ប៉ូលិសបារាំងបានប៉ះទង្គិចគ្នានឹងក្រុមបាតុករនៅទូទាំងប្រទេសរយៈពេល៨ថ្ងៃជាប់ៗគ្នាកាលពីថ្ងៃសៅរ៍ក្នុងខណៈពេលដែលមានហ្វូងមនុស្សជាច្រើនពាន់នាក់បានតវ៉ាប្រឆាំងនឹងតម្លៃប្រេងដែលកំពុងឡើងថ្លៃ។
ការតវ៉ានេះ គឺមានការបិទផ្លូវទូទាំងប្រទេស និងមានមនុស្សចូលរួមប្រហែល១០៦ ០០០នាក់ ប៉ុន្តែបើមើលតែម្តុំប៉ែកខាងមហាវិថី Champs-Elysées ក្នុងក្រុងប៉ារីសវិញ មានបាតុករចូលរួមប្រហែល៨ពាន់នាក់។ ក្រុមបាតុករដែលពាក់អាវកាក់ពណ៌លឿង បានប្រមូលផ្តុំយ៉ាងណែនលើដងមហាវិថីChamps-Elysées អមដោយសម្រែកទាមទារ ឲ្យប្រធានាធិបតីបារាំងលោកអេម៉ា ណូអែលម៉ាក្រុង ចុះចេញពីតំណែង។
ដោយសារសន្ទុះនៃការតវ៉ាកញ្ជ្រោលខ្លាំងពេក ប៉ូលិសមួយចំនួន ក្នុងចំណោមប៉ូលិស៥ពាន់នាក់ ដែលដាក់ពង្រាយក្នុងទីក្រុង ដើម្បីការពារអំឡុងពេលតវ៉ា បានបង្ខំចិត្តប្រើប្រាស់កាណុងបាញ់ទឹក និងឧស្ម័នបង្ហូរទឹកភ្នែក បាញ់ដាក់ហ្វូងបាតុករនៅលើមហាវិថី Champs-Elysées ដើម្បីបំបែកការប្រមូលផ្តុំនេះ។ ប៉ូលិសព្យាយាមរារាំង កុំឲ្យក្រុមបាតុកររុលទៅមុខ ឆ្ពោះទៅកាន់អាគារសំខាន់ៗរបស់រដ្ឋ ដូចជាការិយាល័យប្រធានាធិបតីនិងសភាជាតិជាដើម។
នៅលើបណ្តាញសង្គមហ្វេសប៊ុក ចលនាអាវកាក់លឿង បានអំពាវនាវឲ្យមានបាតុកម្មប្រឆាំង សាជាថ្មី នៅថ្ងៃសៅរ៍ ទី ១ធ្នូ សប្តាហ៍ក្រោយ ដើម្បីដាក់សម្ពាធលើរដ្ឋាភិបាល ឲ្យដំឡើងប្រាក់ខែ ហើយនិងបញ្ឈប់ ដំឡើងពន្ធលើប្រេង។ “បើរដ្ឋាភិបាលមិនព្រមធ្វើតាម នោះ បាតុកម្មតវ៉ានឹងកើតមាន រហូតធ្វើឲ្យប្រធានាធិបតីម៉ាក្រុងចុះចេញពីតំណែង” នេះជាពាក្យព្រមានរបស់ចលនាអាវកាក់លឿង នៅលើគណនីហ្វេសប៊ុករបស់ខ្លួន។ នៅក្នុងបាតុកម្មរបស់ក្រុមអាវកាក់លឿងនៅទូទាំងប្រទេសដែលមានមនុស្សចូលរួម ១០៦ ៣០១នាក់ ប៉ូលិសបានចាប់ខ្លួនមនុស្ស ១០៣នាក់ នៅក្រោយការប៉ះទង្គិចដ៏ហិង្សា ដែលបានធ្វើមនុស្សរបួស ២៤នាក់។
Home ព្រឹត្តិការណ៍ថ្មីៗ ហ្វូងបាតុករជាច្រើននៅប្រទេសបារាំង បានផ្ទុះតវ៉ាប្រឆាំងនឹងតម្លៃប្រេងដែលកំពុងឡើងថ្លៃ