លោកយាយម្នាក់រស់នៅរុស្ស៊ី ដែលត្រូវបានគេរាយការណ៍ថា ជាមនុស្សរស់មានអាយុវែងជាងគេបំផុតនៅវ័យ១២៨ឆ្នាំនោះ បានត្អូញត្អែរពីជីវិតរស់នៅដ៏វែងអន្លាយរបស់លោកយាយថា លោកយាយមិនដែលបានស្គាល់ជាតិស្រួលអ្វីនឹងគេទេ។ លោកនិយាយនិយាយថា លោកយាយមិនសប្បាយចិត្តសូម្បីតែ១ថ្ងៃនៅក្នុងជីវិតរបស់គាត់ ហើយជីវិតយូរបែបនេះ គឺជាការដាក់ទោសទៅវិញទេ។លោកយាយ Koku Istambulova ពិតជាធ្វើឲ្យពិភពលោកមិនជឿនូវអាយុលើលិខិតឆ្លងដែន ដែលចេញដោយរដ្ឋាភិបាលរុស្ស៊ីឡើយ។ នេះក៏ព្រោះថា អ្នកដែលធ្លាប់មានអាយុវែងជាងគេ គឺត្រឹមតែ១២២ឆ្នាំប៉ុណ្ណោះ។
លោកយាយបាននិយាយថា៖ “ខ្ញុំមិនបានស្គាល់សេចក្តីសុខនៅថ្ងៃណាមួយឡើយក្នុងជីវិតនេះ។ ខ្ញុំតែងតែធ្វើការធ្ងន់ ហើយខ្ញុំពិតជាហត់ណាស់។ ការដែលមានអាយុវែងមិនមែនជាអំណោយពីព្រះទេ។ វាជាទារុណកម្មមកលើខ្ញុំទៅវិញទេ។
ដោយសារសល់តែពេល២សប្តាហ៍ទៀតនឹងឈានដល់វ័យ១២៩ឆ្នាំហើយនោះ លោកយាយ បាននិយាយថា លោកយាយមិនសប្បាយចិត្តសូម្បីតែ១ថ្ងៃ។
នៅពេលសួរថាតើហេតុអ្វីបានជាលោកយាយរស់នៅយូរបែបនេះ លោកយាយឆ្លើយថា វាគឺជាបំណងរបស់ព្រះ។ លោកយាយមិនដឹងថា វាកើតឡើងដោយសារអ្វីនោះទេ។ លោកយាយបាននិយាយថា លោកយាយឃើញគេរត់ហាត់កីឡា ញ៉ាំអាហារពិសេស ថែរាងរបស់ពួកគេ ប៉ុន្តែលោកយាយវិញមិនដឹងនោះទេថាតើហេតុអ្វីបានជាលោកយាយអាចរស់មកទល់នឹងពេលនេះបាន។លោកយាយមានកូនស្លាប់ចោលទាំងបួននាក់ ដែលបន្សល់ទុកលោកយាយរស់នៅម្នាក់ឯង។ ចំពោះវិធីធ្វើឲ្យអាយុវែងវិញ លោកយាយប្រាប់ថា លោកយាយមិនដឹងនោះទេ។ លោកយាយគ្រាន់តែប្រាប់ថា គាត់ចូលចិត្តពិសារទឹកដោះគោជូរ ហើយមិនពិសារសាច់ ឬស៊ុបឡើយ។
សូមបញ្ជាក់ថា រដ្ឋាភិបាលរុស្ស៊ី បានអះអាងថា លោកយាយ Koku គឺជាមនុស្សអាយុចាស់ជាងគេបំផុតនៅលើពិភពលោក។យោងតាមសំបុត្រកំណើតចេញដោយអតីតសហភាពសូវៀត លោកយាយ Kokuកើតនៅថ្ងៃទី១ ខែមិថុនា ឆ្នាំ១៨៨៩។ លោកយាយមានវ័យ៥៥ឆ្នាំ ពេលដែលសង្គ្រាមលោកលើកទី២ បានបញ្ចប់នៅក្នុងឆ្នាំ១៩៤៥ ហើយលោកមានអាយុ១០២ឆ្នាំ ពេលដែលសហភាពសូវៀតដូលរំលំនៅក្នុងឆ្នាំ១៩៩១។ អំឡុងសង្គ្រាម លោកយាយបានរៀបរាប់ថា រថក្រោះក្រុមណាហ្ស៊ី បានបើកកាត់មុខផ្ទះគ្រួសារលោកយាយ៕
