(រដ្ឋធានីវ៉ាស៊ីនតោន)៖ សារព័ត៌មាន News Week ចេញផ្សាយនៅថ្ងៃទី២៨ មករានេះថា អ៊ីរ៉ង់បានចាប់ផ្តើមធ្វើសមយុទ្ធទ្រង់ទ្រាយ ក្រោយអ៊ីស្រាអែលបើកការវាយប្រហារទៅលើកងកម្លាំងតំណាងរបស់ខ្លួននៅក្នុងប្រទេសស៊ីរី។
កងទ័ពអ៊ីរ៉ង់បានចាប់ផ្តើមធ្វើសមយុទ្ធ Eqtedar 97 របស់ខ្លួនកាលពីថ្ងៃសុក្សម្សិលមិញនៅជិតទីក្រុង Nasrabad នៅចំកណ្តាលខេត្ត Isfahan ដោយមានការចូលរួមពីអង្គភាពចំនួន ១២ ០០០ និងកងទ័ពអាកាសអ៊ីរ៉ង់យ៉ាងសន្ធឹកសន្ធាប់។
លំហាត់សមយុទ្ធនេះមានគោលដៅវាយតម្លៃការប្រែប្រួលថ្មីនៃរចនាសម្ព័ន្ធកងកម្លាំងថ្មើរជើងអ៊ីរ៉ង់ ហើយនឹងធ្វើការអនុវត្តន៍ជាក់ស្តែងនូវអង្គភាពរថពាសដែក កងវរសេនាកាំភ្លើងធំ កងកម្លាំងប្រតិកម្មរហ័ស កងកម្លាំងថ្មើជើងបំពាក់ដោយកាំភ្លើងម៉ាស៊ីន អង្គភាពទ័ពអាកាសប្រឆាំងវិស្វកម្ម និងយុទ្ធសាស្ត្រទំនើបកម្មនៃទំនាក់ទំនង និងដ្រូន។ នេះបើតាមការិយាល័យទំនាក់ទំនងសាធរណរបស់កងកម្លាំង ដែលបានឲ្យដឹង។
សមយុទ្ធពហុដំណាក់កាលនេះបានចាប់ផ្តើមខណៈដែលដ្រូន Mohajer និងឧទ្ធម្ភាចក្រ R-4 បានធ្វើបេសកកម្មឈ្លបយកការណ៍ មុនកងកម្លាំងទ័ពអាកាសលេខ ៥៥ និងក្រុមអង្គភាពប្រតិកម្មរហ័សទី២៥ ត្រូវបានទម្លាក់ខ្លួនពីអាកាសដោយឧទ្ធម្ភាចក្រ Belol 214 និង CH-47 Chinook ។
ជាញឹកញាប់ អ៊ីរ៉ង់បានធ្វើសមយុទ្ធដើម្បីបង្វឹកបង្ហាត់ដល់កងទ័ពរបស់ខ្លួន ដើម្បីបង្ហាញកម្លាំងកម្លាដល់សហរដ្ឋអាមេរិកអារ៉ាប៊ីសាអូឌីត និងអ៊ីស្រាអែល។ កាលពីដើមខែនេះ អ៊ីរ៉ង់បានធ្វើសមយុទ្ធ Fadayeeyan Harim Velayat 8 ដែលរួមមានយន្តហោះចម្បាំងជាច្រើនប្រភេទ។ កាលពីប៉ុន្មានខែមុន អ៊ីរ៉ង់បានធ្វើសមយុទ្ធទ្រង់ទ្រាយធំកន្លះលានគីឡូម៉ែត្រការ៉េ ដើម្បីបញ្ជូនសារទៅកានសហរដ្ឋអាមេរិក ក្រោយការបិទការនាំចេញប្រេងរបស់ប្រទេសនេះ។
កងកម្លាំងយោធាអ៊ីរ៉ង់ត្រូវចែកចេញជាពីរធំៗ៖ទីមួយគឺកងកម្លាំងធម្មតា ដែលពាក់ព័ន្ធទៅនឹងសមយុទ្ធអ៊ីសហ្វាហាន ដែលធ្វើឡើងថ្មីៗនេះ និងមួយទៀត គឺកងកម្លាំងឆ្មាំបដិវត្តជាន់ខ្ពស់ ដែលឆ្លើយទៅនឹងភាពជាអ្នកដឹកនាំសាសនារបស់ប្រទេសនេះ ដឹកនាំដោយលោកអាយ៉ាតុលា អាលីខាមីណេ។
សមយុទ្ធទ្រង់ទ្រាយធំ ដែលអ៊ីរ៉ង់ធ្វើឡើងចុងក្រោយនេះ គឺជាការបញ្ជូនសារមួយទៅអ៊ីស្រាអែល។ កាលពីពេលថ្មីៗនេះ អ៊ីស្រាអែលបានបើកការវាយប្រហារទ្រង់ទ្រាយធំទៅលើមូលដ្ឋានទ័ពអ៊ីរ៉ង់នៅស៊ីរី ដោយបានសម្លាប់ទាហានអ៊ីរ៉ង់ ១២នាក់។ ក្រោយការវាយប្រហារនេះ អ៊ីរ៉ង់បានគម្រាមវាយបំបាត់អ៊ីស្រាអែលចេញពីផែនដីនេះ។ ដោយឡែក អ៊ីស្រាអែលប្តេជ្ញាបន្តវាយប្រហារទៅលើអ៊ីរ៉ង់បន្តទៀត ប្រសិនបើប្រទេសនេះមិនដកកម្លាំងពីប្រទេសស៊ីរីនោះទេ៕
