សាលាដំបូងរាជធានីភ្នំពេញកាលពីម្សិលមិញនេះ សម្រេចចោទប្រកាន់និងបើកការស៊ើបអង្កេតតាមផ្លូវច្បាប់លើអ្នកប្រើប្រាស់បណ្តាញសង្គមហ្វេសប៊ុកម្នាក់ ឈ្មោះយិន ហេង ឬ«ចំប៉ីខ្មៅ» បន្ទាប់ពីបុគ្គលនេះបានបង្ហោះវីដេអូមួយដែលបានធ្វើការជេរប្រមាថជាតិសាសន៍ខ្មែរ។ នេះបើតាមការឱ្យដឹងរបស់អ្នកនាំពាក្យសាលាដំបូងរាជធានីភ្នំពេញ។
ជុំវិញបញ្ហានេះ មន្ត្រីតុលាការបានបញ្ជាក់ថាជនសង្ស័យ យិន ហេង ត្រូវបានលោក ពេជ្រ វិជ្ជាធរ ដែលជាចៅក្រមស៉ើបសួរនៃសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្នសិន នៅពន្ធនាគារព្រៃ «ស» ដោយរង់ចាំចាត់ការជំនុំជម្រះតាមនីតិវិធីបន្តទៀត តាមការចោទប្រកាន់របស់ព្រះរាជអាជ្ញា។
ប្រភពបន្តថា នៅរសៀលថ្ងៃដដែល ព្រះរាជអាជ្ញា លី សុផាណា ក៏បានចោទប្រកាន់ជនសង្ស័យ យិន ហេង ពីបទ «ញុះញង់ឲ្យមានការរើសអើង» តាមមាត្រា៤៩៤ និងមាត្រា៤៩៦ នៃក្រមព្រហ្មទណ្ឌ ហើយបទល្មើសនេះ អាចមានទោសជាប់ពន្ធនាគារ ពី១ឆ្នាំ ទៅ៣ឆ្នាំ។
គួរបញ្ជាក់ដែរថាលោកយិន ហេង ដែលត្រូវបានគេហៅថា ជាភេទទីបី និងមានឈ្មោះក្រៅថា«ចំប៉ីខ្មៅ»បានបង្ហោះវីដេអូមួយតាមបណ្តាញសង្គមហ្វេសប៊ុកដោយបានប្រើពាក្យពេចន៍ប្រមាថជាតិសាសន៍ខ្មែរ និងប្រទេសជាតិកាលពីថ្ងៃច័ន្ទ បន្ទាប់ពីបុគ្គលនេះបានអះអាងថា មនុស្សបីនាក់ខោកក្បាលខ្លួន។
វីដេអូរបស់បុគ្គលឈ្មោះយិន ហេង ត្រូវបានចែកចាយបន្តនៅលើបណ្តាញសង្គមហ្វេសប៊ុក និងបានធ្វើឲ្យមានប្រតិកម្មខឹងសម្បារយ៉ាងខ្លាំងនៅក្នុងចំណោមអ្នកប្រើប្រាស់បណ្តាញសង្គម។ នៅថ្ងៃបន្ទាប់លោកយិន ហេង បានបង្ហោះវីដេអូសុំទោសជាសាធារណៈ។
