កាលពីពេលថ្មីៗនេះ ប៉ូលិសអន្តោប្រវេសន៍កម្ពុជាបានចាប់ខ្លួនបុរសជនជាតិចិនម្នាក់ដែលបាននាំលុយជិត ១លានដុល្លារពីទីក្រុងហុងកុងចូលមកកម្ពុជាអាកាសយានដ្ឋានអន្តរជាតិភ្នំពេញនៅទី២៩ ខែឧសភា ឆ្នាំ២០១៩ម្សិលមិញនេះ។
បើតាមរបាយការណ៍បានឲ្យដឹងថា ជនជាតិចិនដែលឃាត់ខ្លួនឈ្មោះ LIAO JINGQING កើតថ្ងៃទី១៦ ខែវិច្ឆិកា ឆ្នាំ១៩៧១កាន់លិខិត ឆ្លងដែនលេខ EG0115690 ពាក់ព័ន្ធករណីនាំលុយចំនួន ៨៥៥.០០០ ដុល្លារអាមេរិក ពីទីក្រុងហុងកុង ចូលមកប្រទេសកម្ពុជា។
នៅចំពោះមុខសមត្ថកិច្ច ជនសង្ស័យរូបនេះ បានបន្តថា គោលបំណងនាំប្រាក់មកកម្ពុជា ដើម្បីវិនិយោគលើផ្នែកដេគ័រ ជាមួយប្អូនជីដូនមួយឈ្មោះ LIAO YUPENG (ប៉ុន្តែមិនស្គាល់ឈ្មោះក្រុមហ៊ុន)។ ប្រាក់ខាងលើ បានបើកពីធនាគារឈ្មោះឡុង យៀក ក្នុងទីក្រុងហុងកុង នាំយកមកកម្ពុជា។
យោងតាមរបាយការណ៍របស់សមត្ថកិច្ច បានបង្ហាញថា ភស្តុតាងដែលត្រូវបានដកហូតរួមមាន៖ លិខិតឆ្លងដែនចិនចំនួន១ក្បាល, ប្រាក់ចំនួន៨៥៥,០០០ដុល្លារអាមេរិក (៧២ដុំ), ទូរស័ព្ទដៃចំនួន០១គ្រឿង និងកាបូបធំចំនួន០២។ បច្ចុប្បន្ន ជនសង្ស័យត្រូវបានឃាត់ខ្លួន ដើម្បីសាកសួរ និងអនុវត្តនីតិវិធីបន្ត។
គួរំលឹកថា កាលពីថ្ងៃទី២៣ ខែមេសាកន្លងទៅនេះ កម្លាំងនគរបាលអន្ដោប្រវេសន៍ និងអគ្គនាយកដ្ឋានគយ និងរដ្ឋាករ ប្រចាំនៅអាកាសយានដ្ឋានអន្ដរជាតិភ្នំពេញ ក៏ធ្លាប់បានចាប់ខ្លួនជនសង្ស័យ ជាជនជាតិចិនចំនួន៣នាក់ ដែលបាននាំលុយចំនួន ៣.៥២០.០០០ ដុល្លារអាមេរិក ដោយពុំមានការបញ្ជាក់ពីប្រភពហរិញ្ញវត្ថុច្បាស់លាស់ ពីទីក្រុងហុងកុង ចូលមកប្រទេសកម្ពុជាផងដែរ៕
Home ព្រឹត្តិការណ៍ថ្មីៗ ជនជាតិចិន ប្រាប់មូលហេតុនៃការនាំលុយជិត១លានដុល្លារច្រកបាវមកកម្ពុជា