សារព័ត៌មាន Fox News បានស្រង់ពីប៉ូលិសនិងប្រព័ន្ធផ្សព្វផ្សាយជប៉ុន ដែលបាននិយាយនៅថ្ងៃទី២៨ ឧសភានេះថា បុរសដែលកាន់កាំបិតម្នាក់បានវាយប្រហារអ្នកធ្វើដំណើរ រួមទាំងសិស្សសាលាដែលកំពុងរង់ចាំនៅឯចំណតរថយន្តក្រុងនាទីក្រុងតូក្យូ ដែលបានសម្លាប់មនុស្សយ៉ាងហោចណាស់ម្នាក់ រីឯមនុស្ស ១៩នាក់ផ្សេងទៀតរងរបួស មុនពេលដែលបុរសម្នាក់នោះបានសម្លាប់ខ្លួនឯង។
ទូរទស្សន៍ជាតិជប៉ុន NHK បានដកស្រង់សម្តីប៉ូលីសក្នុងតំបន់ ដែលបាននិយាយថា អ្នករងរបួសត្រូវបានបញ្ជូនទៅកាន់មន្ទីរពេទ្យក្បែរ ៗ នោះ ប៉ុន្តែក្មេងម្នាក់និងមនុស្សពេញវ័យម្នាក់ទៀតគ្មានសង្ឃឹមនោះទេ។ យ៉ាងណាមិញ មន្ត្រីមួយរូបមកពីនាយកដ្ឋានអគ្គិភ័យកាវ៉ាសាគីបាននិយាយថា មនុស្សម្នាក់ត្រូវបានជឿថា បានបាត់បង់អាយុជីវិតទៅហើយ។
ក្រុមមន្ត្រីបានប្រាប់សារប័ត៌មាន NHK ថា ជនសង្ស័យដែលត្រូវបានគេជឿថា មានអាយុ ៤០ ឬ ៥០ ឆ្នាំ បានវាយប្រហារទៅលើមនុស្សនៅជិតសួនឧទ្យាន Noborito ក្នុងតំបន់អ្នកស្រុកមួយនៃទីក្រុង Kawasaki ។ របាយការណ៍បានបន្ថែមថា អ្នកបើកឡានក្រុងម្នាក់បានប្រាប់មន្ត្រីថា ជនសង្ស័យបានដើរឆ្ពោះទៅឡានក្រុង ដោយកាន់កាំបិតមួយនៅដៃម្ខាង និងបានសម្លាប់កុមារម្នាក់។
ចំនួនអ្នករងរបួសត្រូវបានរាយការណ៍ថា មានកុមារ ១៣នាក់។ រូបភាពពីទូរទស្សន៍បានបង្ហាញថា បុគ្គលិកសង្គ្រោះបន្ទាន់បានផ្តល់ជំនួយជាដំបូងនូវតង់ដល់ប្រជាជនរងគ្រោះ ហើយប៉ូលិសបាននាំអ្នករបួសទៅកាន់មន្ទីរពេទ្យតាមរថយន្តសង្គ្រោះបន្ទាន់។
សារព័ត៌មានដដែលបន្តថា ជនសង្ស័យបានចាក់ចំបំពង់ក ខ្លួនដើម្បីដើម្បីសម្លាប់ខ្លួនតាមក្រោយ។ ប៉ូលិសបានរកឃើញកាំបិត ២នៅកន្លែងកើតហេតុ។ គេនៅមិនទាន់ដឹងពីមូលហេតុនៃការសម្លាប់នោះនៅឡើយទេ៕
