លោកយាយអ៊ីរ៉េណេ អូស៊ី ទើបតែចាប់ផ្តើមរៀនលោតពីលើអាកាសកាលពីរយៈពេល២ឆ្នាំមុន ពេលដែលលោកស្រីមានអាយុ១០០ឆ្នាំ ប៉ុន្តែលោកយាយមិនបានបង្ហាញសញ្ញាណាមួយនៃការឈប់ត្រឹមហ្នឹងនោះទេ។
លោកយាយទួតអាយុ១០២ឆ្នាំម្នាក់នេះ បានប៉ុនប៉ង១១លើករួចមកហើយក្នុងការបំបែកកំណត់ត្រាសម្រាប់អ្នកលោតពីលើអាកាសមានវ័យចំណាស់ជាងគេបំផុតនៅលើពិភពលោក ក្រោយពេលដែលលោកយាយបានលោតពីលើយន្តហោះនៅរដ្ឋ South Australia ប្រទេសអូស្ត្រាលី កាលពីថ្ងៃអាទិត្យ។ លោកយាយអូស៊ី បានបញ្ចប់ការលោតពីលើអាកាសជាប្រវត្តិសាស្ត្រនេះ ដើម្បីរកថវិកាសម្រាប់អង្គការមិនរកកម្រៃ MNDSA ដែលគាំទ្រអ្នកកើតជំងឺសរសៃប្រសាទខួរក្បាល។
យោងតាមចុះផ្សាយរបស់កាសែត The Advertiser បានឲ្យដឹងថា លោកយាយអូស៊ី ដែលកូនស្រីរបស់គាត់ បានស្លាប់ដោយសារតែជំងឺសរសៃប្រសាទខួរក្បាល នៅអាយុ៦៧ឆ្នាំនោះ រកថវិកាបាន១២.០០០ដុល្លារសម្រាប់អង្គការ MNDSA ។
SA Skydiving គឺជាក្រុមហ៊ុនលោតពីលើអាកាសដែលមានមូលដ្ឋាននៅទីក្រុងវែលលីងតុន បានជួយលោកស្រីអូស៊ី លោតពីលើអាកាសកាលពីថ្ងៃអាទិត្យ។ ការលោតពីលើអាកាសរបស់លោកយាយវ័យ១០២ឆ្នាំម្នាក់នេះ បានបំបែកកំណត់ត្រាលើកមុនបង្កើតឡើងដោយលោកខេននី ម៉េយើស គឺជាលោកតាម្នាក់មកពីរដ្ឋញូវជើស៊ី ដែលបានបង្កើតកំណត់ត្រាចុងក្រោយកាលពីឆ្នាំ២០១៧ ក្រោយពីបញ្ចប់ការលោតពីលើអាកាសរបស់លោកនៅស្រុកស៊ូសេក។
កាសែត The Advertiser បានរាយការណ៍ថា ពេលដែលលោកយាយ បំបែកកំណត់ត្រាកាលពីចុងសប្តាហ៍កន្លងទៅ លោកយាយអូស៊ី មានអាយុចាស់ជាងលោកតាម៉េយើស ចំនួន២១ថ្ងៃ ពេលដែលលោកតាបានបង្កើតកំណត់ត្រាកាលពីឆ្នាំ២០១៧។
នេះគឺជាលើកទី៣ហើយដែលលោកយាយអូស៊ី បានលោតពីលើអាកាសជាមួយក្រុមហ៊ុន SA Skydiving ។ លោកយាយបានបញ្ចប់ការលោតពីលើអាកាសលើកដំបូងរបស់លោកយាយជាមួយក្រុមហ៊ុននេះ កាលពីឆ្នាំ២០១៦ នៅថ្ងៃខួបកំណើតលើកទី១០០របស់លោកយាយ។ លោកយាយបានវិលត្រឡប់មកលោតពីលើអាកាសម្តងទៀត កាលពីឆ្នាំ២០១៧ ប៉ុន្តែលោកយាយប្រើប្រាស់ការលោតពីលើអកាសនេះ ដើម្បីរកមូលនិធិសម្រាប់អង្គការ MND South Australia ។
លោកម៉ាត់ ធីហ្គឺ គឺជាប្រធានក្រុមហ៊ុន SA Skydiving បាននិយាយថា ក្រុមហ៊ុនរបស់លោក បានដាក់សំណើរមួយទៅកាន់សៀវភៅកំណត់ត្រាពិភពលោក Guinness World Recordsដើម្បីឲ្យពួកគេពិចារណាលើការទទួលស្គាល់កំណត់ត្រារបស់លោកយាយអូស៊ី។ លោកបន្តថា វាគឺជាសមិទ្ធិផលដ៏អស្ចារ្យមួយបង្កើតឡើងដោយស្ត្រីវ័យចំណាស់ដ៏អស្ចារ្យម្នាក់។
ដោយឡែក លោកយាយអូស៊ី បាននិយាយប្រាប់កាសែត The Advertiser ផងដែរថា ប្រហែលជាគាត់អាចនឹងលោតពីលើអាកាសម្តងទៀតនៅឆ្នាំក្រោយ ហើយបើសិនជាគាត់នៅមានជីវិត គាត់នឹងលោតពីលើអាកាសម្តងទៀតនៅវ័យ១០៥៕