កាលពីពេលកន្លងទៅនេះ បន្ទាប់ពីសហរដ្ឋអាមេរិក ក្រុមហ៊ុន Google បានប្រកាសគម្រោងព្យួរកិច្ចសហប្រតិបត្តិការជាមួយក្រុមហ៊ុន Huawei។ ក្រុមហ៊ុន Google ផ្តោតសំខាន់លើប្រព័ន្ធ Android ដែលកំពុងបំពាក់នៅក្នុង Smartphone ភាគច្រើនលើលោក ក្នុងនោះក៏មាន Huawei មួយដែរ។ វិធានការរបស់ Google ចំពោះ Huawei គឺបិទទ្វារមិនឲ្យអតិថិជនរបស់ Huawei បន្តប្រើកម្មវិធី Google ដូចយ៉ាង Gmail Google Maps និងការបន្ទាន់សម័យលើប្រព័ន្ធ Android។
ថ្មីៗនេះតាមការដកស្រង់ការផ្សាយចេញពី Channel News Asia នាព្រឹកថ្ងៃពុធ ទី២៩ ខែឧសភា ឆ្នាំ២០១៩ នេះបានឲ្យដឹងថាក្រុមហ៊ុនបច្ចេកវិទ្យាទូរគមនាគមន៍យក្សចិន Huawei បានដាក់ញ្ញតិប្តឹងជំទាស់មួយទៅកាន់សហរដ្ឋអាមេរិក ដើម្បីតតាំងនឹងទណ្ឌកម្មរបស់ទីក្រុងវ៉ាស៊ីនតោន ដែលកំពុងព្យាយាមកម្ទេចទីផ្សាររបស់ខ្លួនចេញ ពីការប្រកួតប្រជែងទីផ្សារអន្តរជាតិ។
ក្រុមហ៊ុន Huawei បានដាក់ញ្ញតិមួយទៅកាន់តុលាការក្នុងរដ្ឋតិចសាស់ ដើម្បី ស្នើឲ្យតុលាការអាមេរិកប្រកាសចាត់ទុក ការអនុវត្តន៍ច្បាប់ស្តីសកម្មភាពការពារជាតិអាមេរិក National Defense Authorization Act (NDAA) ឆ្នាំ២០១៩ គឺជាការអនុវត្តន៍ផ្ទុយពីរដ្ឋធម្មនុញ្ញរបស់សហរដ្ឋអាមេរិក។
កាលពីកន្លងមក ចាប់តាំងពីឆ្នាំ២០១២មក រដ្ឋាភិបាលសហរដ្ឋអាមេរិកបានបង្ហាញពីការសង្ស័យនានាថាសម្ភារៈរបស់ក្រុមហ៊ុន Huawei ប្រហែលជាមានការបញ្ជូលបច្ចេកវិទ្យាដែលជួយដល់រដ្ឋាភិបាលចិនអាចប្រមូលបាននូវព័ត៌មានសម្ងាត់នានា។ ក្តីបារម្ភនេះបានកើនឡើងខណៈប្រទេសទាំងពីរប្រកួតប្រជែងគ្នាដើម្បីបង្កើតប្រព័ន្ធ5G ដែលជាបច្ចេកវិទ្យាអ៊ិនធឺណិតលឿនបំផុត។
ក្រុមហ៊ុន Huawei បានច្រានចោលព័ត៌មានដែលថាសម្ភារៈបច្ចេកវិទ្យារបស់ខ្លួនគំរាមកំហែងដល់សន្តិសុខ និងថា Huawei គឺគ្រាន់តែជាក្រុមហ៊ុនឯកជនមួយប៉ុណ្ណោះ។ ជាមួយគ្នានោះដែរ ក្រុមអាជ្ញាធរប្រទេសកាណាដាបានចាប់ខ្លួននាយិកាហរិញ្ញវត្ថុក្រុមហ៊ុន Huawei តាមសំណើរបស់សហរដ្ឋអាមេរិក ជុំវិញការប្រចោទប្រកាន់ថា ក្រុមហ៊ុនបានធ្វើអាជីវកម្មជាមួយប្រទេសអ៊ីរ៉ង់ ដែលជាការរំលោភបំពានលើទណ្ឌកម្មពាណិជ្ជកម្មដែលអាមេរិកបានដាក់លើអ៊ីរ៉ង់។
គួររម្លឹកថាសហរដ្ឋអាមេរិកបានដាក់ក្រុមហ៊ុន Huawei ទៅក្នុងបញ្ជីខ្មៅផ្នែកពាណិជ្ជកម្មកាលពីសប្ដាហ៍មុនដោយហាមឃាត់មិនឱ្យក្រុមហ៊ុនអាមេរិកទាំងអស់រកស៊ីជាមួយក្រុមហ៊ុនបង្កើតបណ្ដាញទូរគមនាគមន៍ដ៏ធំជាងគេលើពិភពលោកមួយនេះទៀតឡើយនិងបានបង្កើនកម្ដៅសង្គ្រាមពាណិជ្ជកម្មរវាងប្រទេសមហាអំណាចសេដ្ឋកិច្ចទាំងពីរមានជម្លោះកាន់តែក្តៅគគុក ៕
