គ្រូពេទ្យអាមេរិកម្នាក់ ត្រូវបានចាប់ខ្លួនពីបទចាប់រំលោភសេពសន្ថវៈលើអ្នកជំងឺដែលបានផ្តល់កំណើតកូនប្រុសម្នាក់ អំឡុងពេលដែលនាងកើតរោគភ្លឹកអស់រយៈពេល១៤ឆ្នាំ ហើយរឿងអាស្រូវមួយនេះ បានផ្ទុះឡើង ពេលនាងដឹងខ្លួនសម្រាលកូន ប៉ុន្តែនាងនៅតែតក់ស្លត់ ចំពោះករណីចាប់រំលោភដ៏គួររន្ធត់មកលើរូបនាង។
លោក Nathan Sutherland អាយុ៣៦ឆ្នាំ ត្រូវបានចោទប្រកាន់ពីបទចាប់រំលោភសេពសន្ថវៈ និងការរំលោភបំពានមកលើមនុស្សពេញវ័យដែលងាយរងគ្រោះថ្នាក់ ក្រោយការពិនិត្យ DNAរបស់លោករកឃើញដូចគ្នាបេះបិទនឹងក្មេងប្រុសដែលទើបសម្រាលកាលពីពេលថ្មីៗនេះ។
លោក Sutherland ដែលត្រូវបានបញ្ជូនទៅកាន់ពន្ធនាគារស្រុក Maricopa County រដ្ឋអារីហ្សូណា សហរដ្ឋអាមេរិក កាលពីថ្ងៃអង្គារនោះ បានព្យាបាលអ្នកជំងឺម្នាក់នេះ ហើយបានចំណាយពេលច្រើននៅជាមួយនាង ចាប់តាំងពីលោកបានព្យាបាលនាងនៅឯមន្ទីរពេទ្យ Hacienda Healthcare កាលពីឆ្នាំ២០១១រហូតមក។
អ្នកជំងឺ វ័យ២៩ឆ្នាំ បានស្ថិតក្រោមការគាំពាររបស់មន្ទីរពេទ្យមួយនេះ ស្ថិតនៅក្នុងរដ្ឋអារីហ្សូណា ចាប់តាំងពីនាងនៅជាកូនក្មេងមកម្ល៉េះ ហើយនាងធ្វើឲ្យបុគ្គលិកពេទ្យភ្ញាក់ផ្អើលយ៉ាងខ្លាំង ពេលដែលនាងផ្តល់កំណើត កាលពីថ្ងៃទី២៩ ខែធ្នូ កន្លងទៅ ខណៈពេលដែលពួកគេមិនទាំងដឹងផងថា នាងមានផ្ទៃពោះ។
លោក Sutherland រងការចោទប្រកាន់ថា បានចាប់រំលោភអ្នកជំងឺមានដើមកំណើតនៅអាមេរិកម្នាក់នេះ កាលពីអំឡុងចន្លោះពេលខែកុម្ភះ និងខែមេសា ឆ្នាំ២០១៨។
ក្រុមនគរបាល បានបើកការស៊ើបអង្កេតផងដែរលើករណីថាតើ លោក Sutherland មានបានចាប់រំលោភអ្នកជំងឺណាផ្សេងទៀតដែរឬទេ ឬមួយមានអ្នកណាផ្សេងទៀត ជាប់ពាក់ព័ន្ធនឹងករណីមួយនេះដែរឬយ៉ាងណា។
លោកពលបាល Tommy Thompson គឺជាអ្នកនាំពាក្យក្រុមនគរបាលក្រុង Phoenix បាននិយាយថា យើងមិនទាន់រកឃើញថា មានអ្នកផ្សេងពាក់ព័ន្ធនឹងករណីមួយនេះនៅឡើយទេ ប៉ុន្តែការស៊ើបអង្កេតកំពុងបន្តនៅឡើយ។ លោកបន្តថា យើងអត់ដឹងនោះទេថាតើការចាប់រំលោភនេះ កើតឡើងប៉ុន្មានលើកប៉ុន្មានសារនោះទេ។
ដោយឡែក ឪពុកម្តាយរបស់អ្នកជំងឺ បាននិយាយថា កូនស្រីរបស់ពួកគេ មិនបានបាត់ស្មារតីអ្វីនោះទេ ប៉ុន្តែគ្រាន់តែមិនអាចកម្រើកបានដោយសារតែការចាប់សរសៃ កាលនៅក្មេង។
ពួកគេបន្តថា ពេលដែលនាងមិនអាចនិយាយបាន នាងអាចកម្រើកបានខ្លះត្រង់អវៈយវៈ ក្បាល និងករបស់នាង។ នាងថែមទាំងអាចស្តាប់ឮសំឡេង ហើយអាចធ្វើកាយវិការលើផ្ទៃមុខរបស់នាង បានទៀតផង៕
Home ព្រឹត្តិការណ៍ថ្មីៗ គ្រូពេទ្យម្នាក់ចាប់រំលោភអ្នកជំងឺកើតរោគភ្លឹករហូតទាល់តែមានកូនមួយទើបបែកការណ៍