ចំពេលដែលប្រទេសអ៊ីស្រាអែល និងប្រទេសលីបង់កំពុងមានភាពតានតឹងនឹងគ្នាកាន់តែខ្លាំងនៅតាមព្រំដែន រដ្ឋមន្ត្រីក្រសួងការពារជាតិលីបង់ លោក Elias Bou Saab បានព្រមានថា កងកម្លាំងយោធាលីបង់នឹងធ្វើការវាយប្រហារទៅលើអាកាសយានដ្ឋាន Bengurion របស់អ៊ីស្រាអែល បើសិនជាអាកាសយានដ្ឋានអន្តរជាតិ Rafik Hariri របស់ទីក្រុងបេរូតត្រូវរងការវាយប្រហារណាមួយ នៅក្នុងការផ្ទុះសង្គ្រាមនាពេលខាងមុខ។
លោកត្រូវបានស្រង់សម្តីដោយសារព័ត៌មាន al-Manar ថា «ប្រសិនបើអ៊ីស្រាអែលវាយប្រហារមកលើអាកាសយានដ្ឋាន និងទីតាំងប្រេងរបស់យើង យើងក៏នឹងវាយទៅលើទីតាំងប្រេងរបស់ប្រទេសនេះដូចគ្នា»។
ការលើកឡើងបែបនេះ ធ្វើឡើងខណៈដែលលោកបានបំពេញដំណើរទស្សនកិច្ចទៅកាន់តំបន់ខាងត្បូងនៅជាប់ព្រំដែនអ៊ីស្រាអែល។
ភាពតានតឹងដែលញ៉ាំងឲ្យមានការគម្រាមប្រកាសសង្គ្រាមនេះ លេចឡើងខណៈដែលមានការខ្វែងគំនិតគ្នាជុំវិញការសាងសង់ការដ្ឋានសំណាង់នៃជញ្ជាំងព្រំដែន និងគម្រោងរបស់លីបង់ក្នុងការស្រាវជ្រាវរកប្រេងនៅលើឆ្នេរសមុទ្រ និងឧស្ម័ននៅក្នុងតំបន់ដែនទឹកមានជម្លោះរវាងប្រទេសទាំងពីរ ដែលប្រទេសទាំងពីរកំពុងស្ថិតក្នុងស្ថានភាពមានសង្គ្រាមនឹងគ្នា។
ប្រវត្តិសាស្ត្រសង្គ្រាមរវាងអ៊ីស្រាអែល និងលីបង់ ប្រទេសទាំងពីរបានប្រយុទ្ធគ្នាអស់រយៈពេល ៣៣ថ្ងៃនៅឆ្នាំ ២០០៦ និងបានបិទបញ្ចប់ក្រោមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិលេខ ១៧០១ ដែលអំពាវនាវឲ្យលីបង់ទម្លាក់អាវុធចុះ និងឲ្យអ៊ីស្រាអែលដកទ័ពចេញពីលីបង់ និងបានពង្រីកការដាក់ពង្រាយកងកម្លាំងអង្គការសហប្រជាជាតិនៅភាគខាងត្បូងលីបង់។
ប៉ុន្តែឥទ្ធិពលរបស់ក្រុមហេសប៊ុលឡានៅលីបង់ បានញ៉ាំងឲ្យមន្ត្រីកំពូលនៅក្នុងជួរតំណែងមន្ត្រីការពារជាតិអ៊ីស្រាអែលបានព្រមានថា កងកម្លាំងលីបង់បានបាត់បង់ឯករាជ្យរបស់ខ្លួន និងបានក្លាយទៅជាផ្នែកសមាហរណកម្មនៃបណ្តាញក្រុមហេសប៊ុលឡា។
កងកម្លាំងការពារជាតិអ៊ីស្រាអែលបាននិយាយថា កិច្ចសហប្រតិបត្តិការរវាងកងកម្លាងលីបង់ និងក្រុមហេសប៊ុលឡាបានកើនឡើងយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។ កងកម្លាំងអ៊ីស្រាអែលបានព្រមានថា សង្គ្រាមលើកក្រោយ អ៊ីស្រាអែលនឹងកំណត់គោលដៅមិនត្រឹមតែទៅលើហេដ្ឋារចនាសម្ព័ន្យោធាប៉ុណ្ណោះទេ ប៉ុន្តែក៏នឹងកំណត់គោលដៅលើហេដ្ឋារចនាសម្ព័ន្ធស៊ីវិល ដែលប្រើប្រាស់ដោយក្រុមហេសប៊ុលឡាផងដែរ។
កាលពីថ្ងៃអង្គារ អ្នកនាំពាក្យសភាលីបង់បាននិយាយថា ប្រទេសរបស់លោកបានត្រៀមខ្លួនរួចរាល់ហើយសម្រាប់ការកំណត់ដែនទឹករបស់ខ្លួនជាមួយអ៊ីស្រាអែល ក្រោមការឃ្លាំមើលពីអង្គការសហប្រជាជាតិ ដែលដូចទៅនឹងយន្តការដែលត្រូវបានប្រើសម្រាប់ព្រំដែនពណ៌ខៀវ។
ប្រទេសទាំងពីរមានជម្លោះព្រំដែនសមុទ្រដែលមិនទាន់ដោះស្រាយនៅឡើង នៅត្រង់តំបន់ត្រីកោណដែលគ្របដណ្តប់លើផ្ទៃដីទំហំ ៨៦០គីឡូម៉ែត្រការ៉េលាតសន្ធឹងតាមបណ្តោយប្លុករុករករ៉ែនៅឈូងសមុទ្រជាច្រើនដែលប្រទេសលីបង់បានដាក់ដេញថ្លៃកាលពី ២ ឆ្នាំមុន។
ទីក្រុង Beirut បានអះអាងថា ប្លុកទី៨ និងទី៩ នៅដែនសមុទ្រស្ថិតនៅក្នុងតំបន់ EEZ គឺជារបស់របស់លីបង់ ហើយផ្នែកខ្លះនៃប្លុក៩ កំពុងត្រូវបានកាន់កាប់ដោយអ៊ីស្រាអែល។
ថ្មីៗនេះ ប្រេង និងឧស្ម័នដែលត្រូវបានរកឃើញនៅឆ្នេរលីបង់ និងអ៊ីស្រាអែលត្រូវបានទស្សន៍ទាយថា នឹងមានតម្លៃជាង ៦០០ពាន់លានដុល្លារនៅទសវត្សន៍ក្រោយ។ កាលពីខែធ្នូ ឆ្នាំ ២០១៧ ទីក្រុងបេរូតបានចុះហត្ថលេខាជាមួយក្រុមហ៊ុនអន្តរជាតិចំនួន ៣ ក្នុងការផ្តល់ការរុករកប្រេង និងក្នុងប្លុកប្រេងទាំងពីរនេះ៕
Home ព្រឹត្តិការណ៍ថ្មីៗ លីបង់គម្រាមវាយប្រហារទៅលើអាកាសយានដ្ឋាន Bengurion របស់អ៊ីស្រាអែល នៅក្នុងការផ្ទុះសង្គ្រាមនាពេលខាងមុខរវាងប្រទេសគូសត្រូវទាំងពីរ