យោងតាមសារព័ត៌មាន The Weather News កាលពីពេលកន្លងទៅនេះ ភ្លើងឆេះព្រៃដ៏ខ្លាំងក្លាមិនធ្លាប់មានក្នុងប្រវត្តិសាស្ត្រកូរ៉េខាងត្បូង បានវាយប្រហារនៅពាសពេញភាគខាងជើងនៃប្រទេសនេះ ដែលបានញ៉ាំងឲ្យមានការប្រកាសភាពអាសន្ន បន្ទាប់ពីមនុស្សរាប់ពាន់នាក់ បានរត់ភៀសខ្លួន។
យ៉ាងហោចណាស់មានមនុស្ស ២នាក់បានស្លាប់ និង ១១នាក់ផ្សេងទៀតរងរបួស ក្រោយពេលដែលភ្លើងឆេះព្រៃបានចាប់ផ្តើមនៅវេលាម៉ោង ៧យប់ម៉ោងក្នុងស្រុក កាលពីថ្ងៃព្រហស្បតិ៍នៅក្នុងទីប្រជុំជនរមណីយដ្ឋា Gangwon ដែលស្ថិតនៅភាគខាងជើងនៃខេត្តហ្កាងវ៉ុន ឬស្ថិតនៅចម្ងាយ ១៦០គីឡូម៉ែត្រពីទីក្រុងសេអ៊ូល។ ភ្លើងឆេះព្រៃនេះបានរាលដល់ទៅជិតភ្នំជាច្រើន និងទីប្រជុំជនមួយចំនួនផ្សេងទៀត។
អគ្គីភ័យនោះត្រូវបានគេរាយការណ៍ថា បានបង្កឡើងដោយឧបករណ៍ភ្លើងត្រង់ស្វមម៉ាទ័រខុសបច្ចេកទេស ដែលជាហេតុជម្រុញឲ្យប្រធានាធិបតីកូរ៉េខាងត្បូងប្រកាសភាពអាសន្នជាតិកាលពីថ្ងៃសុក្រ។
អគ្គីភ័យនៅតែឆាបឆេះនៅតាមតំបន់មួយចំនួនប៉ុន្តែត្រូវបានគ្រប់គ្រងនៅរសៀលថ្ងៃសុក្រ ដោយមានការចូលរួមយ៉ាងសស្រាក់សស្រាំពីសំណាក់ទាហានជាង ១៦ ៥០០នាក់។ នេះបើតាមសេចក្តីរាយការណ៍ពីសារព័ត៌មាន BBC។ ឧទ្ធម្ភាគចក្រយោធាចំណួន ៣២គ្រឿង និងយានយោធាចំនួន ២៦គ្រឿងត្រូវបានដាក់ពង្រាយទៅកាន់តំបន់ភ្លើងឆេះព្រៃនោះ។
កាសែត Herald បានរាយការណ៍ ថាមនុស្សជាង ៤ពាន់នាក់ត្រូវបានជម្លៀស កាលពីល្ងាចថ្ងៃព្រហស្បតិ៍ ប៉ុន្តែភាគច្រើននៃពួកគេបានត្រឡប់ទៅផ្ទះរបស់ពួកគេវិញ នៅរសៀលថ្ងៃសុក្រ៕
