…ប្រុសណាមិនស្លុតនៅពេលមកដល់ផ្ទះស្រាប់តែបាត់ប្រពន្ធហើយទទួលបានដំណឹងថាប្រពន្ធដឹកដៃប្រុសផ្សេងរត់ទៅបាត់ហើយ។ដូចជាបុរសម្នាក់នេះយ៉ាងអញ្ជឹងដើរយំយ៉ាងគគ្រូកស្វែងរកមើលប្រពន្ធនៅតាមដងផ្លូវ…រួចមកហើយ មកពឹងលោកប៉ូលិសឲ្យជួយស្វែងរកផងដែរ។ដំបូងឡើយ ដោយសារជីវភាពខ្វះខាត បុរសជាប្តីបាន នាំប្រពន្ធចាកចេញពីស្រុកកំណើតមក ធ្វើការនៅរោងចក្រ ឯភ្នំពេញ ដឹងអីស្រីជាប្រពន្ធទៅលួចលាក់ទាក់ទងស្នេហាជាមួយប្រុសក្មេង ហើយលួចពង្រត់គ្នាទៅបាត់ ប្តីបានត្រឹមសម្រក់ទឹកភ្នែកដឹកដៃកូនតាមរកគ្រប់ទីកន្លែង និងប្តឹងសមត្ថកិច្ច នៅប៉ុស្តិ៍រដ្ឋបាលកាកាបទី២ ខណ្ឌពោធិ៍សែនជ័យ។
បុរស ជាប្តី ឈ្មោះ មុំ មឿន អាយុ៣៦ឆ្នាំ មុខរបរ ដើររកត្រី រស់នៅភូមិត្នោតទោល ឃុំព្រះស្តេច ស្រុកព្រះស្តេច ខេត្តព្រៃវែង ។ ចំណែកប្រពន្ធ ឈ្មោះ មឿន ស្រី អាយុ២៣ឆ្នាំ មុខរបរ កម្មការនីរោងចក្រ ស្នាក់នៅផ្ទះជួល ជាប់របងវត្តតាំងកសាងខាងជើង ភូមិចម្ការឪឡឹក២ សង្កាត់កាកាបទី២ ខណ្ឌពោធិ៍សែនជ័យ មានស្រុកកំណើតនៅស្រុកព្រះស្តេច ខេត្តព្រៃវែង ។អ្នកស្រី ខឹម មួន អាយុ៦០ឆ្នាំ មុខរបរ ដើរស៊ីឈ្នួលគេ ត្រូវជាម្តាយខាងស្រី ស្នាក់នៅជាមួយកូនៗទាំង២នាក់ នៅចំណុចខាងលើ បានឲ្យដឹងថា កាលពីព្រឹក ខណ:គាត់ជាប់រវល់ទៅពិនិត្យព្យាបាល កូនស្រីបង្កើតរបស់គាត់ បានរត់ចេញពីផ្ទះជួលបាត់ ចោលប្តី និងកូនប្រុសស្រី២នាក់ ហើយតាមដឹង កូនស្រីរបស់គាត់ពង្រត់គ្នាទៅជាមួយយុវជនម្នាក់ ដែលស្នាក់នៅក្នុងវត្តតាំងកសាងខាងជើង ដោយមិនដឹងថា នាំគ្នារត់ទៅណានោះទេ។ បុរសជាប្តី ឈ្មោះ មុំ មឿន បានឲ្យដឹងថា គាត់រៀបការត្រឹមត្រូវជាមួយប្រពន្ធរបស់គាត់ នៅស្រុកព្រះស្តេច ខេត្តព្រៃវែង កាលពីអំឡុងឆ្នាំ២០១១ពេលនេះ មានកូន២នាក់ ប្រុសម្នាក់ អាយុ៤ឆ្នាំ និងស្រីម្នាក់ អាយុ៦ឆ្នាំ ជាចំណងស្នេហ៍ ។ តែដោយសារជីវភាពខ្វះខាត គាត់បាននាំប្រពន្ធចាកចេញពីស្រុកកំណើត មកស្នាក់នៅផ្ទះជួល ជាប់របងវត្តតាំងកសាងខាងជើង ភូមិចម្ការឪឡឹក២ សង្កាត់កាកាបទី២ ខណ្ឌពោធិ៍សែនជ័យ ដោយឲ្យប្រពន្ធចូលធ្វើជាកម្មការិនីរោងចក្រ ហើយគាត់ដើររកត្រី។
បុរសជាប្តីបានរៀបរាប់ទាំងទឹកភ្នែកថា មុនពេលរត់បាត់ ប្រពន្ធរបស់គាត់លួចបង្កាត់ភ្លើងស្នេហាត្រីកោណជាមួយយុវជនម្នាក់ស្នាក់នៅក្នុងវត្តតាំងកសាងខាងជើង តែមិនដឹងថា ស្នេហាស៊ីជម្រៅដល់កម្រិតណានោះទេ ស្រាប់តែនៅព្រឹកថ្ងៃទី០៥ ខែមករា នៅពេលគាត់ត្រឡប់មកពីបាចត្រីវិល ស្រាប់តែបាត់ប្រពន្ធពីផ្ទះជួល ហើយយុវជនម្នាក់ដែលស្នាក់នៅក្នុងវត្តតាំងកសាងខាងជើង នោះ ក៍បាត់ដែរ គាត់សន្និដ្ឋានថាប្រពន្ធ និងយុវជនម្នាក់នោះ ពង្រត់គ្នាទៅបាត់តែម្ដង៕
