យោងតាមសារព័ត៌មាន CNN នៅថ្ងៃទី១៣ ធ្នូនេះបានឲ្យដឹងថា បណ្តាក្រុមហ៊ុនចិនជាច្រើន និងក្រុមអ្នកជំនួញជាច្រើនបានអំពាវនាវឲ្យកម្មករទាំងអស់ធ្វើពហិការមិនប្រើប្រាស់ផលិតផលពីក្រុមហ៊ុនសហរដ្ឋអាមេរិកទាំងឡាយដូចជាក្រុមហ៊ុនអ៊ែបផល បន្ទាប់ពីមានការចាប់ខ្លួនប្រធានហិរញ្ញវត្ថុនៃក្រុមហ៊ុនហួវ៉េ។
អង្គការជាច្រើននៅទូទាំងប្រទេសចិនបានចេញសេចក្តីថ្លែងការណ៍ដោយបានជម្រុញដល់សមាជិកបុគ្គលិកទាំងអស់ ឲ្យបង្ហាញនូវការគាំទ្ររបស់ពួកគេចំពោះក្រុមហ៊ុនហួវ៉េ បើមិនដូច្នោះទេ ពួកគេគម្រាមដាក់ទណ្ឌកម្មទៅលើអ្នកណាដែលប្រើផលិតផលក្រុមហ៊ុនអ៊ែបផល ឬក៏ផ្តល់ជូននូវប្រាក់ឧបត្ថម្ភដើម្បីទិញស្មាតហ្វូនចិន។
អង្គភាពពាណិជ្ជកម្មណានចុងនៅទីក្រុងស៊ាងហៃ បាននិយាយនៅក្នុងសេចក្តីថ្លែងការណ៍មួយ នៅសប្តាហ៍នេះបានព្រមានថា សមាជិកណាម្នាក់ ដែលបានទិញផលិតផលក្រុមហ៊ុនអ៊ែបផលនឹងត្រូវហាមឃាត់។
វិបត្តិនេះបានចាប់ផ្តើមបន្ទាប់ពីព័ត៌មានបានលេចឡើងថា លោកម៉េងវ៉ាន់ហ្ស៊ូ ប្រធានផ្នែកហិរញ្ញវត្ថុរបស់ក្រុមហ៊ុន Huawei និងជាកូនស្រីស្ថាបនិករបស់ក្រុមហ៊ុននេះ ត្រូវបានឃុំខ្លួននៅទីក្រុង Vancouver នៅថ្ងៃទី ១ខែធ្នូ។ លោកស្រីអាចប្រឈមមុខនឹងការធ្វើបត្យាប័នទៅសហរដ្ឋអាមេរិក ដែលបង្កឲ្យកំហឹងនៅតាមប្រព័ន្ធផ្សព្វផ្សាយរបស់ចិន។ យ៉ាងណាក៏ដោយ នៅព្រឹមថ្ងៃ១២ ធ្នូនេះ លោកស្រីត្រូវបានចៅក្រមកាណាដាសម្រេចដោះលែងនៅក្រៅឃុំ ដោយទាមទារនូវប្រាក់ធានាជាង ៧លានដុល្លារ។ ជាមួយគ្នានេះដែរ លោកត្រាំបាននិយាយថា លោកមានបំណងចង់ចូលអន្តរគមន៍នៅក្នុងសំណុំរឿងនេះ ដោយសារតែលោកមិនចង់ឲ្យមានភាពតានតឹងរឿងពាណិជ្ជកម្មជាមួយចិនកាន់តែខ្លាំងជាងនេះ៕
