(ទីក្រុងតេរ៉ង់)៖ សារព័ត៌មានញូស៍វីកបានចេញផ្សាយនៅថ្ងៃទី២៤ ធ្នូនេះថា កងកម្លាំងយោធាអ៊ីរ៉ង់ត្រូវបានកំណត់ថា នឹងធ្វើសមយុទ្ធទ្រង់ទ្រាយធំនៅទូទាំងភាគខាងត្បូងរបស់ប្រទេសនេះ ខណៈដែលនាវាផ្ទុកយន្តហោះទម្លាក់គ្រាប់បែករបស់សហរដ្ឋអាមេរិកបានធ្វើដំណើរទៅដល់ដែនទឹកនៃឈូងសមុទ្រពែរ បន្ទាប់ពីនាវានោះអវត្តមានអស់រយៈពេលមួយខែកន្លងទៅ។
លោកឧត្តមសេនីយ៍ទោ Mohammad Pakpour មេបញ្ជាការកងកម្លាំងប្រដាប់អាវុធថ្មើរជើងបដិវត្តវរអ៊ីរ៉ង់បានប្រាប់ក្រុមអ្នកសារព័ត៌មានកាលពីថ្ងៃសុក្រថា ដំណាក់កាលចុងក្រោយនៃសមយុទ្ធ Payambar-e Azam ឬហៅថា Great Prophet សមយុទ្ធចំនួន ១២នឹងត្រូវចាប់ផ្តើមធ្វើនៅថ្ងៃសៅរ៍នេះ ដោយរួមបញ្ចូលទាំងអង្គភាពប្រតិកម្មរហ័ស អង្គភាពដែនអាកាស អង្គភាពប្រយុទ្ធ និងកម្ទេច កងកម្លាំងគ្រាប់មីស៊ីលរយៈចម្ងាយមធ្យម និងកងទ័ពជើងទឹកទី៣។ មេបញ្ជាការយោធារូបនោះបានបង្ហាញទឡ្ហិករណ៍ថា សមយុទ្ធនេះគឺធ្វើឡើងដើម្បីការពារខ្លួន ប៉ុន្តែអ៊ីរ៉ង់នឹងមិនញញើតក្នុងការបើកការវាយប្រហារ ដើម្បីធ្វើការឆ្លើយតបទៅនឹងការវាយប្រហារទាំងឡាងណាមកលើខ្លួននោះទេ។
យោងតាមទីភ្នាក់ងារព័ត៌មានពាក់កណ្តាលផ្លូវការអ៊ីរ៉ង់ Mehr បានស្រង់សម្តីលោក Pakpour ថា «យើងមិនបង្កការគំរាមកំហែងដល់ប្រទេសណាមួយទេ ប៉ុន្តែប្រសិនបើសត្រូវព្យាយាមអនុវត្តបំណងអាក្រក់របស់ពួកគេ ហើយវាយប្រហារមកលើយើង យើងនឹងឈ្លានពានហើយវាយប្រហារទៅលើសត្រូវនោះវិញជាមួយនឹងកម្លាំងដ៏ខ្លាំងក្លា ហើយយើងកំពុងតែអនុវត្តន៍ទាំងនេះ នៅក្នុងលំហាត់សមយុទ្ធទាំងនេះ»។
សមយុទ្ធនេះត្រូវបានកំណត់ធ្វើនៅលើកោះកេះសឹម ដែលស្ថិតនៅលើឆ្នេរនៃខេត្ត Hormozgan នៅភាគខាងត្បូងប្រទេសអ៊ីរ៉ង់ ហើយក៏ស្ថិតនៅក្នុងច្រកសមុទ្រអ័កមូសផងដែរ។ ទន្ទឹមនឹងការឡើងកម្តៅរវាងអ៊ីរ៉ង់និងសហរដ្ឋអាមេរិក អ៊ីរ៉ង់ក៏បានគម្រាមបិទច្រកសមុទ្រអ័កមូស ដែលជាច្រកសំខាន់សម្រាប់បណ្តាប្រទេសផលិតប្រេងដឹកឆ្លងកាត់ ឬ ១ភាគ ៣នៃតម្រូវការប្រេងនៅលើពិភពលោក។
