សារព័ត៌មាន Harrestz របស់អ៊ីស្រាអែលបានចេញផ្សាយនៅថ្ងៃទី២០ មីនានេះថា អ៊ីស្រាអែល និងក្រិចកំពុងសាងសង់ប្រព័ន្ធរ៉ាដាការពារដែនសមុទ្រ។ នេះបើតាមរបាយការណ៍ពីកាសែត Kathimerini។ កាសែតនេះបាននិយាយថា រ៉ាដាដែលដាក់បញ្ឈរនៅលើផ្ទៃដីថ្មីនេះនឹងអាចតាមដានបានក្នុងរយៈចម្ងាយឆ្ងាយ អាចតាមដានហួសព្រំដែនកំណត់ ហើយអ៊ីស្រាអែល និងក្រិចនឹងអាចបង្កើនការគ្របដណ្តប់របស់ខ្លួនបានកាន់តែមានប្រសិទ្ធិភាព។
របាយការណ៍បន្តទៀតថា គម្រោងនេះ គឺជាផ្នែកមួយនៃសម្ព័ន្ធមិត្តនយោបាយក្នុងចំណោមអ៊ីស្រាអែល ក្រិច និងប្រទេសស៊ីប។ ទំនាក់ទំនងរវាងអ៊ីស្រាអែល និងក្រិចកាន់តែមានភាពស្និទស្នាលជាមួយគ្នាកាន់តែខ្លាំងខាងវិស័យសេដ្ឋកិច្ច និងយោធា ដើម្បីចំណេញលើការរក្សាឧស្ម័នរវាងប្រទេសទាំងពីរ។ ដើម្បីពង្រឹងខាងវិស័យយោធា ប្រទេសទាំងពីរបានធ្វើសមយុទ្ធរួមគ្នាថែមទៀតផង។
សារព័ត៌មានរ៉យទ័របានរាយការណ៍នៅឆ្នាំ ២០១៥ ថាអ៊ីស្រាអែលបានហ្វឹកហាត់ប្រឆាំងនឹងប្រព័ន្ធប្រឆាំងមីស៊ីល S-300 នៅក្នុងប្រទេសក្រិច មុនពេលមីស៊ីលនេះត្រូវបានដាក់ពង្រាយនៅស៊ីរី និងអ៊ីរ៉ង់។
អ៊ីស្រាអែល និងស៊ីបមានឧស្ម័នបម្រុងនៅក្នុងដែនទឹករួមរបស់ពួកគេ និងមានបំណងចង់នាំឧស្ម័នចេញទៅកាន់អ៊ឺរ៉ុបរួមជាមួយទាំងប្រទេសក្រិចផង។ អ៊ីស្រាអែល និងស៊ីប បានអះអាងរៀងៗខ្លួនថា ពួកគេបានរកឃើញឧស្ម័នដ៏មហាសាល ដែលជាកត្តាញ៉ាំងឲ្យពួកគេក្លាយជាប្រទេសនាំចេញឧស្ម័នដ៏ធំ៕
