងទ័ពអវកាសរបស់លោកត្រាំ ត្រូវតែការពារយានអវកាសរបស់ខ្លួនពីក្រុមចោរប្លន់អវកាស ដែលការអះអាងបែបនេះ ទំនងជាចង់សំដៅលើការវាតទីអវកាសរបស់ចិន និងរុស្ស៊ី។
ថ្លែងកាលពីថ្ងៃពុធអំឡុងកិច្ចខិតខំប្រឹងប្រែងស្វែងរកមូលនិធិសម្រាប់បេសកកម្មលើដែនអវកាសរបស់កងទ័ពអវកាសរដ្ឋអាមេរិកនោះ លោក Cruzបានគូសបញ្ជាក់ពីលទ្ធភាពនៃ “ចោរប្លន់អវកាស” ដែលនឹងធ្វើឲ្យគ្រោះថ្នាក់ដល់បេសកកម្មនាពេលអនាគតរបស់អាមេរិក។
លោកបាននិយាយថា ចាប់តាំងពីក្រិកសម័យកាលបុរាណ បានធ្វើដំណើរតាមសមុទ្រលើកដំបូងគេរួចមក ប្រទេសជាច្រើន បានទទួលស្គាល់ពីភាពចាំបាច់របស់កងទ័ពជើងទឹក និងការរក្សាសមត្ថភាពកំពូលរបស់ពួកគេ ក្នុងការការពារការធ្វើដំណើរតាមសមុទ្រ។លោកបន្តថា ក្រុមចោរសមុទ្រ គំរាមកំហែងនៅក្នុងសមុទ្រ ហើយវាដូចគ្នានៅទីអវកាស។ តាមវិធីតែមួយនេះ លោកជឿថា យើងត្រូវតែទទួលស្គាល់ ភាពចាំបាច់នៃកម្លាំងអវកាស ដើម្បីការពារជាតិ និងការពារពាណិជ្ជកម្មអវកាស និងការរុករកលើទីអវកាសស៊ីវិល។
សូមបញ្ជាក់ថា ការបង្កើតកងទ័ពអវកាសសហរដ្ឋអាមេរិក ត្រូវបានគេប្រកាសឡើងកាលពីឆ្នាំ២០១៨ ដោយលោកប្រធានាធិបតី ដូណាល់ ត្រាំ ដោយមានគោលដៅការពារប្រទេសជាច្រើន ដូចជារុស្ស៊ី និងចិន ពីការឈានមុខគេនៅទីអវកាស។
បច្ចុប្បន្ននេះដែរ រដ្ឋបាលរបស់លោកដូណាល់ ត្រាំ បានស្វែងរកថវិកា២ពាន់លានដុល្លារ ដើម្បីបង្កើតកម្លាំងយោធាថ្មីមួយនេះនៅលើទីអវកាស ប៉ុន្តែគេនៅមិនទាន់ដឹងច្បាស់នោះទេថាតើអ្វីពិតប្រាកដ ដែលកងកម្លាំងមួយនេះ នឹងត្រូវធ្វើនៅរយៈពេលប៉ុន្មានឆ្នាំដំបូង៕
Home ព្រឹត្តិការណ៍ថ្មីៗ សភាជិសភាអាមេរិក ប្រកាសឲ្យដឹងពីគ្រោះថ្នាក់បង្កឡើងដោយក្រុមចោរប្លន់អវកាស