(រដ្ឋធានីវ៉ាស៊ីនតោន)៖ សហរដ្ឋអាមេរិកបានប្រកាសថា មានបណ្តាប្រទេសចំនួន ២៥ប្រទេសឹបានប្តេជ្ញាថានឹងផ្តល់ជំនួយដល់វ៉េណេហ្ស៊ុយអេឡាចំនួន ១០០លានដុល្លារ ខណៈដែលប្រទេសនេះកំពុងជួបបញ្ហាមនុស្សធម៌។ នេះបើតាមលោកចន បុលថុន ដែលបានសរសេរនៅលើបណ្តាញធ្វីតតឺ បន្ទាប់ពីអង្គការអាមេរិកាំងបានធ្វើសន្និសីទអំពីវិបត្តិវ៉េណេហ្ស៊ុយអេឡា។
យោងតាម លោក David Smlanksy អ្នកសម្រមសម្រួលអង្គការអាមេរិកាំងបានឲ្យដឹងថា ជំនួយនេះនឹងត្រូវផ្តល់ដោយផ្ទាល់ទៅឲ្យមជ្ឈមណ្ឌលប្រមូលជំនួយ ដែលត្រូវបានបង្កើតឡើងនៅតាមព្រំដែនកូឡំប៊ី និងកោះ Curazao នៃសមុទ្រខារីប៊ីន។
មានការខ្វែងគំនិញគ្នាយ៉ាងខ្លាំងជុំវិញការផ្តល់ជំនួយនេះ រវាងប្រធានគណបក្សប្រឆាំង និងប្រធានាធិបតី។ បក្សប្រឆាំងចង់ជួយប្រជាជន ដោយស្នើឲ្យមានការផ្តល់ជំនួយដល់ប្រជាជនដែលកំពុងតែវេទនា ប៉ុន្តែម៉ាឌូរ៉ូបញ្ជាឲ្យមានការបិទច្រកព្រំដែនកូឡំប៊ី ដោយនិយាយថា វ៉េណេហ្ស៊ុយអេឡាមិនមែនជាអ្នកសុំទានទេ។ លោកម៉ាឌូរ៉ូបាននិយាយថា ការផ្តល់ជំនួយនេះ គឺជាសកម្មភាពមួយធ្វើឡើងដើម្បីចំណេចផ្នែកនយោបាយ និងដើម្បីត្រៀមផ្តួលរំលំរូបលោក។
បច្ចុប្បន្ននេះ ប្រទេសវ៉េណេហ្ស៊ុយអេឡាកំពុងតែជួយបញ្ហាសេដ្ឋកិច្ចធ្ងន់ធ្ងរ ដោយរូបិយវត្ថុអន្តរជាតិបានព្យាករណ៍ថា នៅឆ្នាំ ២០១៩នេះ អតិផរណាប្រទេសនេះនឹងឡើងដល់ ១០លានភាគរយ៕
