ដែនទឹកអន្តរជាតិនៃមហាសមុទ្រប៉ាស៊ីហ្វិក ឬដែលគេហៅថា សមុទ្រចិនខាងត្បូង គឺជាដែនទឹកអន្តរជាតិ មានន័យថា អ្នកណាក៏ដោយក៏អាចធ្វើនាវាចរណ៍ដោយសេរីនៅលើដែនទឹកនេះបានដោយសេរី ទោះបីជាកម្ពុជា វៀតណាម លាវ មាល់ឌីវ ឥណ្ឌា អាមេរិកាំង បារាំង អាល្លឺម៉ង់ អង់គ្លេសក៏ដោយ។ ទោះបីជាក្នុងលក្ខណ្ឌណាក៏ដោយ ដែនទឹកអន្តរជាតិនៃមហាសមុទ្រប៉ាស៊ីហ្វិក ត្រូវតែជាតំបន់ដែនទឹករួមជាដាច់ខាត។
សារព័ត៌មាន News Week របស់អាមេរិកបានចេញផ្សាយនៅថ្ងៃទី១៩ មីនានេះថា ទីក្រុងប៉េកាំងកំពុងបោះជំហានទៅមុខជាមួយនឹងការបង្កើតទីក្រុងកោះ ដែលស្ថិតនៅក្នុងតំបន់ដែនទឹកអន្តរជាតិកំពុងមានជម្លោះ បើទោះបីជាទីក្រុងប៉េកាំងបានទទួលរងនូវការរិះគន់យ៉ាងខ្លាំងពីសំណាក់សហរដ្ឋអាមេរិក និងពិភពលោកទាំងមូលក៏ដោយ។
ទីក្រុង Sansha ដែលចិនអះអាងថាជាទឹកដីភាគខាងត្បូងរបស់ខ្លួន បានប្រកាសពីផែនការកែប្រែកោះ Woody Island ឬ Yongxing ជាភាសាចិន និងប្រជុំកោះចំនួន ២ផ្សេងទៀត គឺកោះ Tree និង Drumppond ទៅជាមូលដ្ឋានភស្តុភា និងសេវាកម្មយុទ្ធសាស្ត្រសំខាន់របស់ជាតិវិញ។ នេះបើតាមកាសែត The South China Morning Post ដែលបានរាយការណ៍កាលពីថ្ងៃចន្ទ។
លោក Zhang Jun លេខាបក្សកុម្មុយនិស្តប្រចាំក្រុង Sansha បាននិយាយនៅក្នុងសេចក្តីថ្លែងការណ៍មួយថា «យើងត្រូវរៀបចំផែនការឲ្យបានល្អិតល្អន់លើការអភិវឌ្ឍន៍កោះ និងថ្មប៉ប្រះទឹកដោយផ្អែកលើមុខងារផ្សេងៗរបស់ពួកគេដោយយកចិត្តទុកដាក់លើទំនាក់ទំនងគ្នាទៅវិញទៅមក»។ លោកបាននិយាយថា ការអភិវឌ្ឍន៍នេះ នឹងអនុវត្តតាមការណែនាំពីលោកស៊ីជីនពីង (Xi Jinping) ហើយថា «មន្ត្រីមូលដ្ឋាននឹងចាត់វិធានការយ៉ាងសកម្ម និងបង្ហាញពីការផ្តួចផ្តើមរបស់ខ្លួន ដើម្បីផ្តល់នូវរបាយការណ៍របាយការណ៍ ដែលគួរអោយពេញចិត្ត»។
ការប្រកាសពីការបង្កើតទីក្រុងកោះនៅលើដែនទឹកអន្តរជាតិពីសំណាក់ទីក្រុងប៉េកាំងនេះ បានធ្វើឡើងចំពេលដែលស្ថានការណ៍នៅក្នុងតំបន់នេះ កំពុងតែឡើងកម្តៅកាន់តែខ្លាំង។ សហរដ្ឋអាមេរិក និងអន្តរជាតិបានរិះគន់ធ្ងន់ៗដោយឥតបន្ធូរដៃជុំវិញការវ៉ាងទីរបស់ចិន នៅក្នុងតំបន់ដែនទឹកអន្តរជាតិ។ សហរដ្ឋអាមេរិកបានហៅទង្វើដ៏គឃ្លើនរបស់ចិនថា គឺជារឿងខុសច្បាប់។ ថ្មីៗស្រឡាងនេះ លោករដ្ឋមន្ត្រីការបរទេសសហរដ្ឋអាមេរិកបានហៅពេញៗមាត់ថា មូលដ្ឋានខុសច្បាប់របស់ចិននៅតំបន់ដែនទឹកអន្តរជាតិ។
