ប្រព័ន្ធផ្សព្វផ្សាយសហរដ្ឋអាមេរិកជាច្រើនបានរាយការណ៍នៅថ្ងៃទី១៦ ឧសភានេះថា ចំពេលដែលស្ថានការកាន់តែឡើងកម្តៅខ្លាំងពីមួយថ្ងៃទីមួយថ្ងៃ សហរដ្ឋអាមេរិកបានប្រកាសអាសន្នដល់បុគ្គលិកមិនចាំបាច់ទាំងអស់នៅក្នុងប្រទេសអ៊ីរ៉ាក់ ដែលនៅជាប់អ៊ីរ៉ង់ត្រូវចាកចេញពីប្រទេសនេះជាបន្ទាន់ ខណៈដែលក្រុមអ្នកប្រយុទ្ធសហរដ្ឋអាមេរិកទាំងអស់កំពុងរងចាំបញ្ជាតែប៉ុណ្ណោះ សមរភូមិសង្គ្រាមនឹងត្រូវចាប់ផ្តើមភ្លាម។ ខណៈដែលក្រុមអ្នកប្រយុទ្ធសហរដ្ឋអាមេរិកកំពុងត្រៀមខ្សែត្រៀមជួរមុខ អ៊ីរ៉ង់ឯណោះវិញបានត្រៀមមីស៊ីលបញ្ឈរតម្រង់ទៅរកក្រុមទ័ពអាមេរិករួចជាស្រេច។
លោក Bill Urban អ្នកនាំពាក្យបញ្ជាការកណ្តាលរបស់កងយោធាសហរដ្ឋអាមេរិកបាននិយាយនៅក្នុងសេចក្តីថ្លែងការណ៍ថា មានការគំរាមកំហែងដែលអាចកើតមានឡើងចំពោះកងកម្លាំងអាមេរិកនៅក្នុងប្រទេសអ៊ីរ៉ាក់ ខណៈដែលលោកស្វែងរកបំភ្លឺសេចក្តីថ្លែងការផ្ទុយពីមេបញ្ជាការអង់គ្លេសកាលពីថ្ងៃអង្គារ។
នៅក្នុងទីក្រុងបាកដាដ ស្ថានទូតសហរដ្ឋអាមេរិកបានចេញសេចក្តីថ្លែងការណ៍មួយកាលពីថ្ងៃពុធដោយនិយាយថា ក្រសួងការបរទេសអាមេរិកបានបង្គាប់ឱ្យបុគ្គលិករដ្ឋាភិបាលមិនចាំបាច់ទាំងអស់ចាកចេញពីប្រទេសនេះ បន្ទាប់ពីទីក្រុងវ៉ាស៊ីនតោនបាននិយាយកាលពីសប្តាហ៍មុនថា ខ្លួនបានរកឃើញការគំរាមកំហែងដែលគួរឱ្យទុកចិត្តពីអ៊ីរ៉ង់ និងកងកម្លាំងតំណាងរបស់ខ្លួននៅក្នុងតំបន់ ដែលផ្ដោតសំខាន់លើជនជាតិអាមេរិក និងផលប្រយោជន៍អាមេរិក។
ការប្រកាសជម្លៀសបុគ្គលិកនេះ លេចឡើងបន្ទាប់ពីនាវាដឹកប្រេងអារ៉ាប៊ីសាអូឌីតពីរគ្រឿងត្រូវបានវាយប្រហារគិតទុកជាមុនដោយកងកម្លាំងតំណាងអ៊ីរ៉ង់។ ក្រុមចលនាហូធី ដែលជាសត្រូវរបស់អារ៉ាប៊ីសាអូឌីតបានប្រកាសទទួលខុសត្រូវចំពោះការវាយប្រហារនោះ ដោយវាយប្រហារដោយប្រើដ្រូនទៅលើនាវាទាំងនោះ។ សម្ព័ន្ធមិត្តអាមេរិកមួយចំនួនបានសម្តែងការសង្ស័យអំពីការអះអាងរបស់រដ្ឋបាលលោកត្រាំថាអ៊ីរ៉ង់កំពុងបង្កការគំរាមកំហែងកាន់តែខ្លាំងឡើង។
ជារឿយៗ អ៊ីរ៉ង់ ឬកងកម្លាំងតំណាងរបស់ខ្លួនដូចជា ក្រុមហេសប៊ុលឡា ក្រុមចលនាហាម៉ាស់ និងក្រុមតាលីបង់ តែងបើកការវាយប្រហារ ចាប់ពង្រត់ និងប្លន់មកលើសហរដ្ឋអាមេរិក និងបណ្តាប្រទេសលោកខាងលិចដូចជាជនជាតិ និងក្រុមនាវារកស៊ីជាដើម។
ថ្មីៗនេះ លោកប្រធានាធិបតីសហរដ្ឋអាមេរិកបានលើកឡើងថា លោកមិនចង់ធ្វើសង្គ្រាមជាមួយអ៊ីរ៉ង់នោះទេ ហើយក៏ចង់ឲ្យមានការបញ្ជូនទ័ព ១២ម៉ឺននាក់ទៅតំបន់មជ្ឈឹមបូព៌ានោះដែរ ប៉ុន្តែបើសិនជាអ៊ីរ៉ង់បង្កហេតុ ឬធ្វើអ្វីដោយមិនប្រុងប្រយ័ត្នមកលើសហរដ្ឋអាមេរិក អ៊ីរ៉ង់នឹងបង្កើតកំហុសដ៏អាក្រក់បំផុត។
បច្ចុប្បន្ននេះ កងទ័ពជើងទឹកសហរដ្ឋអាមេរិកកំពុងផ្គុំកម្លាំងនៅត្រង់ឈូងសមុទ្រពែក្ស បន្ទាប់ពីការប្រកាសពីសំណាក់ទីប្រឹក្សាសហរដ្ឋអាមេរិក លោក ចន បុលថុនថា វត្តមានទ័ពអាមេរិកលេចឡើង ដើម្បីប្រឆាំងទៅនឹងការគម្រាមកំហែងរបស់អ៊ីរ៉ង់មកលើខ្លួន៕
