អ្នកនិពន្ធជនជាតិចិន-អូស្ត្រាលី លោក Yang Hengjun ត្រូវបានឃុំខ្លួនដោយអាជ្ញាធរចិនដោយត្រូវចោទពីបទចារកម្ម នេះបើតាមមេធាវីរបស់ក្រុមគ្រួសារលោក ដែលបានប្រាប់សារព័ត៌មាន CNN នៅថ្ងៃទី២៤ មករានេះ។
យោងតាមមេធាវីរបស់លោក យ៉ាង គឺលោក Mo Shaoping បានឲ្យដឹងថា ក្រុមគ្រួសារលោកយ៉ាងបានទទួលដំណឹងជាលាយលក្ខអក្សរពីការិយាល័យសន្តិសុខរដ្ឋចិន ដោយបញ្ជាក់អំពីការឃុំខ្លួននោះ។
លោកម៉ូបាននិយាយថាលោកនឹងដាក់ញត្តិមួយ ដើម្បីជួបជាមួយកូនក្តីរបស់លោក ប៉ុន្តែមិនដឹងថា លោកត្រូវបានអនុញ្ញាតទៅតាមការស្នើសុំញត្តិនោះដែរឬអត់ទេ ដោយសារតែការចោទប្រកាន់ប្រឆាំងលោកយ៉ាង។
ក្រសួងការបរទេស និងពាណិជ្ជកម្មអូស្ត្រាលីបាននិយាយនៅក្នុងសេចក្តីថ្លែងការណ៍មួយថា ពួកគេនឹងបន្តស្វែងរកការបញ្ជាក់អំពីមូលហេតុនៃការចាប់ខ្លួននេះ។
លោកយ៉ាង ដែលមានវ័យ ៥៣ឆ្នាំ គឺជាអ្នកនិពន្ធដែលពីមុនធ្វើការជាមន្ត្រីជាមួយក្រសួងការបរទេសចិន។ ទោះបីជាលោកយ៉ាងមានសញ្ជាតិជាពលរដ្ឋអូស្ត្រាលីក៏ដោយ ក៏លោកចំណាយពេលជាច្រើនស្ថិតនៅសហរដ្ឋអាមេរិក ជាទីដែលលោកជួបជាមួយអ្នកប្រាជ្ញនៅសាកលវិទ្យាល័យកូឡំប៊ីនាទីក្រុងញូយ៉ក។
លោកយ៉ាងបានធ្វើដំណើរត្រឡប់ទៅកាន់ប្រទេសចិនពីទីក្រុងញូយ៉កជាមួយភរិយារបស់គាត់ នៅថ្ងៃទី១៧ មករា ដើម្បីមកទទួលយកទិដ្ឋាការកូនចុងរបស់គាត់ និងត្រូវបានចាប់ខ្លួនក្រោយការទៅដល់។
ទំនាក់ទំនងរវាងប្រទេសអូស្ត្រាលី និងប្រទេសចិនបានធ្លាក់ចុះ បន្ទាប់ពីការធ្វើសេចក្តីព្រាងច្បាប់អន្តរាគមន៍ដ៏តឹងរ៉ឹងរបស់ក្រុងកង់បេរ៉ា ដែលក្រុមមន្ត្រីនៅទីក្រុងប៉េកាំងជឿថា ពួកគេបានកំណត់គោលដៅមកលើចិន។ ភាពតានតឹងរវាងប្រទេសទាំងពីក៏បានធ្លាក់ចុះក្រោយការហាមប្រាមរបស់អូស្ត្រាលីទៅលើក្រុមហ៊ុនបច្ចេកវិទ្យា 5G ផងដែរ៕