សេចក្តីរាយការណ៍ព័ត៌មានពីរដ្ឋធានីរបស់កូរ៉េខាងជើង ពីសម្តីមន្ត្រីជាន់ខ្ពស់មួយរូប បានឲ្យដឹងថា កូរ៉េខាងជើង កំពុងពិចារណាលើការផ្អាកកិច្ចប្រជុំជាមួយសហរដ្ឋអាមេរិក ហើយមេដឹកនាំរបស់ពួកគេ អាចនឹងគិតគូរឡើងវិញចំពោះបំរាមមកលើការសាកល្បងមីស៊ីលរបស់ពួកគេ។
ទីភ្នាក់ងារព័ត៌មានរុស្ស៊ី TASSបានរាយការណ៍ថា ក្រោយបរាជ័យនៅជំនួបកំពូលរវាងប្រនាធិបតីសហរដ្ឋអាមេរិក លោកដូណាល់ ត្រាំ និងមេដឹកនាំកូរ៉េខាងជើងលោកគីម ជុងអ៊ុន ប្រេសិតពិសេសនុយក្លេអ៊ែរកំពូលមួយរូបរបស់កូរ៉េខាងជើង បាននិយាយថា មេដឹកនាំរបស់លោក កំពុងពិចារណាទៅលើការលប់ចោលកិច្ចប្រជុំរំសាយអាវុធនុយក្លេអ៊ែរ។
ទីភ្នាក់ងារព័ត៌មានមួយនេះ បានរាយការណ៍សម្តីអនុរដ្ឋមន្ត្រីការបរទេសកូរ៉េខាងជើងលោកស្រី ឆូ សុនហួយថា យើងគ្មានបំណងផ្តល់ជូនតាមការទាមទាររបស់សហរដ្ឋអាមេរិកនៅជំនួបកំពូលក្នុងទីក្រុងហាណូយនោះទេ ទោះបីក្នុងរូបភាពបែបណាក៏ដោយ ហើយយើងក៏មិនចង់ចូលរួមកិច្ចចរចាបែបហ្នឹងទៀតដែរ។
ទីភ្នាក់ងារព័ត៌មានដដែលបានរាយការណ៍ទៀតថា ក្នុងពេលដ៏ខ្លីខាងមុខនេះ លោកគីម ជុងអ៊ុន គ្រោងនឹងប្រកាសផ្លូវការនូវគោលជំហររបស់លោកពាក់ព័ន្ធនឹងកិច្ចប្រជុំជាមួយសហរដ្ឋអាមេរិក ហើយនិងវិធានការបន្ថែមទៀតរបស់កូរ៉េខាងជើង។
សេចក្តីអត្ថាធិប្បាយរបស់លោកស្រី ឆូ សុនហួយ បានផ្ទុយស្រឡះនឹងសុទិដ្ឋិនិយម របស់លោកស្តេហ្វិន ប៊ីហ្គិន គឺជាប្រេសិតពិសេសសហរដ្ឋអាមេរិក ប្រចាំនៅកូរ៉េខាងជើង ពាក់ព័ន្ធនឹងទស្សនីយភាពនៃកិច្ចប្រជុំនុយក្លេអ៊ែរ។
លោកប៊ីហ្គិន បាននិយាយប្រាប់សន្និសីទកាសែតនៅក្នុងទីក្រុងវ៉ាស៊ីងតោនក្នុងសប្តាហ៍នេះថា ទំនាក់ទំនងការទូតនៅរស់រាននៅឡើយ ថ្វីត្បិតតែមានជំនួបបរាជ័យកាលពីខែមុនក៏ដោយ។
លោកប៊ីហ្គិន បាននិយាយថា ទីក្រុងវ៉ាស៊ីងតោន កំពុងឃ្លាំមើលគ្រប់វិនាទីរាល់សកម្មភាពចុងក្រោយគេនៅទីតាំងបាញ់រ៉ុក្កែតរបស់កូរ៉េខាងជើង ប៉ុន្តែលោកមិនបានដឹងនោះទេ ថាតើទីក្រុងព្យុងយ៉ាង អាចនឹងបាញ់សាកល្បងរ៉ុក្កែតថ្មីឬយ៉ាងណានោះទេ។
លោកប៊ីហ្គិន បានទទួលស្គាល់ថា ភាគីប្រទេសទាំង២ នៅតែខ្វែងគំនិតគ្នានៅឡើយលើការរំសាយអាវុធនុយក្លេអ៊ែរ ហើយលោកបានធ្វើការសង្កត់ធ្ងន់ថា កូរ៉េខាងជើង គួរតែបង្ហាញការប្តេជ្ញាចិត្តពេញលេញរបស់ពួកគេ។
ជំនួបកំពូលមួយនេះ បញ្ចប់ទៅមិនទទួលបានការកិច្ចព្រមព្រៀងណាមួយនោះទេ ក្រោយលោកត្រាំ បដិសេធន៍ការផ្តល់ជូនរបស់កូរ៉េខាងជើង ក្នុងការបំផ្លាញចោលទីតាំងនុយក្លេអ៊ែរ Yongbyon ដើម្បីដោះដូរនឹងការដកចេញទណ្ឌកម្មទាំងអស់។
លោកត្រាំ បាននិយាយថា លោកសុំទទួចឲ្យកូរ៉េខាងជើងបំផ្លាញទីតាំងនុយក្លេអ៊ែរទាំងអស់របស់ពួកគេ ហើយលោកបានប្រកាសថា សហរដ្ឋអាមេរិក បានរកឃើញទីតាំងចម្រាញ់សារធាតុអ៊ុយរ៉ានីញ៉ូមលាក់បាំងរបស់ទីក្រុងព្យុងយ៉ាង។
គួរឲ្យដឹងថា កូរ៉េខាងជើង បានផ្អាកកម្មវិធីបាញ់សាកល្បងមីស៊ីល និងនុយក្លេអ៊ែររបស់ខ្លួនក្នុងឆ្នាំ២០១៧ ប៉ុន្តែរូបភាពពីផ្កាយរណបកាលពីពេលថ្មីៗនេះ បង្ហាញថា កូរ៉េខាងជើង អាចនឹងកសាងឡើងវិញទីតាំងបាញ់រ៉ុក្កែតរបស់ពួកគេ ដែលត្រូវបានបំផ្លាញដោយអន្លើ កាលពីឆ្នាំមុន។
ទោះបីជាយ៉ាងណាក៏ដោយ ការិយាល័យប្រធានាធិបតីកូរ៉េខាងត្បូង បានបដិសេធន៍មិនធ្វើធ្វើសេចក្តីអធិប្បាយលើអនុសាសន៍របស់លោកស្រី ឆូ ប៉ុន្តែពួកគេបាននិយាយថា នឹងគាំទ្ររាល់កិច្ចខិតខំប្រឹងប្រែងទាំងអស់ ដើម្បីគាំទ្រការចាប់ផ្តើមកិច្ចប្រជុំនុយក្លេអ៊ែរឡើងវិញ៕
Home ព្រឹត្តិការណ៍ថ្មីៗ វីវរធំហើយពេលនេះ! កូរ៉េខាងជើងគំរាមបញ្ចប់ចរចារំសាយនុយក្លេអ៊ែរជាមួយអាមេរិក និងចាប់ផ្តើមសាកល្បងមីស៊ីលឡើងវិញ