មនុស្សរាប់ម៉ឺននាក់ បានជួបជុំគ្នានៅក្នុងពិធីបុណ្យដ៏ធំមួយនៅក្នុងប្រទេសជប៉ុន គឺជាពិធីបុណ្យលឹង្គ។
ការតុបតែងចម្រុះពណ៌ និងមុខម្ហូបអាហាររាងដូចលឹង្គមនុស្សប្រុស ត្រូវបានបង្ហាញនៅក្នុងពិធីបុណ្យលឹង្គនេះ ដែលស្គាល់ជាភាសាជប៉ុនថា “ហូណេន សៃ”។
ជារៀងរាល់ឆ្នាំ នៅប្រជាពលរដ្ឋ និងភ្ញៀវទេសចរនៅខេត្តអៃឈិ ប្រទេសជប៉ុន បានជួបជុំគ្នាធ្វើដំណើរទៅកាន់ទីក្រុងកូម៉ាគិ ភាគខាងជើងនៃទីក្រុងណាហ្គោយ៉ា ដើម្បីមើលលឹង្គយក្ស ដែលគេដង្ហែរនៅតាមផ្លូវ។
ចំណែកឯក្រុមបុរសៗវិញ នាំគ្នាសែងលឹង្គប្រវែង២ម៉ែត្រ ដែលឆ្លាក់ពីដើមស្រល់ជប៉ុន ហើយរួចយកទៅបូជានៅឯទីសក្ការៈ ជាមួយនឹងក្រុមអ្នកបួងសួង សុំឲ្យប្រមូលផលបានច្រើន និងសម្បួរធនធានធម្មជាតិទាំងអស់ និងសូមឲ្យមានកូនជាមួយមនុស្សជាទីស្រលាញ់របស់ខ្លួន។
លឹង្គដ៏រឹងមាំមួយនេះ មានទម្ងន់រហូតដល់៤០០គ.ក និងមានប្រវែងបរិវេនចុងលឹង្គជាង១០០សង់ទីម៉ែត្រ ហើយវាគឺជាលឹង្គដែលក្រុមអ្នកបួងសួង ចង់ថ្វាយជាងគេ។
កាលពីដំបូងឡើយ រូបតំណាងលឹង្គមួយនេះ មានទំហំតូចជាងនេះច្រើន ហើយត្រូវបានគេចងជាប់នឹងដាវសាំម៉ូរ៉ៃ ប៉ុន្តែទំហំរបស់វា កាន់តែរីកធំឡើងៗ ក្នុងរយៈពេលជាច្រើនឆ្នាំកន្លងមកនេះ។ ភ្ញៀវដែលមានសំណាង នឹងមានឱកាសបានថើមចុងលឹង្គឈើមួយនេះ ហើយភ្ញៀវដែលបានមកទស្សនាពិធីបុណ្យនេះ នឹងបានមើលឃើញលឹង្គធ្វើពីសូកូឡា ហតដក និងនំជាច្រើនទៀត ដែលគេរចនាជារូបលឹង្គ។
ការដង្ហែរលឹង្គយក្សនេះដែរ បានលាយឡំជាមួយពិធីជប់លៀងតាមផ្លូវជាមួយនឹងអាហារសម្រន់ ភ្លក់រស់ជាតិស្រាសាកេ និងការជូនកាដូគ្នាផងដែរ។ ខណៈដែលស្រាសាកេ ត្រូវបានចែកឲ្យដោយសេរី មិនគិតលុយ អំឡុងពិធីដង្ហែរលឹង្គយក្សនោះ ការវាយតប់គ្នា ឬបញ្ហាអ្វីផ្សេងទៀត មិនដែលកើតឡើងម្តងណានោះទេ។
នៅក្នុងពិធីបុណ្យនេះដែរ ភ្ញៀវទេសចរ អាចបួងសួងសុំឲ្យមានកូន ជួបមនុស្សជាទីស្រលាញ់ ឬទទួលបានការប្រមូលផលច្រើន ឬភាពសម្បួរសប្បាយផងដែរ។
សូមបញ្ជាក់ថា ពិធីបុណ្យលឹង្គ ចាប់ផ្តើមជារៀងរាល់ឆ្នាំនៅថ្ងៃទី១៥ ខែមីនា នៅឯទីសក្ការៈបូជា “តាហ្គាតា” ជាកន្លែងដែលព្រះសង្ឃ នឹងប្រោះព្រំតាមសុំឲ្យផ្លូវបរិសុទ្ធ សម្រាប់អ្នកដែលសែងលឹង្គយក្ស៕
