ប្រទេសគុយបាបានធ្វើការចោទប្រកាន់សហរដ្ឋអាមេរិក ថាបានចល័យកងកម្លាំងពិសេសរបស់ខ្លួនឆ្ពោះទៅកាន់ប្រទេសវ៉េណេហ្ស៊ុយអេឡា ដើម្បីចូលអន្តរាគមន៍ប្រទេសនេះក្រោមវិបត្តិមនុស្សធម៌។
ទីក្រុងហាណាវ៉ាបានធ្វើការរិះគន់សហរដ្ឋអាមេរិកចំពោះការសន្មត់អំពីជម្រើសយោធាអាមេរិកនៅក្នុងប្រទេសវ៉េណេហ្ស៊ុយអេឡា ក្រោមការបំភាន់អន្តរាគមន៍ផ្នែកមនុស្សធម៌។
ក្រសួងការបរទេសគុយបានរាយការណ៍អំពីការហោះហើរ ដែលធ្វើឡើងដោយយន្តហោះយោធាសហរដ្ឋអាមេរិក ដែលហោះចេញពីមូលដ្ឋានយោធាអាមេរិក ក្នុងទិសដៅសម្តៅទៅរកបណ្តាប្រទេសការីប៊ីន។
សេចក្តីថ្លែងការណ៍ពីក្រសួងការបរទេសគុយបាបាននិយាយថា សហរដ្ឋអាមេរិកបានធ្វើប្រតិបត្តិការដើម្បីប្រឆាំងទៅនឹងបណ្តាមេដឹកនាំដ៏ទៃទៀត។
សេចក្តីថ្លែងការណ៍នោះបានចោទសហរដ្ឋអាមេរិកថា «ចាប់ពីថ្ងៃទី ៦ខែកុម្ភៈ ដល់ថ្ងៃទី ១០ខែកុម្ភៈឆ្នាំ ២០១៩ យន្តហោះយោធាមិនមែនសម្រាប់ការប្រយុទ្ធបានធ្វើការហោះហើរនៅក្នុងទិសដៅនៃអាកាសយានដ្ឋាន Rafael Miranda នៅសាធរណរដ្ឋ Dominican និងបណ្តាប្រទេសកោះការីប៊ីនដ៏ទៃទៀត ខណៈដែលបណ្តារដ្ឋាភិបាលដ៏ទៃទៀតត្រូវបានគេសន្មត់ថាមិនបានដឹងអំពីរឿងនេះ»។
សេចក្ដីថ្លែងការណ៍បានបន្តទៀតថា នៅក្នុងបរិបទនេះរដ្ឋាភិបាលគុយបាបានថ្កោលទោសចំពោះទង្វើរបស់រដ្ឋាភិបាលសហរដ្ឋអាមេរិក ដើម្បីរៀបចំជម្រើសយោធាបិទបាំងការចូលអន្តរាគមន៍មនុស្សធម៌។ ជាមួយគ្នានេះដែរ គុយបាបានអំពាវនាវឲ្យសហគមន៍អន្តរជាតិចៀសវាងការចូលអន្តរាគមន៍នៅក្នុងប្រទេសវ៉េណេហ្ស៊ុយអេឡាផងដែរ។
យ៉ាងណាមិញ លោកត្រាំមិនបានទាត់ចោលនូវជម្រើសយោធាដែរ ខណៈដែលលោកបានព្រមានម្តងហើយម្តងទៀតអំពីអន្តរាគមន៍យោធាអាមេរិកនៅក្នុងប្រទេសវ៉េណេហ្ស៊ុយអេឡា។
ជាមួយគ្នានេះ មានការសន្មត់ជាច្រើនអំពីការចូលអន្តរាគមន៍របស់អាមេរិកនៅក្នុងប្រទេសវ៉េណេហ្ស៊ុយអេឡា បន្ទាប់ពីលោកត្រាំបានប្រាប់សារព័ត៌មាន CBS កាលពីថ្ងៃទី២ កុម្ភៈនៅក្នុងបទសម្ភាសន៍មួយថា សកម្មភាពនេះគឺជាជម្រើសមួយ។
ភាពតានតឹងរវាងអាមេរិក និងវ៉េណេហ្ស៊ុយអេឡា បានឡើងកម្តៅខ្លាំងបន្ទាប់ពីលោកត្រាំបានប្រកាសទទួលស្គាល់ប្រធានសភាមកពីគណបក្សប្រឆាំងវ៉េណេហ្ស៊ុយអេឡាជាប្រធានាធិបតីស្តីទី ក្រោយលោកជាន់ ហ្កៃដូបានប្រកាសខ្លួនជាប្រធានាធិបតីស្តីទី៕
