កីឡាករ Mesut Ozil និង Sead Kolasinac បានរត់គេចផុតដោយមិនបានរងរបួសអ្វីនោះឡើយ ក្រោយករណីប៉ុនប៉ងប្លន់ឡានដោយក្រុមប្រដាប់ដោយកាំបិតនៅទីក្រុងឡុងដ៍ ចក្រភពអង់គ្លេសកាលពីថ្ងៃព្រហស្បត្តិ៍។ នេះបើយោងតាមការចុះផ្សាយរបស់កាសែតអង់គ្លេសបានឲ្យដឹងនៅថ្ងៃនេះ។
វែបសាយ Dail Mail បានរាយការណ៍ថា អតីតខ្សែបម្រើក្រុមជម្រើសជាតិអាល្លឺម៉ង់ Ozil បានបើករថយន្ត Mercedes ក្រោយពេលរថយន្តជល់ជាមួយក្រុមជិះម៉ូតូ ដែលមានពាក់មួកសុវត្ថិភាព។
នៅក្នុងវីដេអូដែលបានបង្ហាញ ឃើញខ្សែការពារសញ្ជាតិបូស្នី និងជាមិត្តរួមក្លិបរបស់ Ozil គឺកីឡាករ Kolasinac ដែលធ្វើដំណើររួមគ្នា នៅខាងក្រៅរថយន្ត ហើយនិងបានតតាំងជាមួយក្រុមចោរប្លន់។
នៅក្នុងរូបភាពដែលបានបង្ហាញ គេឃើញកីឡាករ Ozilនិយាយទៅកាន់ក្រុមនគរបាលនៅខាងក្រៅភោជនីយដ្ឋានតួកគី។ វែបសាយនេះ បានសរសេរថា អ្នកបម្រើ និងចុងភៅ បានប្រញាប់ប្រញាល់មកជួយកីឡាករទាំង២នាក់ផងដែរ។
លោក Azuka Alintah គឺជាសាក្សីម្នាក់ បាននិយាយប្រាប់វែបសាយ Dail Mail ថា កីឡាករ Ozilហាក់ដូចជាភ័យខ្លាំងណាស់ ដូចអ្នករាល់គ្នាដែរ ក្រោយពេលត្រូវបានគេដេញពីក្រោយដោយក្រុមចោរប្លន់ប្រដាប់ដោយកាំបិតបែបនេះ។ លោកបន្តថា គាត់បានរត់រកប្រាស់អាយុដូចអ្នករាល់គ្នាដែរ។
ដោយឡែក ក្លិប Arsenalបាននិយាយថា កីឡាករទាំង២នាក់នេះ មិនបានកើតអ្វីនោះទេ ហើយឧប្បត្តិហេតុនោះ គឺជាបញ្ហាឯកជនប៉ុណ្ណោះ។
អ្នកនាំពាក្យក្រុមនគរបាលក្រុងឡុងដ៍ បាននិយាយថា ពួកគេទទួលបានដំណឹងថាជនសង្ស័យជិះម៉ូតូ បានប៉ុនប៉ងប្លន់បុរសម្នាក់ ដែលកំពុងបើកឡាន។
អ្នកនាំពាក្យម្នាក់នោះ បន្តថា តៃកុងរថយន្ត ជាមួយនឹងអ្នកដំណើររបស់គាត់ អាចរត់គេចចេញដោយគ្មានរបួសអ្វីនោះឡើយ ហើយបានរត់ទៅកាន់ភោជនីយដ្ឋាន ស្ថិតនៅតំបន់ Golders Green ជាកន្លែងដែលពួកគេនិយាយទៅកាន់ក្រុមមន្ត្រីនគរបាល។
មកទល់នឹងពេលនេះ នៅមិនទាន់មានការចាប់ខ្លួនជនសង្ស័យណាម្នាក់នោះទេ។
សូមបញ្ជាក់ថា កីឡាករ Mesut Ozil និង Sead Kolasinac មិនមែនជាកីឡាករបាល់ទាត់លើកដំបូងគេនោះទេ ដែលក្លាយជាគោលដៅប្លន់នៅតាមផ្លូវក្នុងទីក្រុងឡុងដ៍។ កាលពីឆ្នាំ២០១៦ ខ្សែប្រយុទ្ធ Andy Carroll របស់ក្លិប West Ham ត្រូវបានក្រុមចោរប្លន់ភ្ជុងកាំភ្លើងតាមផ្លូវទៅផ្ទះពីទីលានហ្វឹកហាត់របស់គាត់៕
Home ព្រឹត្តិការណ៍ថ្មីៗ កីឡាករ Ozil និងមិត្តរួមក្រុម Kolasinac ត្រូវបានចោរប្លន់រថយន្តនៅក្រុងឡុងដ៍