ប្រឈមទៅនឹងការគម្រាមកំហែងកាន់តែខ្លាំងពីសំណាក់រុស្ស៊ីនៅក្នុងតំបន់អាក់ទិច កងកម្លាំងឆ្មាំសមុទ្រសហរដ្ឋអាមេរិកបានអំពាវនាវឲ្យមានការពង្រឹងសមត្ថភាពរបស់ខ្លួនឲ្យកាន់តែខ្លាំងជាងមុនបន្ថែមទៀត ដើម្បីប្រឆាំងទៅនឹងវត្តមានរុស្ស៊ី និងចិន ដែលកំពុងតែរីកដុះដាលនៅក្នុងតំបន់អាក់ទិច។ កងកម្លាំងឆ្មាំឆ្នេរសមុទ្រសហរដ្ឋអាមេរិកបានប្រកាសពីយុទ្ធសាស្ត្រនាតំបន់អាក់ទិចកាលពីថ្ងៃចន្ទ។
កងកម្លាំងបាននិយាយថា តំបន់អាក់ទិចបានក្លាយជាតំបន់មួយ ដែលមានការប្រកួតប្រជែងគ្នាយ៉ាងខ្លាំង ខណៈដែលទឹកកកកំពុងរលាយដោយសារតែការឡើងកំដៅនៃពិភពលោក ដែលវាបង្កើនលទ្ធភាពប្រើប្រាស់ក៏ដូចជាលទ្ធភាពសម្រាប់ការអភិវឌ្ឍធនធាន។
សេចក្តីថ្លែងការណ៍នោះបានសំដៅទៅលើកិច្ចខិតខំប្រឹងប្រែងរបស់ចិន ក្នុងការពង្រីកគំនិតផ្តួចផ្តើមកម្មវិធីខ្សែក្រវ៉ាត់ និងផ្លូវ Belt and Road ទៅកាន់តំបន់អាក់ទិក។ សេចក្តីថ្លែងការណ៍និយាយថា ប្រទេសនេះកំពុងកសាងកំពង់ផែ និងហេដ្ឋារចនាសម្ព័ន្ធដទៃទៀតនៅក្នុងតំបន់ បញ្ជូននាវាស្រាវជ្រាវ ហើយគ្រោងនឹងសាងសង់នាវាបំបែកទឹកកកដើរដោយថាមពលនុយក្លេអ៊ែរថែមទៀតផង។
កងកម្លាំងឆ្មាំសមុទ្របានបន្ថែមថា ការប៉ុនប៉ងរបស់ចិនក្នុងការពង្រីកឥទ្ធិពលរបស់ខ្លួនអាចរារាំងដល់ការមកដល់បនៃវត្តមានសហរដ្ឋអាមេរិក និងសេរីភាពនៃការធ្វើនាវាចរណ៍នៅក្នុងតំបន់អាក់ទិកដែលការប៉ុនប៉ងស្រដៀងគ្នានេះត្រូវបានធ្វើឡើងនៅក្នុងសមុទ្រចិនខាងត្បូង។
កងកម្លាំងព្រមានថា ប្រទេសចិន និងរុស្ស៊ីបាននិងកំពុងធ្វើការវិនិយោគដ៏ធំនៅតំបន់អាក់ទិក ដើម្បីពង្រីកផលប្រយោជន៍របស់ពួកគេ ខណៈដែលកងកម្លាំងឆ្មាំឆ្នេរមិនបានធ្វើដូច្នេះនោះទេ ដោយសារតែការរឹតត្បិតថវិកា។
ផែនការរបស់ឆ្មាំសមុទ្រ ក្នុងការសាងសង់នាវាបំបែកទឹកកកធំ ៗ បានជួបជាមួយការអំពាវនាវឱ្យមានការពិនិត្យឡើងវិញ ពីសមាជិកមួយចំនួននៃសភា ដោយសារតែផែនការនាវាបំបែកទឹកកកនោះមានតម្លៃខ្ពស់ពេក។
សូមបញ្ជាក់ថា បច្ចុប្បន្ននេះ មហាយក្សចិនវ៉ាងទី និងមហាយក្សរុស្ស៊ីឈ្លានពាន កំពុងតែរុទន្ទ្រានស្ទើនៅពាសពេញពិភពលោក ដែលកំពុងគេកំពុងតែពង្រីកឥទ្ធិពល និងមនោគមវិជ្ជាកុម្មុយនីស្ត។ ទីក្រុងប៉េកាំងកំពុងតែវ៉ាងទីស្ទើរទាំងស្រុងនៅក្នុងតំបន់សមុទ្រចិនខាងត្បូង ខណៈដែលតំបន់នេះគឺជាដែនទឹកអន្តរជាតិ។ មិនតែប៉ុណ្ណោះ ទីក្រុងប៉េកាំងថែមទាំងបានហៅសកម្មភាពនាវាទាំងឡាយណា ដែលបើកទៅតំបន់នោះថាជាការបង្កហេតុ និងខុសច្បាប់ថែមទៀតផង។ តួយ៉ាងទង្វើមិនគប្បីរបស់ចិន បានធ្វើឲ្យសហរដ្ឋអាមេរិកផ្ទុះកំហឹងយ៉ាងខ្លាំង ខណៈដែលសហរដ្ឋអាមេរិកបានបញ្ជូននាវាចម្បាំងធ្វើនាវាចរណ៍ដោយសេរីនៅលើដែនទឹកអន្តរជាតិនៃតំបន់សមុទ្រចិនខាងត្បូងសោះ ស្រាប់តែចិនបានបញ្ជូននាវាចម្បាំងរបស់ខ្លួនមួយគ្រឿង បើកទៅបំបុកនាវាសហរដ្ឋអាមេរិកតែម្តង។
តំបន់ដែលចិនកំពុងតែវ៉ាងទីនោះមានប្រទេសជាច្រើនដែលចូលរួមទាមទារភាពជាកម្មសិទ្ធ។ បន្ថែមលើសនេះ ចិនបានបញ្ជូនក្រុមនាវាចម្បាំងជិត ៣០០គ្រឿងទៅបំភ័យហ្វីលីពីន នៅជិតកោះផាកអាសា ដែលហ្វីលីពីនកំពុងតែកាន់កាប់។ រឿងមួយទៀត គឺចិនកំពុងតែពង្រីកឥទ្ធិរបស់ខ្លួនយ៉ាងធំធេងបន្តិចម្តងៗ នៅតំបន់តំបន់ប៉ាស៊ីហ្វិកទាំងមូល។ ចិនបានគម្រាមជារឿយៗដល់កោះតៃវ៉ាន់ថា តៃវ៉ាន់គឺជាខេត្តមួយរបស់ខ្លួន បើតៃវ៉ាន់ហ៊ានតែប្រកាសឯករាជ្យ នឹងត្រូវស៊ីកណ្តាប់ដៃដែករបស់ខ្លួន។
ចំណែកបងធំមួយទៀតដែលកំពុងធ្វើព្យុះធ្វើភ្លៀងនៅលើពិភពលោក គឺរុស្ស៊ី។ រុស្ស៊ីត្រូវបានលោកខាងលិចហៅថា បានឈ្លានពាន និងស៊ីដាច់តំបន់គ្រីមា ក្រោមរូបភាពដដែលៗ ដែលប្រទេសមួយនេះធ្វើទៅលើហ្សកហ្ស៊ី ដោយបានស៊ីដាច់តំបន់ដ៏ធំ។ រុស្ស៊ីបានស៊ីដាច់តំបន់គ្រីមាកាលពីឆ្នាំ ២០១៤។ មិនតែប៉ុណ្ណោះ ថែមទាំងចង់ស៊ីដាច់ច្រកសមុទ្រចខឺច និងសមុទ្រអាហ្សូវ ដែលជាដែនទឹករួមថែមទៀតផង។
កាលពីពេលថ្មីៗនេះ សារព័ត៌មាន CNN បានរាយការណ៍ថា រុស្ស៊ីកំពុងតែរំកិលមូលដ្ឋានទ័ពរបស់ខ្លួនទៅដាក់នៅក្នុងតំបន់អាក់ទិច ដែលកាន់តែខិតទៅរករដ្ឋអាឡាស្កាសហរដ្ឋអាមេរិក។ ជារឿយៗ អាមេរិកបានផ្គុំយន្តហោះចម្បាំងស្ទាក់ដំណើរក្រុមយន្តហោះទម្លាក់គ្រាប់បែករុស្ស៊ី ដែលហោះចូលដែនអាកាសសហរដ្ឋអាមេរិកនៅរដ្ឋអាឡាស្កា។ អ្នកវិភាគមើលឃើញថា រុស្ស៊ីកំពុងតែពង្រីកឥទ្ធិពលរបស់ខ្លួនកាន់តែខ្លាំង នៅទូទាំងពិភពលោក ដែលទំនងជាថ្ងៃណាមួយនាពេលអនាគត ច្បាស់ណាស់ថា រុស្ស៊ីចង់ក្លាយជាមហាអំណាចគ្រប់គ្រងពិភពលោកទាំង ទោះបីជាត្រូវប្រយុទ្ធដោយផ្ទាល់ជាមួយសហរដ្ឋអាមេរិកក៏ដោយ៕
Home ព្រឹត្តិការណ៍ថ្មីៗ កងកម្លាំងឆ្មាំសមុទ្រសហរដ្ឋអាមេរិកព្រមានពីការឈ្លានពានរបស់ចិន និងរុស្ស៊ីនៅតំបន់អាក់ទិច