វាគឺជារឿងដែលគួរឲ្យអណោចអធមមួយនៅពេលដែលទទួលបានដំណឹងថា ក្មេងស្រីម្នាក់ដែលបានបាត់ខ្លួននៅក្នុងព្រៃប្រទេសម៉ាឡេស៊ី នៅពេលនេះ ត្រូវបានគេរកឃើញ និងប្រកាសថាបានស្លាប់ហើយដោយសារតែដាច់ពោះស្លាប់ ដោយសារគ្មានអ្វីទទួលទាន។
សាកសពរបស់ក្មេងស្រី Nora Quoirin ត្រូវបានរកឃើញ បន្ទាប់ពីប្រតិបត្តិការរុករកអស់រយៈពេល១០ថ្ងៃ ក្រោយពេលនាងបាត់ខ្លួនអំឡុងពេលលំហែរកាយជាមួយក្រុមគ្រួសារ។ លទ្ធផលនៃការធ្វើកោសល្យវិច្ច័យសាកសព បានបង្ហាញថា នាងស្លាប់ដោយសារតែអត់តហារទទួលទាន រហូតដល់ដាច់ពោះស្លាប់តែម្តង។
ក្រុមនគរបាល បាននិយាយនៅសាលតម្កល់សពថា គ្មានភស្តុតាងនៃការចាប់ពង្រាត់ ឬចាប់ជម្រិតនោះទេ។
ក្មេងស្រី Nora ដែលកើតមានបញ្ហាខួរ ហើយងាយនឹងរងគ្រោះថ្នាក់បំផុតនោះ បានបាត់ខ្លួន កាលពីថ្ងៃអង្គារសប្តាហ៍មុន នៅជិតស្ទឹងតូចមួយ ស្ថិតនៅចម្ងាយប្រហែល១.៦ម៉ៃល៍ប៉ុណ្ណោះ ពីរមណីដ្ឋាន Dusun ជាកន្លែងដែលនាងបំពេញវិស្សមកាលជាមួយឪពុកម្តាយរបស់នាង និងបងប្អូនបង្កើត២នាក់របស់នាង។ គ្រួសាររបស់នាង បាននិយាយថា ពួកគេខូចចិត្តខ្លាំងណាស់ ពួកគេចាត់ទុកនាងថាជាក្មេងស្រីដ៏មានតម្លៃបំផុត ហើយយើងស្រលាញ់នាងខ្លាំងបំផុត។
ពួកគេបាននិយាយថា ក្មេងស្រី Noraដែលរស់នៅទីក្រុងឡុងដ៍ និងជាកូនកាត់ក្នុងគ្រួសារឪពុកម្តាយជាជនជាតិបារាំង និងអៀរឡង់ នោះ បានធ្វើឲ្យពិភពលោកក្តុកក្តួលយ៉ាងខ្លាំង ក្រោយការបាត់ខ្លួនរបស់នាង បង្កឲ្យមានប្រតិបត្តិការរុករកទ្រង់ទ្រាយធំនៅក្នុងប្រទេសម៉ាឡេស៊ី និងការជូនពរឲ្យសំណាងល្អនៅទូទាំងសកលោក។
ទោះបីជាយ៉ាងណាក៏ដោយ ស្នងការនគរបាលរដ្ឋ Negeri Sembilan លោក Mohamad Mat Yusop បានអះអាងថា គ្មានភស្តុតាងណាមួយដែលអាចបញ្ជាក់ថា ក្មេងស្រីម្នាក់នេះ ត្រូវបានគេចាប់ពង្រាត់ ឬចាប់រំលោភនោះទេ។ នាងស្លាប់ដោយសារតែការអត់អាហារ និងការកើតរោគស្ត្រេសក្នុងអំឡុងពេលដ៏យូរ។
សូមបញ្ជាក់ថា មនុស្សរាប់ពាន់នាក់ បានចូលរួមប្រតិបត្តិការរុករកនេះ ហើយក្រុមអ្នកស្ម័គ្រ គឺជាអ្នករកឃើញសាកសពរបស់នាងមុនគេនៅក្នុងព្រៃជ្រៅ៕
