(ទីក្រុងប៉េកាំង)៖ សារព័ត៌មាន News Week បានចេញផ្សាយនៅថ្ងៃទី៨ មករា ២០១៩នេះថា ក្រោយអាមេរិកបានបញ្ជូននាវាចម្បាំងមួយគ្រឿងទៅកាន់តំបន់ដែនទឹកអន្តរជាតិ នៅក្នុងសមុទ្រចិនខាងត្បូង ទីក្រុងប៉េកាំងបានបញ្ជូនកងកម្លាំងយោធារបស់ខ្លួនទៅស្ទាក់ដំណើរនាវាចម្បាំងអាមេរិក ដែលកំពុងធ្វើនាវាចរណ៍ដោយសេរីនៅក្នុងដែនទឹកអន្តរជាតិ ដែលចិនបានវ៉ាងថាជាកម្មសិទ្ធរបស់ខ្លួនផ្តាច់មុខ នៅក្នុងហេតុការណ៍ដែលមហាយក្សទាំងពីរកំពុងតែមានភាពតានតឹងនឹងគ្នាកាន់តែខ្លាំង។
កងទ័ពជើងទឹកសហរដ្ឋអាមេរិកបានដាក់ពង្រាយនាវាពិឃាតស្ថិតក្នុងប្រភេទអាឡេបឺខ្លាសឈឈ្មោះ USS McCampbell ទៅកាន់តំបន់សមុទ្រចិនខាងត្បូងក្នុងរយៈចម្ងាយប្រមាណ ១៩គីឡូម៉ែត្រពីប្រជុំកោះប៉ារ៉ាស៊ែល ជាកោះមួយដែលចិនកំពុងតែអះអាងភាពជាកម្មសិទ្ធរបស់ខ្លួនផ្តាច់មុចនៅក្នុងតំបន់នេះ។ នៅក្នុងសេចក្តីថ្លែងការណ៍មួយផ្ញើទៅកាន់សារព័ត៌មានរ៉យទ័រ អ្នកនាំពាក្យកងនាវាចម្បាំងប្រចាំតំបន់ស៊ីហ្វីក លោកស្រី Rachel McMarr បាននិយាយកាលពីថ្ងៃចន្ទម្សិលមិញនេះថា សមយុទ្ធនេះគឺជាប្រតិបត្តិការមួយនៃការធ្វើនាវាចរណ៍ដោយសេរីដែលមានគោលបំណងប្រជែងទៅនឹងការអះអាងលើដែនទឹក ទោះបីជាលោកស្រីបានអះអាងថា មិនមានគោលដៅជាក់លាក់ ឬសារនយោបាយណាមួយក៏ដោយ។
ទង្វើនៃការបញ្ជូននាវាចម្បាំងរបស់អាមេរិកទៅកាន់តំបន់ដែនទឹកអន្តរជាតិនេះ ត្រូវបានទទួលរងនូវការរិះគន់យ៉ាងខ្លាំងពីសំណាក់ទីក្រុងប៉េកាំង ខណៈដែលទីក្រុងប៉េកាំងកំពុងតែវ៉ាងទីលើភាពជាកម្មសិទ្ធនៃតំបន់អន្តរជាតិ។
អ្នកនាំពាក្យក្រសួងការបរទេសចិន លោក លូកាង បានអះអាងនៅក្នុងសន្និសិទ្នសារព័ត៌មានមួយថា សហរដ្ឋអាមេរិកបានបញ្ជូននាវាចម្បាំងរបស់ខ្លួនទៅកាន់តំបន់ដែនទឹក ដោយគ្មានការអនុញ្ញាតពីភគីចិន។
លោកលូថា «ភាគីចិនបានបញ្ជូនក្រុមនាវាយោធានិងយន្ដហោះចម្បាំងទៅធ្វើការផ្ទៀងផ្ទាត់ភ្លាមៗ និងកំណត់អត្តសញ្ញាណនៅលើនាវាអាមេរិក ហើយបានព្រមានឱ្យចាកចេញ»។