លោករដ្ឋមន្ត្រីការបរទេសសហរដ្ឋអាមេរិកបានព្រមានថា សហរដ្ឋអាមេរិកនឹងចូលអន្តរាគមន៍ជួយហ្វីលីពីន ប្រសិនបើហ្វីលីពីនត្រូវរងការវាយប្រហារណាមួយ នៅក្នុងតំបន់ដែនទឹកអន្តរជាតិ ឬនៅក្នុងសមុទ្រហ្វីលីពីនខាងលិច។
ការប្រកាសពីការអភិវឌ្ឍទីក្រុងកោះពីសំណាក់ចិននេះ ក៏បានធ្វើឡើងភ្លាមៗ បន្ទាប់ពីសហរដ្ឋអាមេរិកបានបញ្ជូនយន្តហោះទម្លាក់គ្រាប់បែក B-52 ចំនួន ២គ្រឿងទៅហោះរំលងតំបន់ដែនទឹកអន្តរជាតិ។ ជាមួយគ្នានេះដែរ អ្នកវិភាគនិយាយថា សហរដ្ឋអាមេរិកបានខោកក្បាលទីក្រុងប៉េកាំង ពាក់ព័ន្ធទៅនឹងការបញ្ជូននាវាចម្បាំង USS Blue Ridge ទៅបោះយុថ្កានៅហ្វីលីពីន ចំពេលជាមួយការបញ្ជូនយន្តហោះទម្លាក់គ្រាប់បែកទៅហោះរំលងតំបន់សមុទ្រចិនខាងត្បូង។
សូមបញ្ជាក់ថា បច្ចុប្បន្ននេះ ទីក្រុងប៉េកាំងកំពុងតែវ៉ាងទីផ្តាច់មុខលើតំបន់ដែនទឹកអន្តរជាតិ និងកំពុងតែកាន់កាប់ប្រជុំកោះនៅក្នុងតំបន់ដែនទឹកអន្តរជាតិនៃមហាសមុទ្រប៉ាស៊ីហ្វិកដោយខុសច្បាប់។ ក្រៅពីនេះ ទីក្រុងប៉េកាំងថែមទាំងបានហៅសកម្មភាពធ្វើនាវាចរណ៍ និងធ្វើការហោះហើរដោយសេរីរបស់អាមេរិកនៅក្នុងតំបន់នេះថាជាការបង្កហេតុថែមទៀតផង។ មេបញ្ជាការទ័ពជើងទឹកចិនបានបោះពាក្យគម្រាមថា រាល់នាវាពិឃាត នាវាផ្ទុកយន្តហោះ ឬរាល់នាវាចម្បាំងអាមេរិកទាំងឡាយណា ឲ្យតែហ៊ានឆ្លងកាត់តំបន់សមុទ្រចិនខាងត្បូងរបស់យើងនឹងត្រូវបាញ់ពន្លិក។ ក្រោយការគម្រាមនេះ អាមេរិកផ្ទុះកំហឹងនិងបានបញ្ជូននាវាចម្បាំងពីរគ្រឿង ទៅផុសនៅលើផ្ទៃទឹកអន្តរជាតិឲ្យចិនបាញ់ លមើល។ មេបញ្ជាការកងទ័ពជើងទឹកសហរដ្ឋអាមេរិកប្រចាំតំបន់ឥណ្ឌាប៉ាស៊ីហ្វិកបានបោះពាក្យថា ដើម្បីបញ្ឈប់ពីការវ៉ាងទី និងកាន់កាប់ដោយខុសច្បាប់នៅលើដែនទឹកអន្តរជាតិបាន មានតែសេនារីយ៉ូមួយគត់ នោះគឺការប្រកាសសង្គ្រាមជាមួយទីក្រុងប៉េកាំងដោយផ្ទាល់តែម្តង៕
