ខណៈដែលភាពតានតឹងរវាងសហរដ្ឋអាមេរិក និងអ៊ីរ៉ង់កំពុងមានភាពតាតឹងនឹងគ្នាកាន់តែខ្លាំង សហរដ្ឋអាមេរិកបានបញ្ជូនក្រុមអ្នកប្រយុទ្ធនាវាផ្ទុកយន្តហោះ និងក្រុមយន្តហោះទម្លាក់គ្រាប់បែកជាច្រើនសន្ធឹកសន្ធាប់ទៅកាន់តំបន់ឈូងសមុទ្រពែក្ស។ បានត្រឹមតែប៉ុន្មានថ្ងៃ អាមេរិកក៏បានសម្រេចចិត្តបញ្ជូនកងទ័ពប្រមាណ ១ ៥០០នាក់ទៅកាន់តំបន់នេះបន្ថែមទៀត។ វត្តមានក្រុមអ្នកប្រយុទ្ធសហរដ្ឋអាមេរិកត្រូវបានរំលេចដោយរូបភាពយ៉ាងឱឡារិក ដែលធ្វើឲ្យអ៊ីរ៉ង់ភ័យស្ទើរលួសព្រលឹង។ នៅចំពោះមុខស្ថានការណ៍នៃកាគម្រាមយ៉ាងខ្លាំងបែបនេះ អ៊ីរ៉ង់នឹងបន្ទន់ឥរិយាបទចរចាជាមួយបណ្តាប្រទេសឈូងសមុទ្រ ដើម្បីបន្ធូរបន្ថយភាពតានតឹង។
អនុរដ្ឋមន្ត្រីការបរទេសអ៊ីរ៉ង់បាននិយាយកាលពីថ្ងៃអង្គារថា អ៊ីរ៉ង់បានត្រៀមខ្លួនរួមរាល់ហើយ ដើម្បីចរចាជាមួយបណ្តាប្រទេសអារ៉ាប់នៅឈូងសមុទ្រ ដើម្បីបន្ធូរបន្ថយភាពតានតឹងនៅតំបន់មជ្ឈឹមបូព៌ា។ នេះបើតាមសារព័ត៌មានអាល់ចាហ្ស៊ីរ៉ានៅថ្ងៃទី២៩ ឧសភានេះ។
លោក Abbas Araqchi បានធ្វើអត្ថាធិប្បាយនៅក្នុងដំណើរទស្សនកិច្ចទៅកាន់កាតា ដែលជាប្រទេសជិតខាងមួយដែលលោកបានជួបជាមួយរដ្ឋមន្ត្រីក្រសួងការបរទេស លោក Sheikh Mohammed bin Abdulrahman Al Thani នៅក្នុងទីក្រុងដូហា។
ភាគីទាំងពីរបានសម្តែងក្តីព្រួយបារម្ភអំពីការកើនឡើងនៃភាពតានតឹង និងបញ្ហានៅក្នុងតំបន់។ នេះបើតាមសេចក្តីថ្លែងការណ៍ពីក្រសួងការបរទេសកាតា។កិច្ចចរចារអ៊ីរ៉ង់នេះ ត្រូវបានធ្វើឡើងយ៉ាងទាន់ហន់ បន្ទាប់ពីវត្តមានសហរដ្ឋអាមេរិកកំពុងរៀបនឹងផ្គុំកម្លាំងជាមួយបណ្តាប្រទេសសម្ព័ន្ធមិត្តនៅក្នុងតំបន់ហើយនោះ។
ទន្ទឹមនឹងនេះដែរ លោក John Bolton ទីប្រឹក្សាសន្តិសុខជាតិអាមេរិក ដែលត្រូវបានចោទប្រកាន់ពីការផ្សព្វផ្សាយអំពីការផ្លាស់ប្តូររបបនៅអ៊ីរ៉ង់បានទៅដល់អេមីរ៉ាត់អារ៉ាប់រួមកាលពីថ្ងៃអង្គារ មុនកិច្ចចរចាត្រូវបានរៀបចំឡើងនៅថ្ងៃពុធ។
លោកចន បុលថុនធ្លាប់បានបង្ហាញផែនការបញ្ជូនទ័ពប្រមាណ ១២ម៉ឺននាក់ទៅកាន់តំបន់ឈូងសមុទ្រ ចំពេលដែលភាពតានតឹងឡើងកម្តៅ។ រីឯលោកត្រាំធ្លាប់បានគម្រាមថា អ៊ីរ៉ង់នឹងត្រូវបញ្ចប់ជីវិតជាផ្លូវការ បើសិនហ៊ានគម្រាមមកលើសហរដ្ឋអាមេរិក។
ភាពតានតឹងរវាងសហរដ្ឋអាមេរិក និងអ៊ីរ៉ង់បានឡើងកម្តៅខ្លាំងចាប់តាំងពីលោកត្រាំប្រកាសដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ បន្ទាប់ពីលោកត្រាំបានចោទថា អ៊ីរ៉ង់លួចផលិតអាវុធនុយក្លេអ៊ែរដោយរំលោភលើកិច្ចព្រមព្រៀងនោះ៕
Home ព្រឹត្តិការណ៍ថ្មីៗ អ៊ីរ៉ង់បន្ទន់ខ្លួនចរចាជាមួយសម្ព័ន្ធមិត្តអាមេរិក នៅចំពោះមុខកម្លាំងយក្សដែលកំពុងសម្ញែងដាក់ខ្លួន