លោកលូបាននិយាយថា «សកម្មភាពដែលពាក់ព័ន្ធដោយនាវារបស់សហរដ្ឋអាមេរិក បានរំលោភលើច្បាប់ចិន និងច្បាប់អន្តរជាតិដែលពាក់ព័ន្ធ បំពានលើអធិបតេយ្យភាពរបស់ចិន ហើយបានធ្វើឱ្យខូចដល់សន្តិភាព សន្តិសុខនិងសណ្តាប់ធ្នាប់នៃដែនទឹកដែលពាក់ព័ន្ធ»។ «ភាគីចិនជំទាស់យ៉ាងម៉ឺងម៉ាត់ ចំពោះទង្វើដែលពាក់ព័ន្ធរបស់ភាគីអាមេរិក ហើយទទូចឱ្យអាមេរិកបញ្ឈប់ការបង្កហេតុជាបន្ទាន់។ យើងនឹងបន្តចាត់វិធានការចាំបាច់ដើម្បីការពារអធិបតេយ្យភាពជាតិ និងសន្តិសុខរបស់យើង»។
ជាមួយគ្នានេះដែរ លោកវរសេនីយ៍ឯកជាន់ខ្ពស់ចិនLi Huamin បានបញ្ជាក់ថា ចិនបានដាក់ពង្រាយកងកម្លាំងទៅកាន់តំបន់នេះ ដើម្បីឆ្លើយតបនឹងការធ្វើដំណើរឆ្លងកាត់របស់នាវាអាមេរិក McCambell ហើយបាននិយាយថា ទីបញ្ជាការភូមិភាគខាងត្បូងនឹងស្ថិតនៅក្នុងការត្រៀមជើងព្រួលខ្ពស់ ឃ្លាំមើលយ៉ាងយកចិត្តទុកដាក់ទៅលើស្ថានការណ៍ដែនអាកាស និងជើងទឹក រួមទាំងការពារសន្តិសុខ និងអធិបតេយ្យភាពរបស់ចិន។
ប្រតិបត្តិការធ្វើនាវាចរណ៍សេរីរបស់អាមេរិកគឺធ្វើឡើងដោយផ្អែកទៅលើសន្និបាតអង្គការសហប្រជាជាតិនាឆ្នាំ ១៩៨២ស្តីពីច្បាប់សមុទ្រ។ ការព្រួយបារម្ភរបស់សហរដ្ឋអាមេរិកចំពោះតំបន់សមុទ្រចិនខាងត្បូង ដែលជាតំបន់ដែនទឹកអន្តរជាតិមួយដោយមានការធ្វើដំណើរយ៉ាងមមាញឹកនៅលើផ្លូវទឹក បានបង្កឲ្យក្រុមមន្ត្រីសហរដ្ឋអាមេរិក និងនមន្ទីរប៉ង់តាហ្គោនមានការតព្រួយបារម្ភយ៉ាងខ្លាំង។
ភាពតានតឹងរវាងសហរដ្ឋអាមេរិកជាមួយចិន បានឡើងកម្តៅខ្លាំងបន្ទាប់ពីមានការបោះពាក្យបោះសម្តីឲ្យគ្នាទៅវិញទៅមក។ កាលពីប៉ុន្មានខែមុន មន្ត្រីការពារជាតិអាមេរិកមួយរូបបានព្រមានថា ដើម្បីឲ្យចិនដកទ័ពចេញពីតំបន់សមុទ្រខាងត្បូង មានតែសេនារីយ៉ូមួយគត់នោះ គឺការប្រកាសសង្គ្រាមជាមួយកងទ័ពចិោនដោយផ្ទាល់តែម្តង។
ដោយឡែក កាលពី៤ ថ្ងៃមុននេះ មន្ត្រីយោធាចិនម្នាក់បានគម្រាមថា ចិនអាចនឹងប្រើវិធានការណ៍ក្នុងការបាញ់ពន្លិចនាវាផ្ទុកយន្តហោះទម្លាក់គ្រាប់បែកអាមេរិក ដែលព្រហើនហ៊ានចូលដែនទឹករបស់ខ្លួន នៅក្នុងតំបន់ដែលខ្លួនកំពុងតែកាន់កាប់៕
Home ព្រឹត្តិការណ៍ថ្មីៗ ចិនបញ្ជូននាវាចម្បាំងរបស់ខ្លួនទៅស្ទាក់ដំណើរនាវាអាមេរិក ដែលបើកចូលដែនទឹកសមុទ្រចិនខាងត្បូង ចំពេលដែលភាពតានតឹងរវាងភាគីទាំងពីរបន្តឡើងកម្តៅ