យន្តហោះដឹកអ្នកដំណើរ Boeing-737 Max ដែលបានធ្វើដំណើរទៅកាន់កោះ Bangka ជាមួយអ្នកដំណើរ ១៨៩នាក់ បានធ្លាក់នៅវេលាម៉ោង ៦: ៣៣នាទីព្រឹកម៉ោងក្នុងស្រុក កាលពីថ្ងៃចន្ទ បន្ទាប់ពីយន្តហោះនេះបានចាកចេញពីព្រលានយន្តហោះទីក្រុងចាកាតា។
ប្រធានគណៈកម្មាធិសុវត្ថិភាពដឹកជញ្ជូនជាតិឥណ្ឌូនេស៊ីបានប្រាប់ទីភ្នាក់ងារសារព័ត៌មាន AFP នៅថ្ងៃព្រហស្បតិ៍ទី១ វិច្ឆិកានេះថា ប្រអប់ខ្មៅមួយនៃយន្តហោះ Lion Air ត្រូវបានរកឃើញហើយ។
ប្រធានគណកម្មការរូបនោះបាននិយាយថា «យើងមិនទាន់ដឹងថា តើវាជាឧបករណ៍ថតទិន្នន័យជើងហោះហើរ ហៅថា Flight Data Recorder (FDR) ឬមួយក៏វាជាម៉ាស៊ីនថតសម្លេងកាប៊ីនខាងមុខ CVR នោះទេ។
គេហទំព័រព័ត៌មាន Detik News បានរាយការណ៍ថា ប្រអប់ខ្មៅត្រូវបានគេរកឃើញនៅជិតបំណែកយន្តហោះនៅជម្រៅ ៣០ ម៉ែត្រនៅក្រោមផ្ទៃទឹកស្ថិតនៅឆ្នេរខាងជើង នៃឥណ្ឌូនេស៊ី ជាទីដែលយន្តហោះនោះបានធ្លាក់កាលពីថ្ងៃចន្ទ។ យោងតាមបណ្តាញទូរទស្សឥណ្ឌូនេស៊ី Kompas TV ប្រអប់ខ្មៅនោះត្រូវទាញចេញពីផ្ទៃទឹកហើយ។ ការស្វែងរកនេះត្រូវបានបង្អាក់ដំណើរដោយសារតែចរន្តទឹកខ្លាំងពេក។
ជើងហោះហើរ JT610 នៃយន្តហោះដឹកអ្នកដំណើរ Lion Air បានដាច់ការទាក់ទងជាមួយបញ្ជាការគ្រប់គ្រងចរាចរណ៍នៅវេលាម៉ោង ៦: ៣៣នាទីព្រឹកម៉ោងក្នុងស្រុក កាលពីថ្ងៃចន្ទ បន្ទាប់ពីយន្តហោះនេះបានហោះឡើងភ្លាមៗចេញពីទីក្រុងចាកាតា។ យោងតាមប្រព័ន្ធផ្សព្វផ្សាយក្នុងស្រុកបានរាយការណ៍ថា នៅលើយន្តហោះនេះ មានមនុស្សសរុប ១៨៩នាក់៕