ក្រុមអ្នកជំនាញបាននិយាយថា ខណៈដែលប្រជាជននៅអឺរ៉ុបខាងលិច និងសហរដ្ឋអាមេរិកមានភាពកក់ក្តៅសម្រាប់ថ្ងៃបុណ្យណូអែល រុស្ស៊ីនឹងឆ្លៀតយកឱកាសក្នុងការបើកការវាយប្រហារទៅលើប្រទេសអ៊ុយក្រែន។
កាលពីថ្ងៃចន្ទ នៅពេលដែលគ្រីស្ទបរិស័ទរាប់លាននាក់ដែលអនុវត្តតាមប្រតិទិនហ្គ្រីហ្គោរីបានប្រារព្ធពិធីបុណ្យណូអែលនោះ ក្រសួងការបរទេសរុស្ស៊ីបានព្រមានថា វាពិតជាអាចទៅរួចដែលថា អ៊ុយក្រែននឹងចាប់ផ្តើមសកម្មភាពយោធាប្រឆាំងនឹងប្រទេសរុស្ស៊ី ក្នុងរយៈពេលពីរបីថ្ងៃខាងមុខនេះ។ អ្នកនាំពាក្យវិមានក្រឹមឡាំងលោកស្រី Maria Zakharova ក៏បានលើកឡើងថា ទីក្រុងកៀវកំពុងរៀបចំផែនការបើកវាយប្រហារដោយអាវុធគីមីនៅភាគខាងកើតអ៊ុយក្រែន ធ្វើជាលេសដើម្បីបើកការវាយប្រហារមួយ។
ដោយឡែក អ្នកជំនាញ និងក្រុមអ្នកវិភាគខាងយោធាលោកខាងលិចបាននិយាយថា គឺប្រទេសរុស្ស៊ីទៅវញទេ ដែលទំនងជាចាប់ផ្តើមវាយប្រហារលើប្រទេសអ៊ុយក្រែននោះ។
អតីតឯកអគ្គរដ្ឋទូតសហរដ្ឋអាមេរិកប្រចាំអ៊ុយក្រែនពីឆ្នាំ ២០០៣ ដល់ឆ្នាំ ២០០៦ លោក John Herbst បាននិយាយប្រាប់សារព័ត៌មាន News Week ថា «ទីក្រុងម៉ូស្គូនឹងធ្វើការឈ្លានពាន នៅពេលដែលពិភពលោកមិនយកចិត្តទុកដាក់។ ប្រទេសនេះបានឈ្លានពានអាហ្វហ្កានីស្ថានក្នុងកំឡុងពេលនៃបុណ្យណអែលនៅឆ្នាំ ១៩៧៩ និងបានបើកការវាយប្រហារទៅលើហ្សកហ្ស៊ីនៅក្នុងរដូវវិស្សមកាលខែសីហា»។
កាលពីថ្ងៃសៅរ៍ រុស្ស៊ីបានបញ្ជូនយន្តហោះចម្បាំងបន្ថែមទៅកាន់ឧបទ្វីបគ្រីមា ដែលតំបន់នេះរុស្ស៊ីបានស៊ីដាច់កាលពីឆ្នាំ ២០១៤។ ទន្ទឹមនេះ មេបញ្ជាការទ័ពជើងទឹកអ៊ុយក្រែនបានផ្តល់សញ្ញាមកថា កងទ័ពជើងទឹកអ៊ុយក្រែនបានត្រៀមខ្លួនរួចជាស្រេចសម្រាប់ការវាយបកទៅលើរុស្ស៊ីវិញ ប្រសិនបើរុស្ស៊ីព្យាមយាមមិនឲ្យអ៊ុយក្រែនប្រើប្រាស់កំពង់ផែសំខាន់នៅជុំវិញតំបន់គ្រីមា។ ក្រុមអ្នកជំនាញបាននិយាយថា រុស្ស៊ីបានប្តេជ្ញាថានឹងពង្រឹងការកាន់ក្តាប់តំបន់គ្រីមា ដែលខ្លួនកំពុងតែកាន់កាប់។
ក្រុមអ្នកវិភាគខ្លះក៏បានព្រមានដែរថា ប្រទេសរុស្ស៊ីអាចនឹងបង្រួបបង្រួមទឹកដីមួយចំនួន ដែលនៅជុំវិញអ៊ុយក្រែន ដើម្បីបង្កើតតំបន់អាណាព្យាបាលមួយ ដែលគ្រប់គ្រងដោយរុស្ស៊ីនៅភាគខាងជើងនៃសមុទ្រខ្មៅ ដែលប្រទេសនេះបានផ្គុំខ្សែប្រយុទ្ធជួរមុខ កាលកាន់កាប់ដោយចក្រភពរុស្ស៊ី។ អ្នកវិភាគបន្តថា ការដាក់ពង្រាយយន្តហោះចម្ពាំងទៅកាន់តំបន់គ្រីមា គឺជាសញ្ញាមួយនៃមហិច្ឆតាយោធារបស់ប្រទេសនេះ។
ប្រទេសម៉ុលដូវ៉ា ដែលជាប្រទេសតូចមួយស្ថិតនៅចន្លោះអ៊ុយក្រែន និងរ៉ូម៉ានី បានទទួលបានឯករាជ្យពីសហភាពសូវៀត ហើយត្រូវបានទទួលស្គាល់ជាផ្លូវការដោយសហគមន៍អន្ដរជាតិ នៅឆ្នាំ ១៩៩២។ ប៉ុន្តែប្រជាជនមកពី Transnistria ដែលនិយាយភាសារុស្ស៊ី បានប្រយុទ្ធជាមួយម៉ុដូវ៉ាដើម្បីបង្កើតបានជាប្រទេសរបស់ពួកគេ ប៉ុន្តែមិនទាន់ត្រូវបានទទួលស្គាល់ជាប្រទេសដោយអន្តរជាតិនៅឡើយទេ។
អ្នកជំនាញនិយាយថា ទីក្រុងម៉ូស្គូបន្តគាំទ្រដល់ឯករាជ្យរបស់ Transnistria ហើយកងទ័ពរុស្ស៊ីបានឈរជើងនៅទីនោះចាប់តាំងពីទសវត្សរ៍ឆ្នាំ ១៩៩០ ។ ក្រុមអ្នកជំនាញយោធាបានកត់សម្គាល់ថា វត្តមានយោធារបស់រុស្ស៊ីនៅទីនោះ ធ្វើឱ្យអ៊ុយក្រែនកាន់តែងាយរងគ្រោះចំពោះការឈ្លានពាន។
អ្នកវិភាគលើកឡើងថា បច្ចុប្បន្ននេះ អ្វីដែលជាចក្ខុវិស័យសម្រាប់ការឈ្លានពានរបស់រុស្ស៊ី រួមមានដូចជា ជប៉ុន ហ្វាំងឡង់ ស៊ុយអែត ន័រវេស ប៉ូឡូញ និងអ៊ុយក្រែន។ ប្រឈមទៅនឹងស្ថានការណ៍ ដែលរុស្ស៊ីកំពុងដុតដៃដុតជើងទន្ទ្រានចូលឈ្លានពានអ៊ុយក្រែន ប៉ូឡូញបានស្នើរឲ្យអង្គការណាតូ និងសហរដ្ឋអាមេរិកដាក់បញ្ឈរជើងកងទ័ពរបស់ខ្លួន នៅក្នុងទឹកដីប៉ូឡូញ ដើម្បីបញ្ជៀសការឈ្លានពានពីរុស្ស៊ី ដូចអ៊ុយក្រែន៕
