(ទីក្រុងតេលអាវីវ)៖ ប្រេសិតស៊ីរីប្រចាំអង្គការសហប្រជាជាតិបានព្រមានកាលពីថ្ងៃអង្គារថា ប្រសិនបើពិភពលោកមិនបញ្ឈប់ការវាយប្រហាររបស់អ៊ីស្រាអែលមកលើប្រទេសរបស់ខ្លួនទេ ស៊ីរីនឹងធ្វើការសងសឹកដោយនឹងបើកការវាយប្រហារទៅលើអាកាសយានដ្ឋានអន្តរជាតិរបស់អ៊ីស្រាអែលនៅខាងក្រៅទីក្រុងតេវអាវីវ គឺអាកាសយានដ្ឋាន Ben Gurion។ នេះបើតាមកាសែត The Times of ISrael ដែលបានចេញផ្សាយនៅថ្ងៃទី២៤ មករានេះ។
ថ្លែងនៅឯក្រុមប្រឹក្សាអង្គការសហប្រជាជាតិ ក្រោយការវាយប្រហាររបស់អ៊ីស្រាអែលកាលពីថ្ងៃអាទិត្យនិងថ្ងៃចន្ទ បេសកជនស៊ីរីប្រចាំអង្គការសហប្រជាជាតិ លោក Bashar Jaafari បាននិយាយថា អ៊ីស្រាអែលអាចធ្វើសកម្មភាពដោយសេរីនៅក្នុងប្រទេសស៊ីរី ពីព្រោះគេមានខ្នងបង្អែកអាមេរិកាំង បារាំង អង់គ្លេសនៅក្នុងក្រុមប្រឹក្សា។
ប្រព័ន្ធផ្សព្វផ្សាយស៊ីរីសាណាបានស្រង់សម្តីលោកចាហ្វារីថា ប្រសិនបើក្រុមប្រឹក្សាសន្តិសុខអង្គការសហប្រជាជាតិមិនអនុវត្តន៍វិធានការបញ្ឈប់អ៊ីស្រាអែលនោះទេ ស៊ីរីនឹងអនុវត្តន៍សិទ្ធស្របច្បាប់ក្នុងការការពារខ្លួន ហើយស៊ីរីនឹងឆ្លើយតបទៅលើអាកាសយានដ្ឋានទីក្រុងតេលអាវីវ ឲ្យដូចទៅនឹងការដែលអ៊ីស្រាអែលឈ្លានពានមកលើខ្លួន។
យ៉ាងណាមិញ គេនៅមិនដឹងទេថា តើស៊ីរីនឹងមានលទ្ធភាពបែបណា ក្នុងការវាយប្រហារទៅលើអាកាសយានដ្ឋានរបស់អ៊ីស្រាអែល Ben Gurion នោះទេ ប៉ុន្តែការប៉ុនប៉ងក្នុងការបើកការវាយប្រហារទៅលើអ៊ីស្រាអែលនេះ ត្រូវបានគេមើលឃើញថា គឺជាការបង្កើននូវភាពតានតឹងកាន់តែខ្លាំង និងកំពុងតែប្រឈមជាមួយកម្លាំងយោធាដ៏ខ្លាំងក្លារបស់អ៊ីស្រាអែល ខណៈដែលស៊ីរីមានរុស្ស៊ីជាបងធំពីក្រោយខ្នង។
ការគម្រាមវាយប្រហារទៅលើអាកាសយានដ្ឋានអ៊ីស្រាអែលនេះ បានធ្វើឡើងក្រោយការវាយប្រហារតាមផ្លូវអាកាសរបស់អ៊ីស្រាអែលទៅលើទីតាំងសំខាន់ៗ ដោយបានសម្លាប់មនុស្ស ២១នាក់។ ក្រៅពីស៊ីរី អ៊ីរ៉ង់ក៏បានបង្កើនភាពតានតឹងជាមួយអ៊ីស្រាអែលផងដែរ ដោយសារការវាយប្រហារនោះបានសម្លាប់ទាហានរបស់ខ្លួន ១២នាក់៕
Home ព្រឹត្តិការណ៍ថ្មីៗ ស៊ីរី គម្រាមបើកការវាយប្រហារទៅលើអាកាសយានដ្ឋានអ៊ីស្រាអែល ប្រសិនបើពិភពលោកមិនបញ្ឈប់អ៊ីស្រាអែលទេនោះ