សារព័ត៌មាន CNBC បានចេញផ្សាយនៅថ្ងៃទី៥ ធ្នូ ២០១៨នេះថា ប្រធានាធិបីអ៊ីរ៉ង់ លោក ហាសាន រ៉ូហានីបានគម្រាមកាលពីថ្ងៃអង្គារថា អ៊ីរ៉ង់នឹងបិទច្រកសមុទ្រអ័កមូស ប្រសិនបើសហរដ្ឋអាមេរិករាំងខ្ទប់ការនាំចេញប្រេងប្រទេសរបស់លោក។
ថ្លែងនៅក្នុងបទសម្ភាសន៍មួយជាមួយទូរទស្សន៍រដ្ឋអ៊ីរ៉ង់ លោករ៉ូហានី បាននិយាយថា «បើសិនជាថ្ងៃណាមួយសហរដ្ឋអាមេរិកសម្រេចចិត្តបំបិទការនាំចេញប្រេងរបស់អ៊ីរ៉ង់ គ្មានប្រេងណាមួយអាចត្រូវបាននាំចេញពីឈូងសមុទ្រពែរបានដូចគ្នា»។
ក្រោយការថ្លែងសន្ទរកថារបស់ប្រធានាធិបតីអ៊ីរ៉ង់ ភ្លាមនោះទីភ្នាក់ងារព័ត៌មាននិស្សិតអ៊ីរ៉ង់បានរាយការណ៍ដោយដកស្រង់សម្តីនាយឧត្តមនាវីទោ ហាសសាន ខាន់ហ្សាឌីដែលបាននិយាយថា អ៊ីរ៉ង់បានបញ្ជូនក្រុមនាវាចំនួន ៥៨គ្រឿងទៅកាន់មហាសមុទ្រឥណ្ឌាខាងជើង និងឈូងសមុទ្រ អាដែន ស្ថិតនៅខាងក្រៅឈូងសមុទ្រពែរ។
រដ្ឋបាលលោកត្រាំបានដាក់ទណ្ឌកម្មឡើងវិញទៅលើឧស្សាហកម្មថាមពលរបស់អ៊ីរ៉ង់កាលពីថ្ងៃទី៥ វិច្ឆិកា។ ការដាក់ទណ្ឌកម្មពីសំណាក់រដ្ឋបាលលោកត្រាំនេះ បានធ្វើឡើងបន្ទាប់ពីអាមេរិកបានដកខ្លួនជាផ្លូវការចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ដោយសហរដ្ឋអាមេរិក និងអ៊ីស្រាអែលបានចោទថា អ៊ីរ៉ង់បានរំលោភលើកិច្ចព្រមព្រៀងនុយក្លេអ៊ែរ ដែលបានធ្វើឡើងកាលសម័យលោកអូបាម៉ា។
ទណ្ឌកម្មនេះបានកាត់បន្ថយការនាំចេញរបស់អ៊ីរ៉ង់ប្រហែល ១លានបារ៉ែលក្នុងមួយថ្ងៃ ប៉ុន្តែយ៉ាងនេះក៏ដោយ ប្រធានាធិបតីបានប្តេជ្ញាថា ខ្លួននឹងបន្តការនាំចេញរបស់ខ្លួនបន្តទៀត។
យោងតាមរដ្ឋបាលព័ត៌មានថាមពលសហរដ្ឋអាមេរិកច្រកសមុទ្រអ័កមូស គឺជាផ្លូវទឹកដ៏សំខាន់មួយសម្រាប់ការនាំចេញប្រេង។ នៅឆ្នាំ ២០១៦ ប្រេងឆៅចំនួន ១៨,៥ពាន់លានបារ៉ែល ដែលបានឆ្លងកាត់ផ្លូវទឹកមួយនេះ ឬ ១ភាគបីនៃប្រេងឆៅនៅលើពិភពលោក។ ១បារ៉ែលស្មើ ១៥៩លីត្រ។
ថ្មីៗនេះ មន្ទីរប៉ង់តាហ្គោនបានប្រកាសថា សហរដ្ឋអាមេរិកបានបញ្ជូនក្រុមអ្នកប្រយុទ្ធនាវាផ្ទុកយនត្ហោះទម្លាក់គ្រាប់បែកទៅកាន់តំបន់មជ្ឈឹមបូព៌ា ដែលការបញ្ជូននេះ ធ្វើឡើងភ្លាមៗ បន្ទាប់ពីអ៊ីរ៉ង់បានបង្ហាញពីនាវាពិឃាតថ្មីស្រឡាងរបស់ខ្លួន ដែលអាចបំបាំងកាយពីរ៉ាដារបស់សត្រូវបាន។ សហរដ្ឋអាមេរិកក៏បានចោទប្រកាន់អ៊ីរ៉ង់ថាបានបាញ់គ្រាប់មីស៊ីលប៉ាឡេស្ទីកដោយរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិផងដែរ។ នេះបើតាមកាសែត The Wall Street Journal៕
Home ព្រឹត្តិការណ៍ថ្មីៗ ស្ថានការណ៍កាន់តែក្តៅនៅតំបន់មជ្ឈឹមបូព៌ា! អ៊ីរ៉ង់បញ្ជូនក្រុមនាវាចម្បាំងទៅកាន់ឈូងសមុទ្រព័ក្ស ក្រោយប្រធានាធិបតីអ៊ីរ៉ង់បានគម្រាមបិទច្រកសមុទ្រអ័កមូស