លោកនាយករដ្ឋមន្ត្រីឥណ្ឌា ណារ៉េនដ្រា ម៉ូឌីបាននិយាយនៅក្នុងការថ្លែងសន្ទរកថាកាលពីថ្ងៃពុធមួយថា ឥណ្ឌាបានបង្កើតនូវកម្លាំងអវកាសដោយខ្លួនឯងតាមរយៈការបង្កើតឡើងនូវគ្រាប់មីស៊ីលប៉ាឡេស្ទីកស្ទាក់ចាប់ ដែលអាចបាញ់បានរហូតដល់ ៣០០គីឡូម៉ែត្រ ដើម្បីកម្ទេចផ្កាយរណបដែលវិញជុំវិញផែនដី។
កាសែត The Times of India បានចេញផ្សាយនៅថ្ងៃទី2 មេសា ២០១៩នេះថា ទីក្រុងញូដេលីបានធ្វើការសាកល្បងគ្រាប់មីស៊ីលប្រឆាំងផ្កាយរណប ដើម្បីបញ្ជូនសារទៅកាន់គូសត្រូវចិន និងប៉ាគីស្ថានរបស់ខ្លួន។
កាសែតដដែលបានឲ្យដឹងថា ការសាកល្បងនេះបានផ្លាស់ប្តូរការគណនាយុទ្ធសាស្ត្រតាមរយៈការផ្តល់ឲ្យឥណ្ឌានូវលទ្ធភាព ក្នុងការបាញ់ទម្លាក់ផ្កាយរណគូសត្រូវរបស់ខ្លួន។
កាសែត The Times of India ក៏បានស្រង់សម្តីមេបញ្ជាការទ័ពអាកាសឥណ្ឌា លោក Ajey Lele ដែលបាននិយាយជាមួយនឹងការសាកល្បងមីស៊ីលប្រឆាំងផ្កាយរណបថា ឥណ្ឌាបញ្ជូនសារទៅកាន់គូសត្រូវរបស់ខ្លួន ដែលជាមហាអំណាចយោធាដ៏ក្លាំងក្លា។ លោកបានបន្ថែមថា «ប្រសិនបើនរណាម្នាក់ចង់ធ្វើអ្វីមួយមកលើផ្កាយរណបរបស់យើង យើងមានសមត្ថភាពធ្វើរឿងនេះចំពោះផ្កាយរណបរបស់យើង»។
លោក John Blaxland ដែលជាប្រធានមជ្ឈមណ្ឌលសិក្សាការពារជាតិ និងយុទ្ធសាស្ត្រនៅឯសាកលវិទ្យាល័យជាតិអូស្ត្រាលីត្រូវបានស្រង់សម្តីដោយកាសែត The Times of India ដោយលោកបានអះអាងថា ការសាកល្បងប្រព័ន្ធមីស៊ីលប្រឆាំងផ្កាយរណបចង្អុរបង្ហាញថា ប្រទេសជិតខាងឥណ្ឌានឹងត្រូវគិតឡើងវិញឲ្យបានពីរដង មុននឹងឈានទៅរកការប៉ះទង្គិចគ្នាខាងអវកាសជាមួយឥណ្ឌា។
កាលពីថ្ងៃពុធ លោកនាយករដ្ឋមន្ត្រីឥណ្ឌា ណារ៉េនដ្រា ម៉ូឌីបាននិយាយនៅក្នុងសន្ទរកថាជាតិមួយថា ឥណ្ឌាបានទទួលជោគជ័យជាប្រវត្តិសាស្ត្រតាមរយៈការបាញ់ទម្លាក់ផ្កាយរណប ដែលវិញជុំវិញផែនដី ក្នុងរយៈកម្ពស់ទាប ជាមួយគ្រាប់មីស៊ីលបាញ់ពីដីទៅអាកាស ក្នុងរយៈពេល ៣នាទី។ លោកបានសង្កត់ធ្ងន់ថា ឥណ្ឌាបានលេចឡើងជាប្រជាជាតិទីបួន ក្នុងការបង្កើតសមត្ថភាពបាញ់ផ្កាយរណបដូចជារុស្ស៊ី សហរដ្ឋអាមេរិក និងចិន។
ការសាកល្បងមីស៊ីលប្រឆាំងផ្កាយរណបពីសំណាក់ឥណ្ឌានេះ បានលេចឡើង ខណៈដែលឥណ្ឌាកំពុងមានភាពតានតឹងជាមួយចិន និងប៉ាគីស្ថាន។ ភាពតានតឹងជាមួយប៉ាគីស្ថាន បន្ទាប់ពីកងកម្លាំងឥណ្ឌាជាង ៤០នាក់ត្រូវបានសម្លាប់ដោយការបំផ្ទុះគ្រាប់បែក នៅក្នុងតំបន់កាស្មៀរគ្រប់គ្រងដោយឥណ្ឌា។ ឥណ្ឌាចោទថា ប៉ាគីស្ថានជាអ្នកនៅពីក្រោយខ្នង។ ឥណ្ឌាបានបើកការវាយប្រហារទៅលើក្រុមភេរវករ នៅលើទឹកដីប៉ាគីស្ថាន រីឯប៉ាគីស្ថានបានវាយបកទៅលើឥណ្ឌា ដែលព្រហើនហ៊ានវាយចូលទឹកដីខ្លួន ដោយមិនបានសុំការអនុញ្ញាត។ រីឯភាពតានតឹងជាមួយចិនវិញ ឥណ្ឌាធ្លាប់មានជម្លោះជាមួយចិន ពាក់ព័ន្ធទៅនឹងតំបន់មានជម្លោះ។ ឥណ្ឌាបានបញ្ជូនកងទ័ពយ៉ាងសន្ធឹកសន្ធាប់ទៅប្រឈមជាមួយចិន ខណៈដែលចិនបានធ្វើការដ្ឋានសំណង់នោកក្នុងតំបន់មានជម្លោះ ប៉ុន្តែត្រូវកងទ័ពឥណ្ឌាបញ្ឈប់ការដ្ឋាននោះ ដែលបានបង្កជាភាពតានតឹងនឹងគ្នាមកដល់ពេលនេះ៕
