សារព័ត៌មាន News week នៅថ្ងៃទី04 មីនានេះ សហរដ្ឋអាមេរិកបានប្រកាសកាលពីថ្ងៃសុក្រម្សិលមិញនូវសកម្មភាពការទូត និងនយោបាយប្រឆាំងទៅនឹងប្រទេសវ៉េណេហ្ស៊ូអេឡា ដោយបានទាត់ចោលនូវការព្រមានពីសំណាក់ចិន និងរុស្ស៊ី ដែលឲ្យសហរដ្ឋអាមេរិកស្ថិតនៅឲ្យឆ្ងាយពីវិបត្តិវ៉េណេហ្ស៊ូអេឡា។
ក្រសួងរតនាគារសហរដ្ឋអាមេរិកបានបង្ហាញអំពីទណ្ឌកម្មថ្មីប្រឆាំងទៅនឹងមន្ត្រីសន្តិសុខវ៉េណេហ្ស៊ូអេឡា ដោយចោទប្រកាន់ពីបទរួមគំនិតបំផ្លាញជំនួយមនុស្សធម៌។ ការថ្លែងពីក្រសួងបែបនេះ បានធ្វើឡើងបន្ទាប់ពីអ្នកតំណាងពិសេសសហរដ្ឋអាមេរិកប្រចាំប្រទេសវ៉េណេហ្សូអេឡា លោក Elliot Abrahams បាននិយាយថា សហរដ្ឋអាមេរិកនឹងរឹតបន្តឹងទិដ្ឋាការជាច្រើនបន្ថែមទៀតដល់ក្រុមមន្ត្រីរដ្ឋាភិបាលលោកម៉ាឌូរ៉ូ និងសមាជិកគ្រួសារមួយចំនួនទៀត។
ជាមួយនឹងការសម្តែងក្តីព្រួយបារម្ភពីសំណាក់សហរដ្ឋអាមេរិកជុំវិញវិបត្តិមនុស្សធម៌នៅក្នុងប្រទេសវ៉េណេហ្ស៊ូអេឡា មនុស្សគ្រប់មជ្ឈមដ្ឋានមើលឃើញថា ស្ថានការណ៍វ៉េណេហ្ស៊ូអេឡាកាន់តែស្ថិតទៅរកការចូលអន្តរាគមន៍មែនទែនហើយ។
អ្នកនាំពាក្យក្រសួងការបរទេសចិន លោក លូ កាង បានព្រមានកាលពីថ្ងៃសុក្រថា ការចូលអន្តរាគមន៍នៅក្នុងប្រទេសវ៉េណេហ្ស៊ូអេឡា គឺជាការជ្រៀតជ្រែតលើកិច្ចការផ្ទៃក្នុងរបស់វ៉េណេហ្ស៊ូអេឡា។
រីឯរដ្ឋមន្ត្រីការបរទេសរុស្ស៊ីវិញបានចោទប្រកាន់ថា សហរដ្ឋអាមេរិកកំពុងតែព្យាយាមផ្តល់គ្រឿងសព្វាវុធដល់ក្រុមបក្សប្រឆាំង។
លោកឡាវរ៉ូវបាននិយាយនៅក្នុងសន្និសីទសារព័ត៌មានរួមជាមួយអនុប្រធានាធិបតីវេណេហ្ស៊ូអេឡា Delcy Rodriguez នៅទីក្រុងម៉ូស្គូថា «លោក Elliot Abrams គ្រាន់តែបង្កើនស្ថានការណ៍ ដែលបង្កឲ្យមានការផ្ទុះឡើង និងបង្ហូរឈាមនៅប្រទេសវេណេហ្ស៊ុយអេឡា ដើម្បីបង្ហាញពីការធ្វើអន្តរាគមន៍យោធាដូចបំណងរបស់សហរដ្ឋអាមេរិក» ។
ដោយឡែក លោក Abrams បានឆ្លើយតបនឹងសុន្ទរកថាទាំងនេះនៅឯសន្និសីទមួយថា «ខ្ញុំមិនគិតថា គាត់ពិតជាជឿថា យើងកំពុងព្យាយាមធ្វើដូច្នោះនោះទេ»។
ភាពតានតឹងបន្តឡើងកម្តៅចាប់តាំងពីសហរដ្ឋអាមេរិកបានទទួលស្គាល់លោកហ្កៃដូជាប្រធានាធិបតីស្តីទីនៃប្រទេសវ៉េណេហ្ស៊ូអេឡា។ ភាពតាតឹងខ្លាំងបានផ្ទុះឡើងក្រោយមានការប៉ះទង្គិចគ្នានៅព្រំដែន បន្ទាប់ពីម៉ាឌូរ៉ូបញ្ជាបិទច្រកព្រំដែន៕
