ក្រុមអ្នកស្រាវជ្រាវឈានមុខមួយបានអះអាងថា សហរដ្ឋអាមេរិកនៅតែបន្តនាំមុខប្រទេសផ្សេងៗទៀតនៅលើពិភពលោក ក្នុងនាមជាប្រទេសនាំចេញអាវុធច្រើនជាងគេបំផុតនៅលើពិភពលោក ក្នុងនោះរុស្ស៊ី ឈរនៅលេខរៀងទី២។
វិទ្យាស្ថានស្រាវជ្រាវសន្តិភាពអន្តរជាតិ Stockholm ឬហៅកាត់ថា SIPRI បានអះអាងថា របាយការណ៍កាលពីថ្ងៃទី១១ ខែមីនាកន្លងទៅ បានឲ្យដឹងថា គំលាតរវាងសហរដ្ឋអាមេរិក និងប្រទេសដ៏ទៃទៀតនៅលើពិភពលោក កាន់តែឆ្ងាយឡើងក្នុងរយៈពេល៥ឆ្នាំកន្លងមកនេះ ចាប់ពីឆ្នាំ២០១៤ ដល់ឆ្នាំ២០១៨ ដោយការនាំចេញអាវុធអាមេរិក បានកើតឡើងដល់ទៅ៣៦ភាគរយ ដែលកាលពីមុន កើនឡើងត្រឹម៣០ភាគរយប៉ុណ្ណោះ។
លោក Aude Fleurant គឺជាប្រធានកម្មវិធីចំណាយយោធា និងអាវុធរបស់វិទ្យាស្ថាន SIPRI បាននិយាយថា សហរដ្ឋអាមេរិក បានពង្រឹងគោលជំហរបស់ខ្លួនក្នុងនាមជាប្រទេសផ្គត់ផ្គង់អាវុធឈានមុខរបស់ពិភពលោក។
លោកបន្តថា ពួកគេបាននាំចេញអាវុធទៅកាន់៩៨ប្រទេសនៅក្នុងរយៈពេល៥ឆ្នាំកន្លងមកនេះ ដែលការចែកចាយទាំងនោះ រួមមានទាំងនាវាចម្បាំង មីស៊ីលបាលីស្ទិក និងមីស៊ីលរយៈចម្ងាយជិត ព្រមទាំងគ្រាប់បែកបំពាក់ឧបករណ៍បញ្ជាថែមទៀតផង។
របាយការណ៍បានលើកឡើងផងដែរ ពីគំលាតដ៏ធំរវាងទីក្រុងវ៉ាស៊ីងតោន និងទីក្រុងម៉ូស្កូ ក្នុងការនាំចេញអាវុធ។
វិទ្យាស្ថាន SIPRI បានអះអាងនៅក្នុងរបាយការណ៍របស់ខ្លួនលើការផ្ទេរអាវុធសកលថា ការនាំចេញអាវុធធន់ធំរបស់សហរដ្ឋអាមេរិក មានចំនួន៧៥ភាគរយខ្ពស់ជាងរុស្ស៊ី ក្នុងអំឡុងឆ្នាំ២០១៤-១៨ ខណៈពេលដែលពួកគេកើនឡើងតែ១២ភាគរយប៉ុណ្ណោះ កាលពីអំឡុងឆ្នាំ២០០៩-១៣។របាយការណ៍នេះ បន្តថា ជាងពាក់កណ្តាលស្មើនឹង៥២ភាគរយនៃការនាំចេញអាវុធរបស់អាមេរិក គឺទៅកាន់តំបន់មជ្ឈិមបូព៌ា អំឡុងឆ្នាំ២០១៤-១៨។
វិទ្យាស្ថាន SIPRIបាននិយាយថា ការនាំចេញអាវុធរបស់រុស្ស៊ី បានធ្លាក់ចុះ១៧ភាគរយក្នុងចន្លោះឆ្នាំ២០១៤-១៨ ជាមួយនឹងការកាត់បន្ថយការនាំចូលដោយប្រទេសឥណ្ឌា និងវ៉េណេស៊ុយអេឡា។
របាយការណ៍បានបញ្ជាក់ទៀតថា បារាំងឈរនៅលេខរៀងទី៣ជាប្រទេសនាំចេញអាវុធខ្ពស់ជាងគេបំផុតនៅលើពិភពលោកស្មើនឹង៦.៨ភាគរយ បន្ទាប់មកអាល្លឺម៉ង់ ឈរនៅលេខ៤ ស្មើនឹង៦.៤ភាគរយ និងចិនឈរនៅលេខរៀងទី៥ ស្មើនឹង៥.២ភាគរយ។ ប្រទេសកំពូលទាំង៥នេះ ស្មើនឹង៧៥ភាគរយនៃការនាំចេញអាវុធសរុបពិភពលោក។
នៅក្នុងរបាយការណ៍មួយដែលបានចេញផ្សាយកាលពីខែធ្នូ ឆ្នាំ២០១៨ វិទ្យាស្ថាន SIPRIបាននិយាយថា ការនាំចេញអាវុធដោយក្រុមហ៊ុនសហរដ្ឋអាមេរិកក្នុងឆ្នាំ២០១៧ មានចំនួន២២២.៦ពាន់លានដុល្លារ ខណៈដែលរុស្ស៊ី មានត្រឹមតែ៣៧.៧ពាន់លានដុល្លារប៉ុណ្ណោះ នៅក្នុងរយៈពេល១ឆ្នាំដូចគ្នា៕
