សារព័ត៌មាន News Week បានចេញផ្សាយថា សហរដ្ឋអាមេរិកបានសម្តែងក្តីសង្ឃឹមថា អ៊ីស្រាអែលនឹងប្រឆាំងទៅនឹងប្រព័ន្ធការពារមីស៊ីលរបស់រុស្ស៊ី ដែលទើបត្រូវបានដាក់តម្លើងនៅក្នុងទឹកដីស៊ីរី ដើម្បីអាចបន្តការវាយប្រហាររបស់ខ្លួន ទៅលើគោលដៅអ៊ីរ៉ង់នៅក្នុងទឹកដីស៊ីរីបន្តទៀត។
លោក James Jeffrey ដែលជាបេសកជនរបស់ក្រុងវ៉ាស៊ីនតោនប្រចាំនៅស៊ីរី បានប្រាប់ក្រុមអ្នកសារព័ត៌មានកាលពីថ្ងៃពុធថា សហរដ្ឋអាមេរិកមានភាពប្រាកដទៅលើទំនាក់ទំនងយុទ្ធសាស្ត្រយុទ្ធសាស្ត្ររបស់អ៊ីស្រាអែល និងរុស្ស៊ី ដែលនឹងបន្តទៅមុខ បើទោះបីជាក្រោយហេតុការណ៍នៃការបាញ់ទម្លាក់យន្តហោះយោធារុស្ស៊ីក៏ដោយ។ យន្តហោះស៊ើបការ Il-20 ត្រូវបានបាញ់ទម្លាក់ដោយចៃដន្យដោយកងកម្លាំងការពារដែនអាកាសស៊ីរី ដែលបាញ់ច្រលំដៃ និងបាញ់មិនរើសមុខចំពេលដែលយន្តហោះចម្បាំងអ៊ីស្រាអែលចំនួន ៤គ្រឿងបានបើកការវាយប្រហារទៅលើមូលដ្ឋានទ័ពស៊ីរីព្រមគ្នា។ ក្រោយឧបត្តិហេតុនេះបានកើតឡើង រុស្ស៊ីបានបញ្ជូនខែលការពារមីស៊ីលប្រភេទ S-300 ទៅកាន់ប្រទេសស៊ីរី។
លោក Jeffrey បាននិយាយថា «យើងមានការព្រួយបារម្ភយ៉ាងខ្លាំងអំពីប្រព័ន្ធមីស៊ីល S-300 ដែលត្រូវបានដាក់ពង្រាយនៅក្នុងប្រទេសស៊ីរី។ បញ្ហានេះគឺស្ថិតនៅក្នុងកម្រិតនៃព័ត៌មានលម្អិត។ តើអ្នកណានឹងគ្រប់គ្រងវា ហើយតើវានឹងត្រូវដើរតួនាទីយ៉ាងដូចម្តេច?»។
អ៊ីស្រាអែល និងរុស្ស៊ីមានការខ្វែងគំនិតគ្នាជំវិញបញ្ហាដ៏ស្មុគ្រស្មាញ ដោយសារតែអ៊ីស្រាអែលនៅខាងភាគីអាមេរិក និងសម្ព័ន្ធមិត្តមួយចំនួនដូចជាកាតា តួកគី និងអារ៉ាប៊ីសាអូឌីត ដែលគាំទ្រក្រុមឧទ្ទាមប្រឆាំងរដ្ឋាភិបាលស៊ីរីចាប់តាំងពីឆ្នាំ ២០១១មក។ រីឯរុស្ស៊ី និងអ៊ីរ៉ង់វិញបានបញ្ជូនកងកម្លាំងរបស់ខ្លួនដោយផ្ទាល់ចូលជួយអន្តរាគមន៍កងទ័ពរដ្ឋាភិបាលអាសាដ ដែលដកចង្កាមាន់រៀបនឹងដាច់ខ្យល់ទៅហើយនោះ ឲ្យបន្តដង្ហើនជីវិតរបស់ខ្លួនមកទល់សព្វថ្ងៃនេះ ដោយប្រទេសស៊ីរីកាប់កាប់ដោយភាគីប្រដាប់អាវុធជាច្រើនប៉ែក។
ក្រុមកងទ័ពរដ្ឋាភិបាលស៊ីរី ជាមួយកងកម្លាំងអ៊ីរ៉ង់ និងកងកម្លាំងរុស្ស៊ីមួយប៉ែក សហរដ្ឋអាមេរិកនិងក្រុមឃើដ ជាមួយកងកម្លាំងប្រជាធិបតេយ្យស៊ីរី ដែលគ្រប់គ្រង់ធំប្រហាក់ប្រហែលនឹងកងទ័ពអាសាដមួយប៉ែក ក្រុមស៊ីរីសេរីដែលមានតួកគីជាខ្នងបង្អែកមួយប៉ែក និងក្រុមរដ្ឋអ៊ីស្លាមមួយចំនួនទៀត។
យូរៗម្តង ក្រុមស៊ីរីសេរីបានប៉ះទង្គិចជាមួយកងកម្លាំងអាសាដ ដែលកាលពីប៉ុន្មានខែមុន មានបំណងបើកការវាយផ្តាច់ ដើម្បីដណ្តើមយកខេត្តអ៊ីតលីបពីក្រុមបះបោរមកវិញ។ សង្គ្រាមក្នុងខេត្តអ៊ីតលីបត្រូវបានបញ្ចប់ ក្រោយមានការចុះកិច្ចព្រមព្រៀងគ្នា នៅក្នុងកិច្ចប្រជុំត្រីភាគី រវាងរុស្ស៊ី អ៊ីរ៉ង់ និងតួកគី៕
Home ព្រឹត្តិការណ៍ថ្មីៗ សហរដ្ឋអាមេរិកសង្ឃឹមថា អ៊ីស្រាអែលនឹងបន្តវាយប្រហារទៅលើប្រទេសស៊ីរីបន្តទៀត ប៉ុន្តែក៏មានការព្រួយបារម្ភអំពីគ្រាប់មីស៊ីលរបស់រុស្ស៊ីផងដែរ