(ប៉េកាំង)៖ អាជ្ញាធរចិន បាននិយាយនៅថ្ងៃព្រហស្បតិ៍នេះថា ចំនួនអ្នកស្លាប់ដោយសារការបាក់រអិលដីបានកើនឡើងដល់ ១៥នាក់ហើយ ខណៈមនុស្សប្រមាណ ៣០នាក់ផ្សេងទៀតកំពុងបាត់ខ្លួន។ នេះបើតាមការចុះផ្សាយដោយសារព័ត៌មានចិនស៊ីនហួរ នៅថ្ងៃទី២៥ ខែកក្កដានេះ។
បើគិតត្រឹមម៉ោង ៨៖០០នាទីព្រឹក ម៉ោងនៅក្នុងប្រទេសចិន ក្រុមអ្នកជួយសង្គ្រោះ បានជួយសង្គ្រោះពលរដ្ឋបាន ១១នាក់ រកឃើញសាកសព ១៥នាក់ និងកំពុងស្វែងរកមនុស្សជាង ៣០នាក់ផ្សេងទៀតដែលកំពុងបាត់ខ្លួន ហើយស្ថិតក្នុងស្ថានភាពគួរឲ្យព្រួយបារម្ភ។
សូមជម្រាបជូនថា វេលាម៉ោង ៩៖២០នាទីយប់ ថ្ងៃទី២៣ ខែកក្កដា មានហេតុការណ៍រអិលបាក់ដីមួយ បានវាយប្រហារភូមិមួយនៅស្រុកឈីឈីង នៃទីក្រុងលីវប៉ានសួយ ដែលបានកប់ផ្ទះចំនួន ២១ខ្នង ហើយបើយោងតាមក្រុមអ្នកជួយសង្គ្រោះបាននិយាយថាមនុស្សជាង ៥០នាក់បានរស់នៅក្នុងតំបន់រងគ្រោះនេះ ខណៈពេលដែលការរអិលបាក់ដីបានវាយប្រហារ៕
