កាលពីពេលកន្លងទៅនេះ ក្រោយបន្ទាប់ពីលោកស្រី ម៉េង វ៉ាន់ចូវ (Meng Wanzhou) ប្រធានគ្រប់គ្រងផ្នែកហិរញ្ញវត្ថុ ហើយដែលត្រូវជាអនុប្រធានក្រុមប្រឹក្សាភិបាល និងជាកូនស្រីស្ថាបនិកក្រុមហ៊ុន Huawei ផងនោះ ត្រូវបានចាប់ខ្លួន តាំងពីថ្ងៃទី១ខែធ្នូ នៅពេលដែលលោកស្រីធ្វើដំណើរឆ្លងកាត់ប្រទេសកាណាដា រួចមក ។
លោក ដូណាល់ ត្រាំ ប្រធានាធិបតីអាមេរិក បានថ្លែងថា លោកនឹងធ្វើអន្តរាគមន៍ ករណីប្រធានផ្នែកហិរញ្ញវត្ថុរបស់ក្រុមហ៊ុន Huawei ប្រសិនបើអន្តរាគមន៍នេះ អាចជួយឲ្យកិច្ចព្រមព្រៀងថ្មីមួយរវាងអាមេរិក និងចិន អាចលេចចេញជារូបរាងបាន។ការថ្លែងរបស់លោក ដូណាល់ ត្រាំ ត្រូវបានធ្វើឡើងក្នុងកិច្ចសម្ភាសជាមួយអ្នកសារព័ត៌មាន Reuters កាលពីថ្ងៃទី១១ ខែធ្នូ ឆ្នាំ២០១៨។
ក្នុងកិច្ចសម្ភាសនោះ លោកប្រធានាធិបតីអាមេរិក មានជំនឿថា លោកនឹងអាចចរចាជាមួយលោកប្រធានាធិបតីចិន ស៊ី ជិនពីង ដើម្បីឈានដល់កិច្ចព្រមព្រៀងមួយ ដោះស្រាយវិបត្តិជម្លោះរវាងប្រទេសទាំងពីរ ដែលបណ្ដាលឲ្យទីផ្សារភាគហ៊ុនអាមេរិក ធ្លាក់ចុះ នាពេលថ្មីៗកន្លងទៅ។
ជុំវិញបញ្ហានេះដែរ លោកស្រី Chrustia Freeland រដ្ឋមន្ត្រីការបរទេសកាណាដា កាលពីថ្ងៃទី១២ ខែធ្នូ បានព្រមានអាមេរិក ទាក់ទងករណីចង់ធ្វើបត្យាប័នបែបលក្ខណៈនយោបាយ គឺមួយថ្ងៃបន្ទាប់ពីប្រធានាធិបតីអាមេរិក ដូណាល់ ត្រាំ ថ្លែងថា លោកអាចអន្តរាគមន៍ ករណី នាយករដ្ឋប្រតិបត្តិហិរញ្ញវត្ថុក្រុមហ៊ុន ហ៊ូវ៉ៃ (Huawei) ដែលត្រូវប៉ូលិសចាប់ឃុំខ្លួននៅទឹកដីកាណាដា តាមសំណើទីក្រុងវ៉ាស៊ីនតោន ។
លោកស្រី Freeland បានថ្លែងថា ពលរដ្ឋកាណាដាម្នាក់ទៀត អាចនឹងមានបញ្ហានៅក្នុងប្រទេសចិន ខណៈដែលអាជ្ញាធរចិនបានឃុំខ្លួនពលរដ្ឋកាណាដាម្នាក់ហើយនោះ គឺអតីតមន្ត្រីទូត Michael Koringកាលពីថ្ងៃទី១០ ខែធ្នូ ។
សូមបញ្ជាក់ថា ប្រទេសចិនបានកោះហៅរដ្ឋទូតអាមេរិកប្រចាំនៅចិន ទៅប្រឆាំងតវ៉ាយ៉ាងដាច់អហង្ការចំពោះសកម្មភាពចាប់ខ្លួនអគ្គនាយកហិរញ្ញវត្ថុក្រុមហ៊ុន ហ៊ូវ៉ៃ អ្នកស្រី MengWanzhou។ អ្នកស្រី ត្រូវអាមេរិកចោទថា ជាមេគំនិតរំលោភបំពានដល់ការដាក់ទណ្ឌកម្មអាមេរិក ទៅលើប្រទេសអ៊ីរ៉ង់ ។ អ្នកស្រី Wanzhouត្រូវប៉ូលិសកាណាដាចាប់ខ្លួន កាលពីថ្ងៃទី៥ ខែធ្នូ ឆ្នាំ២០១៨ ខណៈកំពុងរង់ចាំជើងហោះហើរ ហើយត្រូវបានតុលាការជំនុំជម្រះសម្រេចដោះលែងឲ្យនៅក្រៅឃុំ កាលពីថ្ងៃទី១២ ខែធ្នូ ដោយបង់ប្រាក់ធានាប្រមាណជាង៧លានដុល្លារអាមេរិក ។
ទាក់ទិនបញ្ហានេះដែរ រដ្ឋាភិបាលចិន បានអំពាវនាវឲ្យកាណាដាដោះលែងអគ្គនាយកហិរញ្ញវត្ថុក្រុមហ៊ុន ហ៊ូវ៉ៃ MengWanshouដែលចាប់ខ្លួនតាមការស្នើសុំពីអាមេរិកនោះ ជាបន្ទាន់ បើពុំដូច្នោះទេ កាណាណា នឹងរងផលវិបត្តិយ៉ាងធ្ងន់ធ្ងរ ហើយជាការចាប់ផ្តើម ចិនក៏សម្រេចចាប់ឃុំខ្លួនអតីតមន្ត្រីទូតកាណាម្នាក់នោះភ្លាមៗ ។
គួរបញ្ជាក់ដែរថា នៅក្នុងសំណុំរឿង ចាប់ខ្លួន កូនស្រីរបស់ស្ថាបនិកក្រុមហ៊ុន Huawei នាយករដ្ឋមន្ត្រីកាណាដា លោកJustine Trudeau បានអះអាងជាថ្មី ថា កាណាដា នៅតែបន្តគោរពច្បាប់ អន្តរជាតិ នោះបើទោះបីជាប្រទេសដទៃ កំពុងគិតធ្វើអ្វីផ្សេងក៏ដោយ។ នាយករដ្ឋមន្ត្រីកាណាដាចង់និយាយសំដៅដល់ប្រធានាធិបតីអាមេរិក ដូណាល់ ត្រាំ ដែលកាលពីថ្ងៃអង្គារបានពន្លយថា លោកនឹងអាចអន្តរាគមន៍លូកដៃ ក្នុងសំណុំរឿងលោកស្រី ម៉េង ដែលតុលាការអាមេរិកចោទប្រកាន់ថា បានរំលោភ ការដាក់ទណ្ឌកម្មរបស់អាមេរិក ទៅលើអ៊ីរ៉ង់។ សម្រាប់លោកដូណាល់ ត្រាំ លោកអាចអន្តរាគមន៍ បើសិនសំណុំរឿងនេះ ជួយឲ្យអាមេរិកអាចទទួលបានប្រយោជន៍ច្រើនពីការចរចាពាណិជ្ជកម្មរវាងចិន និងអាមេរិកនៅថ្ងៃខាងមុខ។