សារព័ត៌មាន Defence News បានចេញផ្សាយនៅថ្ងៃទី២ កុម្ភៈនេះថា កងទ័ពជើងទឹកសហរដ្ឋអាមេរិកបានចុះកុងត្រាជាមួយក្រុមហ៊ុនផលិតនាវាចម្បាំង Huntington Ingalls លើការផលិតនាវាផ្ទុកយន្តហោះទម្លាក់គ្រាប់ចំនួន ២គ្រឿងដែលមានទំហំទឹប្រាក់ ១៤,៩ពាន់លានដុល្លារ។ នេះបើតាមសេចក្តីប្រកាសរបស់កងទ័ពជើងទឹកសហរដ្ឋអាមេរិកនៅថ្ងៃព្រហស្បតិ៍ទី១ មករានេះ។
យោងតាមសេចក្តីប្រកាសដដែលបានឲ្យដឹងថា ជាមួយនឹងការទិញនាវាផ្ទុកយន្តហោះទាំងពីរគ្រឿងនេះ កងទ័ពរំពឹងថានឹងរក្សាទុក ៤ពាន់លានដុល្លារ។
អគ្គលេខាធិការកងទ័ពជើងទឹក លោក Richard Spencer បានសរសើរកិច្ចព្រមព្រៀងនេះថា ជាកិច្ចខិតខំប្រឹងប្រែងរបស់ក្រុមការងារ ហើយបាននិយាយថា កិច្ចសន្យានេះនឹងបង្កើតស្ថេរភាពសម្រាប់កម្លាំងពលកម្ម ដែលមានជំនាញនិងបង្កើតប្រាក់សន្សំជាលទ្ធផល។
នាវាផ្ទុកយន្តហោះទាំងពីរក្រុមនេះ ថ្មីៗនេះត្រូវបានគេរាយការណ៍ថា មានតម្លៃ ២៤ពាន់លានដុល្លារ ហើយកងទ័ពជើងទឹកនឹងសន្សំទុក ៤ពាន់លានដុល្លារពីការចុះកុងត្រានេះ។
ដូចការគ្រោងទុកទៅតាមជើងទម្រមុំនុយក្លេអ៊ែរទាំងបីរបស់លោកត្រាំកាលពីឆ្នាំមុន សហរដ្ឋអាមេរិកនឹងមាននាវាផ្ទុកយន្តហោះទម្លាក់គ្រាប់បែកចំនួន ១២ក្រុមនាឆ្នាំ ២០១៩ ដើម្បីវ៉ាឲ្យដាច់ចិន និងរុស្ស៊ី ខណៈដែលប្រទេសទាំងពីរនេះមាននាវាផ្ទុកយន្តហោះតែមួយក្រុមគត់។ ប៉ុន្តែកាលពីថ្មីៗនេះ ចិនបានធ្វើការសាកល្បងក្រុមអ្នកប្រយុទ្ធនាវាផ្ទុកយន្តហោះរបស់ខ្លួន ប៉ុន្តែមិនទាន់ប្រកាសជាផ្លូវការ។
សហរដ្ឋអាមេរិក ដែលជាប្រទេសមួយមានកម្លាំងទ័ពជើងទឹកខ្លាំងជាងគេឥតគូប្រៀប បច្ចុប្បន្ននេះបាននិងកំពុងតែដុតដៃដុតជើងពង្រឹងសមត្ថភាពកងទ័ពជើងទឹករបស់ខ្លួនឲ្យកាន់តែខ្លាំងគ្មានប្រទេសណាមានប្រៀបលើខ្លួន រីកងទ័ពជើងគោកវិញ ប្រទេសនេះមានបទពិសោធន៍ធ្វើសង្គ្រាមពេញខ្លួន ចាប់តាំងពីការបញ្ចប់សង្គ្រាមលោកលើកទី២។ យ៉ាងណាមិញ មកពេលពេលកំពុងផ្សាយនេះ ចិនត្រូវបានគេរាយការណ៍ថា នឹងបង្កើនក្រុមនាវាចម្បាំងរបស់ខ្លួនបន្ថែមទៀត ដែលមានចំនួនដល់ទៅជាង ៦០០គ្រឿងឯណោះ ប៉ុន្តែនាវាទាំងនោះ គឺជាក្រុមនាវាហែរហម នាវាល្បាត នាវាចម្បាំងប្រឆាំងគ្រាប់មីនជាដើម មិនមែនជានាវាផ្ទុកយន្តហោះឯណា។
នាវាផ្ទុកយន្តហោះ គឺជាក្រុមអ្នកប្រយុទ្ធព្រួញមួយបាញ់បានសត្វពីរ ដោយអាចវាយតាមជើងទឹកក៏បាន និងទ័ពអាកាសក៏បាន។ នៅពេលមានសង្គ្រាម អាមេរិកនឹងបញ្ជូនក្រុមនាវារបស់ខ្លួនទៅធ្វើប្រតិបត្តិការ ដោយបើកការវាយប្រហារទៅគូសត្រូវតាមផ្លូវទឹក និងផ្លូវអាកាស ដើម្បីត្រួសត្រាយផ្លូវឲ្យកងទ័ពថ្មើជើងចូលកាន់កាន់មូលដ្ឋានសំខាន់។
ពាកព័ន្ធទៅនឹងកម្លាំងជើងទឹកអាមេរិក អ្នកវិភាគភូមិសាស្ត្រនយោបាយអាមេរិក បាននិយាយថា ប្រសិនបើសង្គ្រាមផ្ទុះឡើង កងទ័ពជើងទឹកចិន និងរុស្ស៊ី បើប្រយុទ្ធតទល់ជាមួយអាមេរិក អាចនឹងត្រូវកាច់បំបាក់បានដោយស៊ីផុយ ទាំងនៅក្នុងតំបន់សមុទ្រចិនខាងត្បូង ឬសមុទ្រខ្មៅ៕