វាជាហេតុការណ៍មួយ ដែលនាវាផ្ទុកយន្តហោះដើរដោយថាមពលនុយក្លេអ៊ែរស្ថិតក្នុងប្រភេទ Nimitz ឈ្មោះ USS John C. Stennis អមដោយអ្នកប្រយុទ្ធរបស់ខ្លួនបានចូលទៅដល់ឈូងសមុទ្រពែរ នៅថ្ងៃដដែល ដែលជាហេតុកាណ៍មួយត្រូវបានគេចាត់ទុកថា ជាវត្តមានរបស់សហរដ្ឋអាមេរិក ដ៏ឆ្ងាយជាងគេបង្អស់នៅក្នុងតំបន់ចាប់តាំងពីអំពើភេរវកម្មនៅថ្ងៃទី១១ កញ្ញា។ នេះបើតាមសារព័ត៌មាន Associated Press។ ក្នុងពេលដែលនាវាផ្ទុកយន្តហោះអាមេរិកកំពុងធ្វើដំណើរ មានទូកចម្បាំងអ៊ីរ៉ង់ប្រសេកប្រសាចធ្វើដំណើរសដេញតាមនាវាខ្នាតយក្សរបស់អាមេរិក និងក្រុមនាវាហែរហមរបស់ខ្លួនផងដែរ។ ជាមួយគ្នានេះដែរ អ៊ីរ៉ង់បានបង្ហោះដ្រូនទៅក្បែរនាវាអាមេរិកយ៉ាងឱឡារិកផងដែរ ហើយក៏មានដែរក្រុមអ្នកថតរូប និងអ្នកកាសែតតាមដានវត្តមាននាវាអាមេរិកយ៉ាងភ្លូកភ្លូកដី។
កាលពីប៉ុន្មានខែមុន បន្ទាប់ពីមានរបាយការណ៍ថា អាមេរិកបានគម្រាមវាយប្រហារទៅលើអ៊ីរ៉ង់ អ៊ីរ៉ង់បានតម្លើងសាច់ដុំរបស់ខ្លួនយ៉ាងខ្លាំង ដោយបានធ្វើសមយុទ្ធមហាសម្បើម ក្នុងទំហំផ្ទៃដី កន្លះលានគីឡូម៉ែត្រការ៉េ ដើម្បីធានានូវការការពារខ្លួនពីការវាយប្រហារពីសំណាក់ទីក្រុងវ៉ាស៊ីនតោន។
ភាពតានតឹងរវាងសហរដ្ឋអាមេរិក និងអ៊ីរ៉ង់បានកើនឡើង បន្ទាប់ពីលោកត្រាំបានដកខ្លូនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ដោយលោកត្រាំបាននិយាយបន្ទរតាមនាយករដ្ឋមន្ត្រីអ៊ីស្រាអែលថា អ៊ីរ៉ង់រំលោភលើកិច្ចព្រមព្រៀងនេះ តាមរយៈការលួចផលិតអាវុធ និងភូតកុហកអំពីនុយក្លេអ៊ែររបស់ខ្លួន។ អ៊ីរ៉ង់ថា បើបិទការនាំចេញរបស់ខ្លួន កុំស្រមៃថាអាចនាំចេញប្រេងពីច្រកសមុទ្រអ័កមូសបានឲ្យសោះ ប្រទេសផ្សេងទៀតក៏មិនអាចរកស៊ីបានដូចគ្នា។ ដោយឡែក អាមេរិកថា ហ៊ានតែបិទអាមេរិកនឹងប្រើកណ្តាប់ដៃដែកវាយប្រហារទៅលើប្រទេសនេះ៕