សារព័ត៌មាន CNN បានចេញផ្សាយនៅថ្ងៃទី៦ វិច្ឆិកា ២០១៨នេះដោយយោងតាមមន្ត្រីការពារជាតិអាមេរិកចំនួន ៣រូប និងសេចក្តីថ្លែងការណ៍ពីកងទ័ពជើងទឹកដែលបានឱ្យដឹងថា យន្តហោះឈ្លបយកការណ៍របស់កងទ័ពជើងទឹកសហរដ្ឋអាមេរិក ដែលកំពុងហោះហើរនៅលើដែនអាកាសអន្តរជាតិនៅលើសមុទ្រខ្មៅ ត្រូវបានស្ទាក់ដំណើរដោយយន្តហោះចម្បាំងរុស្ស៊ី កាលពីថ្ងៃចន្ទនៅក្នុងកាយវិការមួយ ដែលមិនមានវិជ្ជាជីវ និងគ្មានសុវត្ថិភាព។
នៅក្នុងការពើបប្រទះគ្នាមួយ ដែលអូសបន្លាយពេលដល់ទៅ ២៥នាទី យន្តហោះចម្បាំង Su-27 របស់រុស្ស៊ីបានហោះកាត់ដោយផ្ទាល់នៅចំពីមុខយន្តហោះចម្បាំងសហរដ្ឋអាមេរិក US EP-3 ក្នុងល្បឿនមួយយ៉ាងលឿន។ នេះបើតាមក្រុមមន្ត្រីដែលបាននិយាយ។ អ្នកបើកយន្តហោះសហរដ្ឋអាមេរិកបានរាយការណ៍អំពីសកម្មភាពដ៏គឃ្លើនរបស់រុស្ស៊ី ដែលបានហោះកាត់មុខខ្លួន។
យន្តហោះចម្បាំង Su-27 របស់រុស្ស៊ីនេះ បានហោះកាត់យន្តហោះចម្បាំងអាមេរិកពីរលើករួចមកហើយ និងបានបាញ់ចំហេះចេញពីកន្ទុយយន្តហោះរបស់ខ្លួន ដើម្បីឲ្យរំញ័រដល់យន្តហោះចម្បាំងអាមេរិក។
យោងតាមសេចក្តីថ្លែងការណ៍ពីកងទ័ពជើងទឹកសហរដ្ឋអាមេរិកបានឲ្យដឹងយ៉ាងដូច្នេះថា «ប្រតិបតិកម្មនេះត្រូវបានកំណត់ថាគ្មានសុវត្ថិភាព ដោយសារតែយន្តហោះចម្បាំង Su-27 បើកក្នុងល្បឿនមួយយ៉ាងលឿនហោះមកចំពីមុខយន្តហោះចម្បាំង ដែលធ្វើឲ្យអ្នកបើកយន្តហោះរបស់យើងស្ថិតក្នុងហានិភ័យ។ យន្តហោះស្ទាក់ដំណើរ Su-27 នេះបានធ្វើដំណើរឆ្លងកាត់បន្ថែមទៀត មកកាន់តែជិតយន្តហោះ EP-3 និងបានបាញ់ចំហេះពីគូទក្រោយរបស់វាមកលើយន្តហោះអាមេរិក។ អ្នកបើកយន្តហោះ EP-3 បានរាយការណ៍អំពីភាពមិនហ្នឹងនរ បន្ទាប់ពីប្រតិកម្មជាលើកដំបូង និងរាយការណ៍អំពីរំញ័រ ក្រោយប្រតិកម្មជាលើកទីពីរ ពីសំណាក់យន្តហោះរុស្ស៊ីនោះ»។
មកទល់ពេលនេះ ក្រុមមន្ត្រីមិនទាន់អាចប៉ាន់ស្មានបានទេថា តើយន្តហោះរបស់រុស្ស៊ីបានចូលកៀកទៅនឹងយន្តហោះចម្បាំងអាមេរិកខ្លាំងប៉ុណ្ណានោះទេ ប៉ុន្តែបានហៅឥរិបថរបស់រុស្ស៊ីថា គឺជាកត្តាដ៏សំខាន់ ក្នុងការកំណត់នូវការប្រឆាំងមកលើខ្លួនថា អសុវត្ថិភាព។
ការរាយការណ៍អំពីឥរិបថរបស់រុស្ស៊ីកាលពីមុន បានកើតឡើងក្នុងខែមករា នៅពេលដែលយន្តហោះចម្បាំងមកពីកងទ័ពជើងទឹកអាមេរិក ត្រូវបានស្ទាក់ដំណើរដោយយន្តហោះចម្បាំង Su-27 ដែលហោះក្នុងរយៈចម្ងាយត្រឹមតែ ១ម៉ែត្រ កន្លះតែប៉ុណ្ណោះ ដែលបានបង្ខំឲ្យយន្តហោះនោះធ្វើដំណើរទៅតាមគន្លងរបស់វា។ ក្រោយហេតុការណ៍នេះកើតឡើងក្រសួងការបរទេសសហរដ្ឋអាមេរិកបានធ្វើការចោទប្រកាន់រុស្ស៊ីថា បានរំលោភទៅលើកិច្ចព្រមព្រៀងដែលបានធ្វើកន្លងមក និងបានរំលោភលើច្បាប់អន្តរជាតិ៕
Home ព្រឹត្តិការណ៍ថ្មីៗ យន្តហោះចម្បាំងរុស្ស៊ីស្ទាក់ដំណើរយន្តហោះចម្បាំងអាមេរិក ខណៈដែលកំពុងធ្វើដំណើរនៅក្នុងតំបន់អន្តរជាតិ